Փաստ ինֆո

Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը՝ դատավոր Ա.Նիկողոսյանի նախագահությամբ, վերաորակել է հինգերորդ կուրսի ուսանող Գևորգ Սարգսյանին ՀՀ քրեական օրենսգրքի 112-րդ առաջին մասով առաջադրված մեղադրանքը ՀՀ քրեական օրենսգրքի 116-րդ հոդվածի 2-րդ մասի՝ անհրաժեշտ պաշտպանության սահմանացանզմամբ առողջությանը ծանր վնաս պատճառելը:

Դատավճռով 23-ամյա երիտասարդը դատապարտվել է 2 տարվա ազատազրկման, և քանի որ ամբաստանյալի նկատմամբ նշանալվելիք պատիժը չի գերազանցում ամբաստանյալի նախնական կալանքի տակ փաստացի գտնվելու ժամկետը, նրա նկատմամբ որպես խափանման միջոց ընտրված կալանավորումը վերացվել է, և նա անհապաղ ազատ է արձակվել դատական նիստի դահլիճում:

Դատարանը հաստատված է համարել, որ 2015 թվականի սեպտեմբերի 30-ին՝ ժամը 23:30-ից հոկտեմբերի 1-ի ժամը 00:10-ն ընկած ժամանակահատվածում, Երևանի Ռուբինյանց 2/15 հասցեում գտնվող «Կալիֆորնիա բուրգեր» արագ սննդի կետի դիմացի ավտոկայանատեղիում վիճաբանություն է տեղի ունեցել մի խումբ տղաների հետ, որի ընթացքում դանակով հարվածներ է ստացել Լևոն Ավետիսյանը:

Դատարանն արձանագրել է, որ քրեական գործի քննության շրջանակներում հետազոտված փաստական տվյալների լրիվ, օբյեկտիվ և բազմակողմանի վերլուծության արդյունքում պարզ է դառնում, որ ամբաստանյալին ուղղված ոտնձգությունն օժտված է եղել հանրային վտանգավորությամբ, բացի այդ, այդ ոտնձգությունը եղել է առկա, այսինքն՝ սկսված և չավարտված, եղել է իրական, այլ ոչ թե ամբաստանյալի երևակայության արդյունքը, իսկ ամբաստանյալի կողմից իրականացված պաշտպանությունն ուղղված է եղել ինչպես սեփական, այնպես էլ իր եղբոր կյանքին և առողջությանն ուղղված ոտնձգության դեմ:

Մասնավորապես, ըստ ամբաստանյալ Գևորգ Սարգսյանի դատաքննական ցուցմունքի, «(…) ինձ ու եղբորս «Կալիֆորնիա բուրգեր»-ի մոտ 10-15 հոգով ծեծի են ենթարկել, որի ընթացքում բաժանվել են երկու մասի, կեսն ինձ են խփել, կեսը՝ եղբորս, որի ընթացքում՝ ինձ խփելու, զգացի, որ ինչ-որ բանով դեպի սրտիս կողմը խփում են, քանի որ ձախլիկ եմ, ձեռքով բարձրացրեցի վերև զգացի երկուսից-երեք հատ ծակոց, մեխանիկորեն ձեռքս քաշեցի հետ, զգացի, որ ինչ-որ բանա մնացել ձեռքիս մեջ, ու աջ ու ձախ անկանոն թափահարելով հետ-հետ գնացի, դիմացս բացվեց, տեսա, որ եղբորս էլ են խփում, մոտիկացա, մայկայից քաշեցի, ասեցի. «Հո քեզել դանակով չեն խփել», ասեց՝ չէ, ու էդ պահին ինչ-որ մեկը խփեց դեմքին, ես ֆռացի, որ տենայի՝ ինչա, անկանոն սկսեցի թափահարել ձեռքս, էդ պահին մի հատ ծակոց զգացի արմունկիս շրջանում ու էդ պահին զգացի, որ թափահարում էի, (…) մայկայից քաշեցի, ասեցի. «Հո քեզ չեն խփել», այդ ժամանակ ինչ-որ մեկը խփեց իրա դեմքին, ու էդ պահին ես ֆռռացի, ծակոց զգացի, էլի թափահարեցի անկանոն ու զգացի, որ ինչ-որ մեկին ուր կպավ, թե ինչ եղավ չեմ կարող ասել (…)»:

Լրիվ, օբյեկտիվ և բազմակողմանի վերլուծելով և գնահատելով դատաքննության ընթացքում հետազոտված ապացույցները, բոլոր չփարատված կասկածները մեկնաբանելով հօգուտ ամբաստանյալ Գևորգ Սարգսյանի, դատարանը գտել է, որ վերջինս տվյալ իրադրության պայմաններում ունեցել է բավարար հիմքեր տուժող Լ. Ավետիսյանին որպես ոտնձգող անձի դիտարկելու համար:

Դատարանի համոզմամբ, բավարար փաստական հիմքեր կան այն հիմնավորման համար, որ ամբաստանյալը տվյալ ոտնձգության պայմաններում կարող էր ենթադրել, որ տուժողը ևս գտնվել է ոտնձգողների թվում, ուստի նման պարագայում ևս ամբաստանյալին ՀՀ քրեական օրենսգրքի 112-րդ հոդվածի 1-ին մասով առաջադրված մեղադրանքը չի հիմնավորվում:
Դատարանը փաստել է, որ ամբաստանյալ Գևորգ Սարգսյանի կողմից անհրաժեշտ պաշտպանության վիճակում տուժող Լևոն Ավետիսյանի առողջությանը հասցվել է այնպիսի ծանր վնաս, որը տվյալ պայմաններում անկասկած արդարացված չէր, այսինքն՝ թույլ է տրվել անհրաժեշտ պաշտպանության սահմանազանցում, քանզի հասցված վնասը տվյալ իրադրությունում և պայմաններում ակնհայտորեն անհամաչափ է եղել ոտնձգությանը։

Միևնույն ժամանակ դատարանը փաստել է, որ դատավճռով հաստատված փաստական հանգամանքների և իրավական դիրքորոշումների շրջանակը ինքնին ողջամտորեն վկայում է այն մասին, որ ամբաստանյալ Գևորգ Սարգսյանը դիտավորությամբ Լևոն Ավետիսյանի առողջության պատճառել է ծանր վնաս, որը, սակայն, կատարվել է անհրաժեշտ պաշտպանության սահմանազանցմամբ, հետևաբար՝ ամբաստանյալ Գևորգ Սարգսյանի կատարած արարքը անհրաժեշտ է ՀՀ քրեական օրենսգրքի 112-րդ հոդվածի 1-ին մասից վերաորակել ՀՀ քրեական օրենսգրքի 116-րդ հոդվածի 2-րդ մասին:

Դատարանը որպես ամբաստանյալ Գևորգ Սարգսյանի պատասխանատվությունն ու պատիժը մեղմացնող հանգամանք է համարել նրա մեղայականով ներկայանալը վարույթն իրականացնող մարմնին, ինչով աջակցել է հանցագործության բացահայտմանը:

Որպես ամբաստանյալ Գևորգ Սարգսյանի անձը բնութագրող տվյալ է դիտարկվել նախկինում դատված չլինելը, ինչպես նաև դրական բնութագրվելը և այն հանգամանքը, որ նա ուսանող է։

Նշենք, որ ամբաստանյալ Գևորգ Սարգսյանի պաշտպանությունն իրականացրել է փաստաբան Երեմ Սարգսյանը:

Լուսանկարում՝ փաստաբան Երեմ Սարգսյանը

Աղբյուր` Փաստինֆո