Փաստ ինֆո

Նուբարաշենի խճուղում դաժան ծեծի հետևանքով սպանված 58-ամյա Եղիշե Խաչատրյանի գործով այսօրվա դատական նիստը հետաձգվեց՝ ամբաստանյալ Արտաշես Չիչոյանի պաշտպանների բացակայության պատճառով:

Ամբաստանյալ Արտաշես Չիչոյանի պաշտպան Միհրան Պողոսյանի կողմից գրություն էր ստացվել դատարան, որով պաշտպանը հայտնել էր, որ քննիչի կողմից ծանուցագիր է ստացել առ այն, որ «Արթիկ» ՔԿՀ-ում անհետաձգելի քննչական գործողության պետք է մասնակցի, ուստիև՝ չի կարող ներկայանալ դատական նիստին:

Ինչ վերաբերում է ամբաստանյալի մյուս պաշտպան Երեմ Սարգսյանին, ապա դատական նիստին պաշտպանի չներկայանալու վերաբերյալ որևէ պատճառ դատարանին և ամբաստանյալին հայտնի չէր:

Դատարանը հայտարարեց, որ պաշտպան Երեմ Սարգսյանը 3-րդ դատական նիստն է՝ չի ներկայանում դատարան, և չներկայանալու պատճառների մասին դատարանին որևէ տեղեկություն հայտնի չէ, հաջորդ դատական նիստին ամբաստանյալ Արտաշես Չիչոյանի պաշտպանների չներկայանալու դեպքում դատարանը կքննարկի ամբաստանյալին պաշտպանով ապահովելու հարցը:

Հիշեցնենք, որ նախորդ նիստում Արտաշես Չիչոյանի պաշտպան Միհրան Պողոսյանը դատարանին խնդրել էր իրեն ժամանակ տրամադրել՝ դատարանին ինքնաբացարկ հայտնելու վերաբերյալ միջնորդություն ներկայացնելու, ինչպես նաև՝ տուժող Էմմա Աբրահամյանի նախաքննական և դատաքննական ցուցմունքներում առկա հակասությունները վեր հանելու և դատարանին ներկայացնելու համար:

Ըստ մեղադրանքի՝ 2016թ. հունիսի 4-ին՝ ժամը 22:30-ի սահմաններում, ՀՀ արդարադատության նախարարության դատական ակտերի հարկադիր կատարումն ապահովող ծառայության Երևան քաղաքի Կենտրոն և Նորք-Մարաշ բաժնի հարկադիր կատարող Խաչիկ Կոսյանը, աներորդին՝ Արտաշես Չիչոյանը, ընկերները՝ Արարատ Նիկողոսյանը, Արթուր Զաքարյանը և Յուրի Հակոբյանը, Երևան քաղաքի Նուբարաշենի խճուղի 5/1 հասցեի մոտակայքում Եղիշե Խաչատրյանին կյանքից զրկելու միասնական դիտավորությամբ, խուլիգանական դրդումներով, գիտակցելով մեկը մյուսի գործողությունները և մեկը մյուսի գործողությունները լրացնելով, խմբով, ձեռքերով և ոտքերով անկանոն հարվածներ են հասցրել վերջինիս կենսական կարևոր նշանակություն ունեցող մարմնի տարբեր մասերի` գլխի, կրծքավանդակի ու որովայնի շրջաններում, պատճառել կյանքի հետ անհամատեղելի մարմնական վնասվածքներ և ապօրինաբար Եղիշե Խաչատրյանին դիտավորությամբ զրկել են կյանքից:

Բացի այդ, քննությամբ հիմնավորվել է, որ Արտաշես Չիչոյանը, Արարատ Նիկողոսյանը, Խաչիկ Կոսյանը, Յուրի Հակոբյանը, Արթուր Զաքարյանը և ինքնությունը դեռևս չպարզված անձը, խախտելով հասարակական կարգը և իրենց գործողությունները զուգորդելով փողոցով երթևեկող վարորդների, ուղևորների և հավաքված բազմության նկատմամբ բացահայտ անհարգալից վերաբերմունքով, խմբով կատարել են խուլիգանություն:

Մասնավորապես, հիշյալ անձինք տևական ժամանակ հայհոյանքներ են հնչեցրել և ֆիզիկական բիրտ ուժի ցուցադրմամբ սպառնալիք ստեղծել ու տագնապ առաջացրել հավաքվածների շրջանում:

Այդ ընթացքում անտեսելով Եղիշե Խաչատրյանի տարեց մոր՝ որդուն չհարվածելու վերաբերյալ աղերսանքը՝ հրել են նրան, գցել գետնին, ապա ոտքերով հարվածներ հասցրել որդուն փրկելու համար քաշքշուկի մեջ նետված 75-ամյա Էմմա Աբրահամյանին՝ վերջինիս առողջությանը պատճառելով միջին ծանրության վնաս:

Խաչիկ Կոսյանին, Արտաշես Չիչոյանի, Արարատ Նիկողոսյանին, Արթուր Զաքարյանին և Յուրի Հակոբյանին մեղադրանք է առաջադրվել ՀՀ քրեական օրենսգրքի 104–րդ հոդվածի 2-րդ մասի 7-րդ և 10-րդ կետերով և 258-րդ հոդվածի 3-րդ մասի 1-ին և 4-րդ կետերով:

Նրանց բոլորի նկատմամբ որպես խափանման միջոց է կիրառվել կալանավորումը:

Աղբյուր` Փաստինֆո