Փաստ ինֆո

Էրեբունի և Նուբարաշեն վարչական շրջանների քննչական բաժնի ավագ քննիչ Միքայել Զադոյանի և փաստաբան Գայանե Գալոյանի գործով այսօր կայացավ առաջ դատական նիստը:

Առանձնապես խոշոր չափերով կաշառք ստանալու, կաշառքի միջնորդության և կաշառք տալու գործով մեղադրյալի կարգավիճակ ունեցող փաստաբան Գայանե Գալոյանը հրաժարվեց իր 5 պաշտպաններից և խնդրեց իրեն հանրային պաշտպանով ապահովել:

Գալոյանի հայտարարության համաձայն՝ դեռևս նախաքննության փուլից սկսած գործընկներ փաստաբաններն անվճար իրականացրել են իր պաշտպանությունը, բայց քանի որ ինքը վճարունակ չէ և «Աբովյան» ՔԿՀ հասնելն այդքան հեշտ չէ, ուստիև՝ խնդրեց իրեն ապահովել հանրային պաշտպանով՝ ասելով՝ «ավելորդ բեռ եմ դարձել նրանց համար»:

Դատարանը՝ նախագահությամբ դատավոր Մեսրոպ Մակյանի, կդիմի հանրային պաշտպանի գրասենյակ՝ ամբաստանյալին պաշտպանով ապահովելու համար:

Նշենք, որ այսօրվա նիստին չէր ներկայացել նաև ամբաստանյալ Բաբկեն Գասպարյանի պաշտպանը. ըստ ամբաստանյալի՝ փաստաբան Սիրանուշ Հարությունյանը չի ծանուցվել նիստի օրվա մասին և այդ պատճառով չի ներկայացել:

Դատարանը նաև ճշտեց ամբաստանյալների ինքնությունը. ավագ քննիչ Զադոյանը խնամքին ունի երկու մանկահասակ երեխա և ծնողներ:

Գործով ամբաստանյալ Բաբկեն Գասպարյանն էլ հայտարարեց, որ ունի առողջական խնդիրներ՝ սիրտը վիրահատված է:

Ինչ վերաբերում է փաստաբան Գայանե Գալոյանին, ապա նրա առողջական վիճակի մասին նախկինում ևս անդրադարձել էինք, և վերջերս նրա նկատմամաբ հանձնաժողովային դատաբժշկական փորձաքննություն էր նշանակվել, սակայն պատասխանների մասին դեռևս տեղեկություններ չկան:

Նման պայմաններում դատական նիստը հետաձգվեց և նշանակվեց հունվարի 22-ին:

Այսպես, ըստ մեղադրանքի՝ Բաբկեն Գասպարյանը ՀՀ քննչական կոմիտեի Էրեբունի և Նուբարաշեն վարչական շրջանների քննչական բաժնում ՀՀ քրեական օրենսգրքի 112-րդ հոդվածի հատկանիշներով հարուցված և քննվող քրեական գործով որդու՝ Սոս Գասպարյանի օգտին իրենց լիազորությունների շրջանակում գործողություններ կատարելու դիմաց, նշված քննչական բաժնի ավագ քննիչ Միքայել Զադոյանին և բաժնի պետի տեղակալ Բունիաթ Եղիազարյանին՝ ՀՀ Փաստաբանների պալատի փաստաբան Գայանե Գալոյանի օժանդակությամբ և միջոցով տվել է առանձնապես խոշոր չափերով կաշառք:

Ըստ Գայանե Գալոյանին առաջադրված մեղադրանքի՝ նա օժանդակել է Սոս Գասպարյանի օգտին իրենց լիազորությունների շրջանակում գործողություններ կատարելու դիմաց նախնական համաձայնությամբ առանձնապես խոշոր չափերով կաշառք ստացող վերը նշված քննչական բաժնի ավագ քննիչ Միքայել Զադոյանին և նույն բաժնի պետի տեղակալ Բունիաթ Եղիազարյանին:
Միքայել Զադոյանին էլ մեղադրանք է առաջադրվել իր վարույթում քննվող քրեական գործով նույն բաժնի պետի տեղակալ Բունիաթ Եղիազարյանի հետ նախնական համաձայնությամբ Բաբկեն Գասպարյանի որդու՝ Սոս Գասպարյանի օգտին իրենց լիազորությունների շրջանակում գործողություններ կատարելու դիմաց ՀՀ Փաստաբանների պալատի փաստաբան Գայանե Գալոյանի օժանդակությամբ և միջոցով Բաբկեն Գասպարյանից ստացել են առանձնապես խոշոր չափերով կաշառք:

Խոսքը գնում է 3000 ԱՄՆ դոլար կաշառքի մասին:

Միքայել Զադոյանին մեղադրանք է առաջադրվել 311-րդ հոդվածի 4-րդ մասի 2-րդ կետով, Գայանե Գալոյանին՝ 38-311-րդ հոդվածի 4-րդ մասի 2-րդ կետով, իսկ Բաբկեն Գասպարյանին՝ 312-րդ հոդվածի 3-րդ մասի 1ին կետով:

Միքայել Զադոյանի և Գայանե Գալոյանի նկատմամբ որպես խափանման միջոց է ընտրվել կալանավորումը, իսկ Գասպարյանի նկատմամբ՝ չհեռանալու մասին ստորագրությունը:
Նշենք նաև, որ բաժնի պետի տեղակալ Բունիաթ Եղիազարյանին ևս մեղադրանք է առաջադրվել 311-րդ հոդվածի 4-րդ մասի 2-րդ կետով, սակայն գործով նրա մասն անջատվել է և դեռևս նախաքննություն է ընթանում:

Քննչական բաժնի պետի տեղակալի նկատմամբ դատարանը որպես խափանման միջոց է ընտրել չհեռանալու մասին ստորագրությունը:

Աղբյուր` Փաստինֆո