Փաստ ինֆո

Ռոսպոտրեբնադզորը թվարկել է թունավորվելու տեսանկյունից ամանորյա սեղանի առավել վտանգավոր ուտեստները: Ըստ ՌԻԱ Նովոստիի, համապատասխան հաղորդագրությունը տեղադրված է գերատեսչության կայքէջում:

«Վարակի առաջացման առավել վտանգավոր սննդամթերք են հանդիսանում բազմաբաղադրիչ աղցանները (առաջին հերթին մայոնեզով ու թթվասերով պատրաստված), կրեմով հրուշակեղենը, շաուրման, աղացած մսից մթերքը՝ կոտլետներ, ռուլետներ, պաշտետներ, դոնդող և այլն: Վատ լվացված միրգ-բանջարեղենի մակերեսին կարող են մնալ վարակիչ, մասնավորապես, վիրուսային վարակիչ հիվանդությունների հարուցիչներ»,- ասվում է հաղորդագրության մեջ:
Մթերքի հետ կարող է փոխանցվել սալմոնելյոզի, կամպիլոբակտերիոզի, իերսինիոզի, դիզենտերիայի, նորովիրուսային ու ռոտավիրուսային վարակների, վիրուսային հեպատիտ А-ի և այլ հիվանդությունների հարուցիչներ:

Բացի այդ, մեծ տեսակարար կշիռ են կազմում սննդային տոքսիկովարակները, երբ որ մթերքի մեջ կամ ուտեստներում կուտակվում են զանազան միկրոօրգանիզմների տոքսիններ: Սննդի միջոցով փոխանցվող սննդային թունավորումների ու վարակիչ հիվանդությունների պատճառներն են ուտեստների պատրաստման տեխնոլոգիայի խախտումները, ոչ ճիշտ պահպանումը, խոհարարների ու հրուշագործների կողմից անձնական հիգիենայի կանոնները չպահպանելը, հաղորդում է գերատեսչությունը:

«Տոնական օրերին չհիվանդանալու համար խորհուրդ ենք տալիս աղցաններ, աղացած մսով ուտեստներ, դոնդող պատրաստել տնային պայմաններում և ոչ մեծ քանակությամբ, որպեսզի մնացորդները չպահվեն մեկ օրից ավելի: Եթե դուք այնուամենայնիվ սնունդ եք ձեռք բերում խանութից, ուշադրություն դարձրեք դրա պատրաստման ու գործածության ժամկետների վրա: Կիսաֆաբրիկատները, մսից ուտեստները անպայման ենթարկեք կրկնակի տերմոմշակման: Կրեմով հրուշակեղենը անհրաժեշտ է պահել սառնարանում և չմոռանալ, որ դրանք արագ փչացող սննդամթերք են»,- նախազգուշացնում է Ռոսպոտրեբնադզորը:

Բացի այդ, գերատեսչությունում հիշեցնում են, որ հում մթերքի պատրաստելուց առաջ և դրա հետ շփումից հետո անհրաժեշտ է լվանալ ձեռքերը, նաև առանձին սնունդ կտրատելու տախտակներ ու դանակներ օգտագործել հում և պատրաստի սննդի համար, մանրակրկիտ լվանալ՝ եռման ջրով մշակելով, կանաչին, մրգերն ու բանջարեղենը, մեկ օրից ավելի շուտ չպատրաստել աղացած միսը, աշխատեք սառնարանի նույն դարակում չտեղադրել պատրաստի ուտեստներն ու հում միսն ու ձուկը:

«Եթե դուք ձեզ վատառողջ զգաք (հատկապես մարսողության խանգարման, սրտխառնոցի, որովայնում ցավի դեպքում) ոչ մի դեպքում մի զբաղվեք ընտանիքի ու հյուրերի համար սնունդ պատրաստելով: Հիվանդանալու դեպքում անմիջապես դիմեք բժշկական օգնության»,- կոչ է անում գերատեսչությունը:

Աղբյուր` Փաստինֆո