Փաստ ինֆո

Լեռնային Ղարաբաղում 2016 թվականի ապրիլյան դեպքերից հետո հակամարտության կարգավորման գործում առկա փոքր վստահությունը խարխլվեց: Ինչպես հաղորդում է «Արմենպրես»-ը, այս մասին հարցազրույցում հայտնել է Հարավային Կովկասում ԵԱՀԿ գործող նախագահի հատուկ ներկայացուցիչ Գյունտեր Բեհլերը:

«Հետաքրքրական է այն, որ Լեռնային Ղարաբաղի հակամարտության հարցում սեղանին ունենք վերջնական կարգավիճակի մասին որոշ սկզբունքներ, սակայն չունենք իրական բանակցային ճարտարապետություն»,- նշել է նա:

Գյունտեր Բեհլերը կարևոր և ինչ-որ առումով նաև քաջալերող է անվանել 2017թ. հոկտեմբերի 16-ին Ժնևում Հայաստանի և Ադրբեջանի նախագահների հանդիպումը՝ ընդգծելով, սակայն, որ միայն նախագահների երկկողմ հանդիպումը ավտոմատ կերպով չի վերականգնի բանակցային գործընթացը:

«2014 թվականին ԵԱՀԿ-ում Շվեյցարիայի նախագահությունը կառուցվածքային բանակցային գործընթացի վերաբերյալ մշակել էր ոչ պաշտոնական փաստաթուղթ՝ բոլոր տարրերով ու լայնամասշտաբ բանակցային գործընթացի համար բոլոր մանրամասներով: Մենք այն շարունակաբար ներկայացրել ենք հաջորդ նախագահողներին և ներգրավված անձանց, գուցե մի օր այն օգտագործվի:

ԵԱՀԿ-ում Գերմանիայի նախագահության շրջանում մենք բավական ժամանակ անցկացրինք նախ և առաջ զարգացնելու ԵԱՀԿ գործող նախագահի անձնական ներկայացուցչի մոնիթորինգային առաքելությունն ուժեղացնելու գաղափարը:

Սանկտ Պետերբուրգում նախագահների միջև կար համաձայնություն, որը, սակայն, դեռևս կյանքի չի կոչվել: Շփման գծում և Հայաստանի ու Ադրբեջանի պետական սահմանին շատ փոքր խումբ է դիտորդական առաքելություն իրականացնում. մենք խոսում ենք միջազգային անձնակազմը 6-ից 13-ի ավելացնելու մասին»,- նշել է ԵԱՀԿ գործող նախագահի հատուկ ներկայացուցիչը:

Նա ընդգծել է, որ արդեն 2017 թվականին ԵԱՀԿ-ում Ավստրիայի նախագահությունն ավելի է զարգացրել տվյալ կոնցեպտը և վերջերս այս հարցում որոշակի տեղաշարժ է գրանցվել, ուստի 2018 թվականին դրանց կիրառման հեռանկարներն իրատեսական են թվում:

«Միևնույն ժամանակ մենք մշակել ենք ոչ պաշտոնական փաստաթուղթ հրադադարի ռեժիմի խախտումների հետաքննության վերաբերյալ՝ վստահություն կառուցող ևս մեկ միջոց, որը պետք է կիրառվի»,- ասել է Գյունտեր Բեհլերը:

Աղբյուր` Փաստինֆո