Փաստ ինֆո

ՀՀ պաշտպանության նախարար Վիգեն Սարգսյանը հունվարի 10-ին ՊՆ վարչական համալիրում հյուրընկալել է Տավուշի մարզի զոհված զինծառայողների ընտանիքների անդամներին` զինծառայողների այրիներին և մինչև 18 տարեկան երեխաներին:Այս մասին տեղեկացանք՝ ՀՀ ՊՆ Տեղեկատվության և հասարակայնության հետ կապերի վարչությունից:

Արդեն երկու տարի է Հայ Առաքելական եկեղեցու Տավուշի թեմի նախաձեռնությամբ և բարերար Կարո Առաքելյանի հովանավորությամբ Տավուշի մարզի զոհված զինծառայողների մինչև 18 տարեկան երեխաների համար ամանորյա տոներից հետո Երևանում կազմակերպվում է երկօրյա ճանաչողական ծրագիր, որի շրջանակում երեխաներն այցելում են թանգարաններ, եկեղեցիներ և թատրոններ:        

Շնորհակալություն հայտնելով նախաձեռնության համար, Վիգեն Սարգսյանը շեշտել է, որ պաշտպանության նախարարությունը միշտ ուշադրության կենտրոնում է պահում զոհվածների ընտանիքների խնդիրները: «Մենք գիտենք, որ երբեք չենք վերադարձնի ձեր օջախի ամենամեծ ու ամենակարևոր բանը` ձեր ծնողների, ամուսինների ներկայությունը: Միակ սփոփանքը, թերևս, այն է, որ ձեզ հետ միասին ժողովուրդն էլ է ապրում այդ ցավը, կիսում կորուստը: Դուք բոլորից լավ գիտեք` ինչ է նշանակում սահման, ինչ է նշանակում հայրենիքի պաշտպանություն: Իսկ ձեզ, սիրելի՛ բալիկներ, ուզում եմ խնդրել, որ շատ լավ սովորեք, որովհետև դա ամենամեծ պարտականությունն է ձեր հայրերի հիշատակի հանդեպ: Հավատացե՛ք, նրանք ընդամենը երկու բան կուզեն, որ դուք առողջ լինեք և լավ սովորեք, որ կարողանաք ամուր կանգնել ձեր ոտքերի վրա»,- ասել է Վիգեն Սարգսյանը:

ՀՀ պաշտպանության նախարարը հանդիպման ընթացքում ներկայացրել է նաև ՀՀ ՊՆ Մոնթե Մելքոնյան ռազմամարզական վարժարանի կրթական ծրագրերը` առաջարկելով առաջիկայում կազմակերպել երեխաների այց վարժարան:

Հանդիպման ավարտին, շնորհակալություն հայտնելով նախաձեռնությանն աջակցելու համար, ՀՀ պաշտպանության նախարարը բարերար Կարո Առաքելյանին պարգևատրել է Մարշալ Բաղրամյանի 120-ամյակին նվիրված հատուկ հուշամեդալով:

Աղբյուր` Փաստինֆո