Փաստ ինֆո

Կաշառք ստանալու մեջ մեղադրվող Շենգավիթ վարչական շրջանի ընդհանուր իրավասության դատարանի դատավոր Իշխան Բարսեղյանի գործով պաշտպանական կողմը շարունակում է դատաքննությունը լրացնող միջնորդություններով հանդես գալ:

Մասնավորապես, ամբաստանյալի կարգավիճակ ունեցող դատավոր Իշխան Բարսեղյանը հայտարարեց և պնդեց, որ ենթադրյալ կաշառք ստանալու պահից հետո, երբ իրեն ձերբակալել են և ԱԱԾ-ի կողմից արձանագրություն է կազմվել, այդ արձանագրության տակ դրված ստորագրությունը իրեն չի պատկանում, կեղծ է: Ուստիև Բարսեղյանը միջնորդեց նշանակել դատաձեռագրաբանական փորձաքննություն, որը սակայն դատարանը մերժեց :

Պաշտպանական կողմի հաջորդ միջնորդությունը, որը կրկին մերժվեց դատարանի կողմից վերաբերում էր 5 անձի դատարան հրավիրելու և հարցաքննելուն, նրանցից  երեքը՝ ԱԱԾ ծառայողներ են, երկուսը՝ ընթերականեր:
Ընթերակաների վերաբերյալ պաշտպանական կողմը  կասկածի տակ է դնում այն հանգամանքը, թե նրանք մասնակցել են կաշառք տալու կամ կաշառք ստանալու նմանակում օպերատիվ հետախուզական գործողությանը, ինչ վերաբերում է ԱԱԾ ծառայողներին, ապա պաշտպանական կողմը գտնում է, որ օպերատիվ հետախուզական գործողությունը օրենքի խախտմամբ է կատարվել, միջոցառումը իրականացվել է և հետագայում արձանագրությունը կազմվել է օրենքով դրա թույլտվությունը չունեցող անձանց կողմից:

Միջնորդության վերաբերյալ դատախազ Կարեն Բիշարյանը կարծիք հայտնեց, որ միջնորդությունը ընդհանուր առմամբ պատճառաբանված չէ և ակնհայտ է դառնում, որ պաշտպանական կողմի գնահատմամբ որոշ գործողություններ ներկայացվել են որպես օրենքի խախտումներով կատարված: Բացի այդ էլ միջնորդությամբ չի ասվում կոնկրետ ինչ հանգամանք պարզելու համար է անհրաժեշտ այդ անձանց դատարան կանչել և հարցաքննելը:
Նշենք նաև, որ այսօր Իշխան Բարսեղյանը հրաժարվեց իր պաշտպան Լիանա Գրիգորյանից, պաշտպանական կողմը դատարանին տեղեկացրեց, որ օրերս իրենց հայտնի է դառել, որ Լիանա Գրիգորյանը արտերկիր է գնացել՝ մշտական բնակության:

Հաջորդ՝ հունվարի 25-ին կայանալիք դատական նիստում պաշտպանական կողմը հանդես կգա այլ միջնորդություններով:

Աղբյուր` Փաստինֆո