Փաստ ինֆո

Մոր և որդու կողմից ավազակությամբ սպանության վերաբերյալ գործով այսօրվա դատական նիստում սկսվեց ամբաստանյալների հարցաքննության փուլը: Սակայն որդին՝ Արշակ Ժամկոչյանը, հայտարարեց, որ լրագրողների ներկայությամբ ոչինչ չի խոսելու: Ըստ ամբաստանյալի, լրագրողները գրում են, հետո «ֆեյսբուքներ գցում»:

Ամբաստանյալի պաշտպանը հայտարարեց, որ դա իր պաշտպանյալի սուբյեկտիվ կարծիքն է, իսկ մեղադրողը նշեց, որ ամբաստանյալն իր միջնորդությունը չպատճառաբանեց:

Դատարանը պարզաբանեց, որ լրագրողները ներկա չեն կարող լինել դատական նիստում միայն դռնփակ դատական նիստի պարագայում և որ դատարանում պետք է հանրային վերահսկողություն լինի: Չի կարելի դատարանի հետ պայմաններով խոսել, ասաց դատարանը: Այնուամենայնիվ դատարանն անձնական կյանքի հետ կապված լինելու պատճառաբանությամբ ու գործի քննության շահերից ելնելով որոշեց ամբաստանյալի հարցաքննությունն անցկացնել դռնփակ:

Ըստ մայր ու որդի Ժամկոչյաններին առաջադրված մեղադրանքի, նրանք ուրիշի գույքը գաղտնի հափշտակելու դիտավորությամբ, իսկ տանտիրոջ կողմից նկատվելու դեպքում այն ավազակային հարձակմամբ ավարտին հասցնելու դիտավորությամբ, նախապես որոշված դերաբաշխմամբ, նախնական համաձայնությամբ, 2016թ. փետրվարի 20-ին՝ ժամը 00.30-ի սահմաններում գնացել են իրենց ծանոթի բնակարան, որտեղ մայր ու որդի օգտագործել են ոգելից խմիչք, ընթրել:

Ըստ մեղադրանքի, Արշակ Ժամկոչյանը ծանոթի կյանքի և առողջության համար վտանգավոր բռնություն գործադրելով՝ հարվածել է նրա ծոծրակին և պարանոցից բռնած տարել զուգարան ու 3 անգամ ուժգին հարվածել գլխին: Արշակ Ժամկոչյանի կողմից տղամարդուն զուգարանում պահելու հանգամանքից օգտվելով՝ Սրբուհի Ժամկոչյանը հափշտակել է տարբեր իրեր, իսկ որդին տուժողին թողնելով անօգնական վիճակում, անջատել է զուգարանի լույսը, մտել հյուրասենյակ հափշտակել մազ կտրելու էլ. սարք և հեռացել: Վերջինիս կողմից տղամարդուն պատճառած վնասվածքներից տղամարդը 20.02.2016թ. գիտակցության չգալով՝ մահացել է:

Աղբյուր` Փաստինֆո