Փաստ ինֆո

ՀՀ դատավորների ընդհանուր ժողովի էթիկայի ու կարգապահական հարցերի հանձնաժողովը մերժել է Վահան Շիրխանյանի պաշտպան Հայկ Ալումյանի դիմումը դատավոր Արմեն Բեկթաշյանի նկատմամբ կարգապահական վարույթ հարուցելու վերաբերյալ: Այս մասին «Փաստինֆո»-ի լրագրողին հայտնեց փաստաբան Հայկ Ալումյանը՝ հավելելով, որ հոկտեմբերի 2-ին հիշյալ հանձնաժողովը որոշել է դատավորի նկատմամբ կարգապահական վարույթ չհարուցել:

Հայկ Ալումյանը հայտնեց նաև, որ որոշումը պատճառաբանված չի եղել, ուստիև պարզ չէ այն արտահայտությունները, որը փաստաբանի ու նրա պաշտպանյալի պնդմամբ, դատավորն արել է Վ.Շիրխանյանի հասցեին, հանձնաժողովը համարել է իրավաչա՞փ, թե հանձնաժողովը համարել է, որ այդպիսի արտահայտություններ չեն արվել:

Դիմումի մերժման պատճառն իմանալու համար փաստաբանը դիմել է հանձնաժողովին՝ խնդրելով տրամադրել հանձնաժողովի նիստի արձանագրությունն ու նյութերը, որոնց հիման վրա այդ որոշումը կայացվել է: Հայկ Ալումյանը նշեց, որ հիշյալ արտահայտություններն անելուց հետո հաջորդ դատական նիստում ինքը հրապարակայնորեն հայտարարել է, որ դատավորն այդպիսի արտահայտություններ է արել և դատավորը դա չի ժխտել:

Հանձնաժողովը, սակայն հրաժարվել է նիստի արձանագրությունն ու նյութերը տրամադրել, ինչով ըստ Հայկ Ալումյանի, նախ հանձնաժողովը կասկածի տակ է դրել իրենց որոշման օրինականությունը և երկրորդ, զրկել իրենց այդ որոշումը բողոքարկելու հնարավորությունից: «Ես որպես բացարձակ կամայականություն եմ գնահատում այդ աշխատաոճը», - ասաց Հայկ Ալումյանը:

Հիշեցնենք, որ Հայկ Ալումյանը հանձնաժողովին էր դիմել դատավորի կողմից իր պաշտպանյալի նկատմամբ էթիկայի կանոնները խախտելու հետ կապված:

Մասնավորապես, իր պաշտպանյալի նկատմամբ դատական սանկցիա կիրառելուց հետո Վահան Շիրխանյանին հանել են դատական նիստերի դահլիճից՝ փակ գոտու ուղղությամբ, դատավորը բարձրաձայն շատ կոպիտ էր խոսել Շիրխանյանի հետ, ուղղակի գոռացել, բղավել էր, նրան դու-ով դիմելով՝ ասել. «Դու ի՛նչ իրավունք ունես ինձ ասել, որ ես ինչ-որ բան չեմ հասկանում»:

Աղբյուր` Փաստինֆո