Փաստ ինֆո

«Սասնա ծռեր» խմբի անդամ Հովհաննես Հարությունյանի պաշտպան Հայարփի Սարգսյանն այսօր բողոք է ներկայացրել Երևանի Կենտրոն և Նորք-Մարաշ վարչական շրջանների դատարան՝ ՀՀ գլխավոր դատախազի անգործության դեմ: Այս մասին «Փաստինֆո»-ին հայտնեց փաստաբան Հայարփի Սարգսյանը՝ պարզաբանելով, որ դեռևս 2017թ. դեկտեմբերի 11-ին ինքը ներկայացրել է հաղորդում հանցագործության մասին՝ կապված Հովհաննես Հարությունյանի նկատմամբ դրսևորվող վերաբերմունքի և նրա կյանքին ու առողջությանը սպառնացող վտանգի հետ, սակայն մինչ օրս Գլխավոր դատախազությունից որևէ արձագանք, որևէ պատասխան չի ստացել:

Գլխավոր դատախազին ուղղված հիշյալ հաղորդմանը նախորդել էր նույն հիմքով ևս մեկ հաղորդում, որը ներկայացվել է 2016թ. դեկտեմբերի 12-ին, այդ հաղորդումը նույնպես անտեսվել է:

Հայարփի Սարգսյանը հիշեցրեց, որ մեկուկես տարվա ընթացքում ինքը միջնորդություններ է ներկայացրել իր պաշտպանյալի կյանքի ու առողջության հետ կապված, որպեսզի նա տեղափոխվի քաղաքացիական հիվանդանոց և «մարդկային պայմաններում բուժում ստանա», ինչն անտեսվել է իրավասու մարմինների ղեկավարների կողմից, այդ իսկ պատճառով հաղորդումը ներկայացվել է արդարադատության նախկին և ներկայիս նախարարների և Քրեակատարողական վարչության պետի կողմից դրսևորված պաշտոնեական դիրքի չարաշահման հիմքով:

Լուսանկարում՝ փաստաբան Հայարփի Սարգսյանն է

Աղբյուր` Փաստինֆո