Փաստ ինֆո

Արդեն հինգ օր է, ինչ հայտարարվել է խուլիգանության գործով նախաքննության ավարտի մասին, սակայն քննիչը մերժել է թղթային տարբերակով գործի նյութերը մեղադրյալներին տրամադրելու պաշտպանական կողմի միջնորդությունը: Ինչպես «Փաստինֆո»-ի լրագրողի հետ զրույցում հայտնեց գործով մեղադրյալներից երկուսի պաշտպան, «Նոր սերունդ» ՀԿ փաստաբան Արա Ղարագյոզյանը, քննիչը յուրովի է մեկնաբանել Քրեական դատավարության օրենսգիրքը՝ նշելով, որ գործի նյութեր անվճար տրամադրել չի նշանակում թղթային տարբերակը տրամադրել:

«Մենք միջնորդության մեջ նշել էինք, որ համակարգչային տեխնիկա չունենք, ես չեմ կարող նյութերը տանել «Նուբարաշեն» ՔԿՀ, որպեսզի պաշտպանյալներս ծանոթանան դրանց: Քննիչը մեզ գրավոր պատասխանել է, որ ինքը դիմել է «Նուբարաշեն» քրեակատարողական հիմնարկին համակարգչով ապահովելու խնդրանքով, ՔԿՀ-ն էլ պատասխանել է, որ իրենց լիազորություններից դուրս է համակարգիչ տրամադրելը, այսինքն՝ ՔԿ Կենտրոն և Նորք-Մարաշ բաժնի քննիչ Մխիթարյանը փաստացի խոչընդոտում է ծանր հանցագործության մեջ մեղադվող իմ պաշտպանյալներին իրենց վերաբերյալ քրեական գործի նյութերին ծանոթանալու իրավունքին»,- ասաց Արա Ղարագյոզյանը՝ հայտարարելով, որ քննիչը կամայական որոշում է կայացրել՝ խոչընդոտելով պաշտպանական իրավունքի իրացմանը:

Պաշտպանը հայտնեց նաև, որ բողոք է ներկայացրել Գլխավոր դատախազին, Երևանի դատախազին և ՀՀ քննչական կոմիտեի նախագահին, բողոքում ներառված է նաև հիշյալ խնդիրը:

Աղբյուր` Փաստինֆո