Փաստ ինֆո

Ժիրայր Սեֆիլյանի ու մյուսների գործով այսօրվա դատական նիստում ավարտվեց դատաձգաբան փորձագետի հարցաքննությունը: Վերջինս կատարել է   դատաձգաբանական փորձաքննություն, ըստ գործի նյութերի, ամբաստանյալ  Հրայր Թոփչյանի մոտից հայտնաբերված երկու ինքնաձիգերի,   4 փամփուշտատուփերի  և 120 փամփուշտների վերաբերյալ, որոնք գտնվել են  ստվարաթղթե  արկղում:

«Եթե հիմա ձեզ ներկայացվեին այդ ինքնաձիգերը, կարո՞ղ էիք հասկանալ, որ դրանց բաղկացուցիչ մասերը հենց այն մասերն են, որոնք ներկայացվել և հետազոտվել են դատարանում» Հրայր Թոփչյանի  պաշտպան, փաստաբան Գեորգի Մելիքյանի հարցին փորձագետը պատասխանեց՝ այո, քանի որ հիմնական մասերի վրա կան արտադրության համարներ: Մյուս դետալները փոփոխվող են եւ կրակման մեխանիզմի հետ կապ չունեն:

Ինչպե՞ս համոզվենք, որ այդ ինքնաձիգերը դատարան են հասել առանց փոփոխության հարցին հետևեց պատասխանը՝  եզրակացության մեջ կան լուսանկարներ, դրանում նշված են նաև հիմնական դետալների սերիական համարները:

Պաշտպանական կողմի արձանագրմամբ, փորձաքննության կատարելու ընթացքում  խախտումներ են տեղի ունեցել, դրանց թվում, մասնավորապես,   նշվեց փորձագետի կողմից փորձարարության ենթարկված 20 փամփուշտները նախաքննության մարմնին չվերադարձնելը:

Սասունիկ Կիրակոսյանի պաշտպան, փաստաբան Կարեն Հակոբյանը բարձրացրեց մի շարք ապացույցների անթույլատրելիության ու ոչ հավաստիության հարց: Ըստ պաշտպանի, ամբաստանյալ Թոփչյանը փաստացի եղել է կասկածյալի կարգավիճակում, երբ մինչև քրեական գործ հարուցելը զննության է ենթարկվել դեպքի վայր չհանդիսացող ստվարաթղթե արկղը, ինչի իրավասությունը զննություն կատարողները չեն ունեցել:  Պաշտպանը պարզաբանեց, որ արկղում ինքնաձիգերի ու փամփուշտների  հայտնաբերումը դրվել է նաև իր պաշտպանյալի մեղադրանքի հիմքում: Պաշտպանը միջնորդեց նաև անթույլատրելի ճանաչել  փորձագետի հիշյալ եզրակացությունն, իր պաշտպանյալին ճանաչման ներկայացնելու, դրանից բխող Սասունիկ Կիրակոսյանի ու Հովհաննես Պետրոսյանի առերես հարցաքննության արձանագրությունները: Ըստ Կ.Հակոբյանի, հիշյալ ապացույցները ձեռք են բերվել դատավարական խախտումներով, մասնավորապես, կասկածյալի ու մեղադրյալի պաշտպանական իրավունքի խախտմամբ:  

Նախաքննությունն անց է կացվել միակողմանի, թերի ու մակերեսային,  և խախտումներով ձեռք բերված փաստական տվյալները չեն կարող դրվել Սասունիկ Կիրակոսյանի մեղադրանքի հիմքում, եզրակացրեց Կարեն Հակոբյանը:

Ըստ մեղադրող կողմի, ստվարաթղթե արկղը հայտնաբերվել է Հրայր Թոփչյանի անձնական խուզարկության շրջանակում,  նա  հանցագործություն կատարելու հիմնավոր կասկածով բերման է ենթարկվել՝ ստվարաթղթե արկղի հետ միասին, ուստի որևէ խախտում առկա չէ:

Դատարանը հետաձգեց միջնորդության վերաբերյալ որոշում կայացնելը, դատարանը դրան կանդրադառնա խորհրդակցական սենյակում վերջնական դատական ակտ կայացնելիս:

Պաշտպան Արայիկ  Պապիկյանը միջնորդեց  մի շարք անձանց հրավիրել ու հարցաքննել որպես վկա, ըստ նրա, նրանց ցուցմունքներով հերքվում է մեղադրանքը:  Ըստ մեղադրող կողմի, նախաքննության ժամանակ հարցաքննված այս վկաները ըստ էության մեղադրանքը հիմնավորող կամ հերքող տվյալներ չեն հայտնել:

Բացի այդ, պաշտպանական կողմի առաջարկած անձանցից մեկը բազմաթիվ նիստերի ներկա է եղել, ուստի նրան հարցաքննելու դեպքում կխախտվի վկաներին իրարից անջատ հարցաքննելու կանոնը: Չի բացառվում նաև, ըստ մեղադրողի, որ մատնանշված այլ անձինք ևս ներկա գտնված լինեն դատական նիստերին:  Դատարանը մերժեց դատաքննությունը լրացնող այս միջնորդությունը՝ գտնելով, որ միջնորդությունը բավարար պատճառաբանված չէ, չի հստակեցվում, թե կոնկրետ գործի ինչ հանգամանքներ են ճշտվելու վկաների հարցաքննության միջոցով: Ի պատասխան Ա.Պապիկյանը հայտարարեց, որ իր պաշտպանական ճառում ինքն անդրադառնալու է այդ վկաների նախաքննական ցուցմունքներին:

Դատարանը մերժեց  նաև Սմբատ Գալոյանին դատարան հրավիրելու և հարցաքննելու Ա.Պապիկյանի միջնորդությունը: Պաշտպան Տիգրան Հայրապետյանն իր հերթին հավելեց, որ  Ս.Գալոյանը   ԱԱԾ գործակալ է, 2016թ. օգոստոս-սեպտեմբերին նա մոտեցել է Հիմնադիր խորհրդարանի շատ անդամների  և ասել, որ ունի 300 հոգուց կազմված խումբ և պատրաստ է հրահանգներ կատարել:

Ամբաստանյալ Հովհաննես Պետրոսյանի պաշտպան Արսեն Մկրտչյանը առարկեց միջնորդության դեմ, նշելով, որ հիշյալ անձը հարցաքննվել է դատարանում և իր գործընկերներն ու նրանց պաշտպանյալները կարող էին իրացնել հակընդդեմ հարցման իրենց իրավունքը:

Պաշտպանի այս հայտարարությունը վրդովեցրեց Ներսես Պողոսյանին, ով  հայտարարեց՝ մենք էլ ասում ենք հիմնավոր է, ամբաստանյալի ու պաշտպանի միջև   հնարավոր բախումը կանխվեց ոստիկանների կողմից, դատարանը նրանց երկուսի նկատմամբ էլ կիրառեց դատական սանկցիա՝ նախազգուշացում:

Դատարանը մերժեց  նաև  պաշտպան Տիգրան Հայրապետյանի միջնորդությունը ամբաստանյալ Հովհաննես Պետրոսյանի նկատմամբ դատահոգեբանական փորձաքննություն նշանակելու մասին:  Ըստ պաշտպանի, ամբաստանյալի նկատմամբ  հոգեբանական ճնշման հետևանք են Ժիրայր Սեֆիլյանի դեմ նրա տված ցուցմունքները:

Հաջորդ դատական նիստում  պաշտպանական կողմը կշարունակի ներկայացնել դատաքննությունը լրացնող միջնորդություններ:

Աղբյուր` Փաստինֆո