Փաստ ինֆո

«Սասնա ծռեր-1» գործով դատական նիստում դատարանն այսօր նորից ներգրավեց փաստաբաններ Արայիկ Պապիկյանին ու Արա Ղարագյոզյանին` որպես Արայիկ Խանդոյանի պաշտպաններ:

Պաշտպանները և արդեն նախկին այլ պաշտպաններ ևս մինչ ներգրավվելը դատական նիստին հետևում էին դիտորդի կարգավիճակում՝ դատարանի ու դատավարության մասնակիցներին բաժանող ապակուց այն կողմ:

Արայիկ Խանդոյանը հայտարարեց, որ իր պաշտպաններից հրաժարվել է միայն իր դահլիճում չգտնվելու ժամանակ: Դատարանը նորից հայտարարեց, որ պաշտպանից չեն հրաժարվում վերապահումներով ու նախապայմաններով: Ուստի Խանդոյանի պարագայում խոսք կարող է գնալ նորից պաշտպանների ներգրավման մասին՝ Խանդոյանն ավելի վաղ հրաժարվել է իր պաշտպաններից, ու դատարանն այդ հրաժարումն ընդունել է:

Փաստաբան Արայիկ Պապիկյանը նորից ներգրավվեց որպես Վարուժան Ավետիսյանի, իսկ Դավիթ Գյուրջյանը՝ որպես Սեդրակ Նազարյանի պաշտպան՝ նրա պաշտպաններ Լուսինե Սահակյանի ու Երվանդ Վարոսյանի հետ համատեղ:

Սմբատ Բարսեղյանը հայտարարեց, որ ինքը ցանկանում է, որպեսզի իր շահերը պաշտպանի միայն իր նախկին պաշտպանը՝ Հայկ Ալումյանը: Իսկ Մխիթար Ավետիսյանը հայտարարեց, որ քանի դեռ Արմեն Բիլյանն ու Սմբատ Բարսեղյանը չեն տեղափոխվել «Արմավիր» քրեակատարողական հիմնարկ, ինքը հրաժարվում է պաշտպանից:

«Նուբարաշեն» ՔԿՀ-ից «Արմավիր» ՔԿՀ Արմեն Բիլյանի տեղափոխման հարցին նորից անդրադարձավ նրա պաշտպան Արմինե Ֆանյանը: Ի պատասխան Քրեակատարողական վարչության պետի տեղակալի այն դիտարկմանը, թե առողջական վիճակի հետ կապված տեղափոխում հնարավոր է բուժական ուղղիչ հիմնարկ կամ քաղաքացիական հիվանդանոց, այլ ՔԿՀ տեղափոխում այդ հիմքով նախատեսված չէ, Արմինե Ֆանյանն ընդգծեց, որ ինքը տեղափոխման համար բարձրացրել է Արմեն Բիլյանի խցային անմարդկային պայմանների հետ կապված: Ուստի պաշտպանը պնդեց իր պաշտպանյալին այլ ՔԿՀ տեղափոխելու իր միջնորդությունը: Դատարանը հետաձգեց միջնորդության վերաբերյալ որոշում կայացնելը՝ մինչև դատական օրվա ավարտը:

Դատարանը դատավարության կողմերին տեղեկացրեց, որ Արմեն Բիլյանի խնդրանքով այսօր շտապօգնություն է հրավիրվել դատարան՝ բժիշկները հետազոտել են նաև Սմբատ Բարսեղյանին ու Արայիկ Խանդոյանին՝ վերջինս երկու օր առաջ վիրահատվել է:

Ինչպես «Փաստինֆո»-ի լրագրողին հայտնեց Արայիկ Խանդոյանի պաշտպան Արա Ղարագյոզյանը, իր պաշտպանյալը երիկամների վիրահատություն է տարել, ստենդ են տեղադրել երիկամներում:

Ըստ պաշտպանի, նշանակվել է դեղորայք, որը քրեակատարողական հիմնարկը չի ապահովում:

«Մեր միջոցով պետք է փորձենք գտնել և հանձնել Քրեակատարողական հիմնարկ՝ Արայիկ Խանդոյանին փոխանցելու համար»,- ասաց Արա Ղարագյոզյանը՝ նշելով, որ իր պաշտպանյալը հետվիրահատական շրջանում է գտնվում, ցավեր ունի:

«Ամեն դեպքում լավ կլիներ, որ նրան այսօր դատական նիստերի դահլիճ չբերեին, քանի որ, պատկերացրեք, երկու օր առաջ է կատարվել վիրահատությունը, երրորդ օրը բերել են դատարան, նա պետք է պառկած վիճակում գտնվեր»,- ասաց Արա Ղարագյոզյանը:

Այսօրվա դատական նիստը հետաձգվեց Արմեն Բիլյանի առողջական վիճակի պատճառով. քանի որ նա պետք է ներերակային ներակում ընդուներ, ուստի՝ այլ քրեակատարողական հիմնարկ նրա տեղափոխման միջնորդության վերաբերյալ դատարանը որոշում կընդունի արդեն հաջորդ դատական նիստում:

Աղբյուր` Փաստինֆո