Փաստ ինֆո

Մարաշի զինված խմբի գործով այս տարվա վերջին նիստը տեղի չունեցավ` ամբաստանյալ Վաղինակ Ստեփանյանի պաշտպան, հանրային պաշտպան Լյուդվիգ Ավետիսյանի բացակայության պատճառով:

Գործում ներգրավված մեկ այլ հանրային պաշտպան Անժելիկա Հակոբյանը դատարանին հայտնեց, որ Լյուդվիգ Ավետիսյանը չի մասնակցելու գործին և որ ինքը կփոխարինի նրան:

Ամբաստանյալ Վահան Շիրխանյանի պաշտպան Հայկ Ալումյանը հայտարարեց, որ փոխարինող պաշտպանի ինստիտուտ գոյություն չունի, դա արատավոր երևույթ է, և հայտնաբերվել է վերջին շրջանում քաղաքական գործերի շրջանակում:

Ամբաստանյալն էլ իր հերթին հայտարարեց, որ ինքը ցանկանում է, որ իրեն պաշտպանի իր պաշտպանը՝ Լյուդվիգ Ավետիսյանը: Դատական նիստը հետաձգվեց, և հաջորդ նիստն արդեն տեղի կունենա հաջորդ տարի:

Լրագրողների հետ զրույցում որպես ամբաստանյալ Հարություն Սարիբեկյանի պաշտպան վերջերս ներգրավված փաստաբան Նարինե Ռշտունին հայտնեց, որ իր պաշտպանյալը շարունակում է դեկտեմբերի 13-ից սկսած հացադուլը (ջրադուլը նա դադարեցրել է հացադուլը սկսելուց մի քանի օր անց): Ըստ պաշտպանի, Հ.Սարիբեկյանը մեծ դժվարությամբ է եկել դատական նիստին, իրեն վատ է զգում:

Ըստ պաշտպանյալի փոխանցած տեղեկատվության, Հ.Սարիբեկյանը, ով արցախյան ազատամարտի մասնակից է, երկրորդ կարգի հաշմանդամ, յոթ անգամ դիմել է «Նուբարաշեն» քրեակատարողական հիմնարկից «Դատապարտյալների հիվանդանոց» ՔԿՀ տեղափոխելու համար, սակայն մերժվել է:

«Նուբարաշեն» ՔԿՀ-ից ստացված գրության համաձայն, ամբաստանյալի մոտ մի շարք հիվանդություններ են ախտորոշվել, նա բազմիցս ենթարկվել է նեղ մասնագիտացված բժիշկների խորհրդատվությունների, հետազոտությունների, ստացել է համապատասխան դեղորայքային բուժում: ՀՀ ԱՆ ՔԿ վարչությունից պահանջվել է թույլտվություն կալանավոր Սարիբեկյանին տեղափոխելու «Դատապարտյալների հիվանդանոց» ՔԿՀ հետագա ստացիոնար հետազոտությունն ու բուժումը կազմակերպելու համար, նշվում է գրության մեջ:

Լուսանկարը՝ azatutyun.am-ի

Աղբյուր` Փաստինֆո