Փաստ ինֆո

Կառավարությունը բացասական եզրակացություն տվեց «Հայաստանի Հանրապետության հարկային օրենսգրքում լրացում կատարելու մասին» ՀՀ օրենքի նախագծին, որը ներկայացրել է ԱԺ ՀՀԿ
խմբակցության պատգամավոր Միհրան Պողոսյանը։

«Առաջարկվում է հաշմանդամության կարգ ունեցող անձանց ստացված եկամուտները եկամտային հարկով չհարկել», - «Արմենպրես»-ի փոխանցմամբ, ասաց ՀՀ ֆինանսների նախարար Վարդան Արամյանը՝ ավելացնելով, որ պատգամավորի կողմից ներկայացված հիմնական շարժառիթը փաստարկվում է այն հանգամանքով, որ սա խթաններ կստեղծի տնտեսվարողների համար, որպեսզի ավելի շատ հաշմանդամություն ունեցող անձանց ներգրավեն աշխատանքային հարաբերությունների մեջ։

«Իհարկե, ընդհանուր նկատառումը չնսեմացնելով՝ մենք խնդիր ենք տեսնում: Առաջինը՝ պետք է հաշվի առնել, որ եկամտային հարկ վճարողն, իրականում, հենց ֆիզիկական անձն է, ոչ թե տնտեսավարողը և վերջինս նայում է համընդհանուր ծախսի տեսանկյունից: Այսինքն՝ եթե 100 հազար դրամ վճարում է և եկամտային հարկը թողնվում է հաշմանդամություն ունեցող անձի մոտ, աﬔն դեպքում, որևէ ծախսային փոփոխություն տնտեսավարողի մոտ չի առաջացնում, որպեսզի շարժառիթ ստեղծվի, որ նա ավելի շատ հաշմանդամություն ունեցող անձի ներգրավի»,- ասաց Վարդան Արամյանը՝ հավելելով, որ օրենքում արդեն իսկ նման նորմ սահմանվել է։

«Մենք տնտեսավարողներին շահագրգռելու համար ասում ենք, որ հաշմանդամություն ունեցող անձանց վճարած եկամուտները ոչ թե 100 տոկոսով, այլ 150 տոկոսով նվազեցվեն շահութահարկի բազայից, այսինքն՝ մենք 50 տոկոս էլ բոնուս ենք տալիս, որպեսզի տնտեսավարողը շահագրգռված լինի», - ասաց նախարարը։

Արամյանի խոսքով՝ եթե նորմը սահմանվի, այն կարող է հաշմանդամություն ունեցող անձանց հետագայում կենսաթոշակային իրավունքների հետ կապված խնդիր առաջացնել։

«Սա նաև վտանգավոր է այն տեսանկյունից, որ ոչ օրինապաշտ տնտեսվարողների համար սողանքի տեղ լինի, որ հաշմանդամություն ունեցող անձանց վրա մեծ գումարներ դնեն, հետո դա ավելի մեծ չափով նվազեցնեն շահութահարկի իրենց բազայից», - ընդգծեց Արամյանը՝ առաջարկելով ձեռնպահ մնալ այս օրենքի ընդունումից:

Աղբյուր` Փաստինֆո