Փաստ ինֆո

Հրազդանի քաղաքապետի որդու մասնակցությամբ մահվան ելքով ավտովթարի դեպքով 4 փորձաքննություն է նշանակվել, որոնցից երեքով փորձագետները դժվարացել են ասել վարորդի կողմից խախտում կա՞, թե՝ ոչ:

«Փաստինֆո»-ն Քննչական կոմիտեից տեղեկացավ, որ գործով 4 անգամ դատաավտոտեխնիկական փորձաքննություն է նշանակվել, քանի որ փորձագետները պատճառաբանել են, թե տվյալները բավարար չեն, ուստիև՝ իրենք չեն կարող ասել վարորդի կողմից խախտում կա՞, թե՝ ոչ:

Առաջին երեք փորձաքննությունների կատարումը հանձնարարվել է տարբեր փորձագիտական կենտրոններին, որոնք պատասխան , ըստ էության չեն տվել։ Իսկ չորրորդ անգամ նշանակվել է հանձնաժողովային դատաավտոտեխնիկական փորձաքննություն, որի կատարումը հանձնարարվել է նախորդ եզրակացությունները տված բոլոր երեք կազմակերպությունների փորձագետներին:

ՔԿ-ից հայտնեցին, որ դեկտեմբերի 25-ին ստացվել է եզրակացությունը, ըստ որի՝ փորձագետները փաստել են, որ նշված պայմաններում վարորդ վրաերթը կանխելու տեխնիկական հնարավորություն չի ունեցել և տվյալ իրադրությունում ՃԵԿ-ին հակասող գործողություններ թույլ չի տվել:

Հիշեցնենք, որ հունիսի 8-ին Հրազդանի քաղաքապետարանին պատկանող «Նիսսան Տիանա» մակնիշի, 444 LL 70 համարանիշի ավտոմեքենան, որն սպասարկում է Հրազդանի քաղաքապետ Արամ Դանիելյանին, նախկին կաթի գործարանի մոտ, վրաերթի է ենթարկել ճանապարհը հատող հետիոտն, նույն քաղաքի բնակիչ, 1959թ. ծնված Վալերի Թորոսյանին։ Վերջինս մարմնական վնասվածքներով տեղափոխվել է «Հրազդան ԲԿ» ՓԲԸ, որտեղ էլ գիտակցության չգալով մահացել է:

Դեպքից հետո վարույթն իրականացնող մարմնին էր ներկայացել Հրազդան քաղաքի բնակիչ, 1985թ. ծնված մի տղամարդ և հայտարարել, թե վրաերթ կատարելու պահին նշված ավտոմեքենայի ղեկին գտնվել է ինքը, սակայն քրեական գործի նախաքննությամբ փաստական տվյալներ են ձեռք բերվել, որ ղեկին գտնվել է 16 տարեկան պատանի։

Պատանին էլ պարզվեց Հրազդանի քաղաքապետի որդին է ում մեղադրանք է առաջադրվել ՀՀ քրեական օրենսգրքի 242-րդ հոդվածի 2-րդ մասով (Ճանապարհային երթևեկության և տրանսպորտային միջոցների շահագործման կանոնները խախտելը, որն անզգուշությամբ առաջացրել է մարդու մահ):

Եզրակացության հետ ծանոթացել են տուժողի իրավահաջորդը, մեղադրյալն ու նրա օրինական ներկայացուցիչը, ովքեր առարկություններ և միջնորդություններ չեն հայտնել, իսկ տուժողի իրավահաջորդ Գագիկ Թորոսյանն էլ շարունակել է պնդել, որ բողոք և պահանջ չունի վարորդ Ռ.Դանիելյանի նկատմամբ:

Քրեական գործի վարույթը կարճվել է։

Աղբյուր` Փաստինֆո