Փաստ ինֆո

Կուբացի մոր ու դստեր վերաբերյալ երկու դրվագով առանձնապես խոշոր չափերի խարդախության գործով այսօրվա դատական նիստը տեղի չունեցավ՝ մեղադրողի՝ հերթական արձակուրդում գտվելու պատճառով:

Դատարանը նաև պաշտպանական կողմին տեղեկացրեց, որ քանի որ ամբաստանյալները չեն տիրապետում դատավարության լեզվին՝ հայերենին, ուստի՝ դատարանը դիմել է Դատական դեպարտամենտին հայերենից իսպաներեն և իսպաներենից հայերեն թարգմանչով ապահովելու խնդրանքով, առայժմ այդ առնչությամբ որևէ տեղեկատվության դատարանը չի տիրապետում: Դատարանը հույս հայտնեց, որ մինչև հաջորդ դատական նիստը թարգմանչի հարցը կորոշակիանա:

Դատարանի տեղեկություններով, երեք տուժողից երկուսը Հայաստանում չեն, ուստի մինչև հաջորդ դատական նիստը դատարանը հարցում կուղարկի ՍԵԿՏ համակարգով՝ ստուգելու արդյոք երկու տուժողները Հայաստանո՞ւմ են, թե՝ ոչ, իսկ երրորդ տուժողին ծանուցում կուղարկվի հաջորդ դատական նիստի մասին:

ՀՀ քննչական կոմիտեն ավելի վաղ տեղեկացրել էր, որ քննությամբ պարզվել են կուբացիներից մշտական բնակության նպատակով Հայաստանի տարածքով ԱՄՆ մեկնումը կազմակերպելու պատրվակով առանձնապես խոշոր չափերի գումարի հափշտակությանը մասնակցություն ունեցած անձանց շրջանակը, ովքեր նույնպես Կուբայի քաղաքացիներ են: Երկու անձի առաջադրվել է մեղադրանք, ևս մեկի նկատմամբ հայտարարվել հետախուզում:

Ըստ ՔԿ պաշտոնական հաղորդագրության, Երևանում գտնվող Կուբայի քաղաքացի Ռոդրիգես Գոմեսսը 2016 թվականին գրավոր հաղորդում է ներկայացրել ՀՀ իրավապահ մարմիններին առ այն, որ իր ընտանիքի անդամների՝ ընդհանուր առմամբ 6 հոգու՝ ԱՄՆ-ում մշտական բնակության հարցը կազմակերպելու նպատակով իրենից վերցրել են առանձնապես խոշոր չափերի գումար, սակայն մեկնումը չեն կազմակերպել և ոչ էլ գումարն են վերադարձրել։

Կուբացիները կուբացիներին խոստացել են Հայաստանի տարածքով կազմակերպել նրանց մեկնումը ԱՄՆ և խաբեությամբ հափշտակել առանձնապես խոշոր չափերի գումար

Նախաննությամբ փաստական տվյալներ էին ձեռք բերվել, որ 1962թ. ծնված կուբացի կինը մշտական բնակության նպատակով ԱՄՆ մեկնել ցանկացող իր համերկրացիներին խաբեությամբ համոզել է, թե կարող է կազմակերպել նրանց մեկնումը Հայաստանի տարածքով։ Ձեռք բերված պայմանավորվածության համաձայն՝ Գոմեսսի ընտանիքի անդամները՝ 6 անձ, Հավանա-Մոսկվա-Երևան չվերթով ժամանել են Հայաստան, որտեղ նրանց դիմավորել են կուբացի կնոջ դուստրը և փեսան, ապահովել նրանց ժամանակավոր բնակավայրով՝ խոստանալով կարճ ժամանակահատվածում կազմակերպել նրանց՝ ԱՄՆ մեկնումը: Անհրաժեշտ փաստաթղթերը ձևակերպելու պատրվակով ընտանիքից վերցրել են առանձնապես խոշոր չափերի գումար՝ 36.300 ԱՄՆ դոլար և 2.000 եվրո, ինչը խաբեությամբ հափշտակվել է. ընտանիքը ԱՄՆ մեկնելու թույլտվություն չի ստացել և ոչ էլ գումարն է վերադարձվել։

Քննությամբ պարզվել է, որ նշված անձանց գործողություններից տուժել է կուբացի մեկ այլ ընտանիք ևս, որի մշտական բնակության նպատակով ԱՄՆ մեկնումը կազմակերպելու համար նույն մեխանիզմով հափշտակվել է 24.920 ԱՄՆ դոլար գումար:

Կնոջը և նրա դստերը մեղադրանք է առաջադրվել՝ ՀՀ քրեական օրենսգրքի 178-րդ հոդվածի 3-րդ մասի 1-ին կետով (երկու դրվագ), իսկ փեսայի նկատմամբ նույն մեղադրանքներով հայտարարվել է հետախուզում։

Ըստ ՔԿ հաղորդագրության, նախաքննության ընթացքում ՌԴ իրավապահ մարմիններից ստացվել է տեղեկություն առ այն, որ հետախուզվող կուբացի տղամարդը հայտնաբերվել է Ռուսաստանի տարածքում և նրա հանձնման հարցը քննարկելու նպատակով համապատասխան փաստաթղթերն ուղարկվել են ՌԴ իրավապահ մարմիններին։

Աղբյուր` Փաստինֆո