Փաստ ինֆո

Այսօր տեղի ունեցավ «Սասնա Ծռեր-1» գործով այս տարվա վերջին դատական նիստը, դատարանը բոլորին շնորհավորեց գալիք Նոր տարվա ու Սբ Ծնունդի առթիվ:

Մինչ հետաձգումը ամբաստանյալ Արմեն Բիլյանի պաշտպան Արմինե Ֆանյանը հայտարարեց, որ իր պաշտպանյալը առողջական խնդիրների հետ կապված արդեն տասն օր է հացադուլի մեջ է: Ըստ պաշտպանի, նա չի պահվում հացադուլի մեջ գտնվողների համար նախատեսված խցում, պայմաններն անմարդկային են, ցուրտ է, խոնավ, ուստի իր պաշտպանյալի կյանքը վտանգի տակ է: Պաշտպանը հայտնեց, որ դիմել է իր պաշտպանյալին «Արմավիր» քրեակատարողական հիմնարկ տեղափոխելու խնդրանքով, նա դատարանին խնդրեց համապատասխան գրությամբ հնարավորություն տալ արագացնել Բիլյանի տեղափոխումը: Արմեն Բիլյանն իր հերթին հայտարարեց, որ ինքը դուրս չի գալու հացադուլից, կմեռնի, բայց դուրս չի գա: Նա ևս պահանջեց իրեն «Արմավիր» ՔԿՀ տեղափոխել: Դատարանը բավարարեց պաշտպանի միջնորդությունը, համապատասխան գրություն կուղարկվի «Նուբարաշեն» ՔԿՀ:

Այսօրվա դատական նիստում դատարանը երկրորդ անգամ դիմեց Փաստաբանների պալատ՝ փաստաբան Հայկ Ալումյանին կարգապահական պատասխանատվության ենթարկելու համար. փաստաբանի նկատմամբ առաջին նման դատական սանկցիան կիրառվել էր անցյալ դատական նիստի ժամանակ:

«Փաստինֆո»-ի լրագրողի հետ զրույցում Հայկ Ալումյանը ներկայացրեց իր նկատմամբ առաջին սանկցիայի կիրառմանը նախորդած իրադարձությունները: Ամեն ինչ սկսվել էր նրանից, որ անցյալ դատական նիստին ամբաստանյալ Սմբատ Բարսեղյանին թույլ չեն տվել իր հետ դատարան բերել գրառումների տետրը, ավելին՝ տետրը պահել են իրենց մոտ: Հայկ Ալումյանն ընդգծեց, որ դա շարքային խախտում չէր, քանի որ առնչվում էր արդար դատաքննության իրավունքին: «Ես կուզենայի, որ իրենք կալանավորված լինեին և իրենց հետ գոնե մեկ անգամ այդպես վարվեին»,- ասաց փաստաբանը:

Պաշտպանը խնդրել էր դատարանին միջոցներ ձեռնարկել խախտումը վերացնելու համար, սակայն դատարանը նշել էր, որ նման իրավասություն չունի և առաջարկել կողմին սեփական ուժերով միջոցներ ձեռնարկել: Ըստ Հայկ Ալումյանի, այդպիսով դատարանն ընդլայնել է արդար դատաքննություն ապահովելու պաշտպանական կողմի իրավունքները՝ ի հաշիվ սեփական՝ դատարանի, իրավունքների սահմանափակման:

Միաժամանակ դատարանը մերժել էր Հայկ Ալումյանի միջնորդությունը հարցը կարգավորելու համար չորս ժամով դատական նիստն ընդմիջելու մասին: Դա առաջացրել էր Սմբատ Բարսեղյանի դժգոհությունը, նա աղմկել էր, և դատարանը նրա նկատմամբ կիրառել էր դատական սանկցիա՝ դատական նիստերի դահլիճից չորս ժամով հեռացնելու ձևով:

Ընդ որում, ըստ Հայկ Ալումյանի, Սմբատ Բարսեղյանն իր պաշտպանի ներկայությամբ կամավոր կերպով հրաժարվել էր իր ծառայություններից, այսինքն՝ առկա են եղել պաշտպանից հրաժարումն ընդունելու համար բոլոր երկու նախապայմանները: Սմբատ Բարսեղյանը միաժամանակ նշել էր, որ դատարանի դահլիճ վերադառնալուց հետո կարող է և փոխել իր դիրքորոշումը և պաշտպան ցանկանալ՝ առանց մասնավորեցնելու՝ կոնկրետ ո՛ւմ:

Ըստ Հայկ Ալումյանի, համենայն դեպս շատ պարզ և հստակ իր այս դիրքորոշումը Սմբատ Բարսեղյանը հայտնել էր նաև գրավոր դիմում ներկայացնելով դատարանին:

Պաշտպանն էլ, քանի որ այդ պահից օրենքի ուժով ինքը դադարում է ամբաստանյալի պաշտպանը լինել, հեռացել էր դատական նիստից:

Դատարանը, սակայն, փաստաբանի հանդեպ կիրառել է սանկցիա և դիմել Փաստաբանների պալատ՝ կարգապահական պատասխանատվության ենթարկելու համար:

Իսկ այսօրվա դատական նիստում խնդրի շուրջ զարգացումները շարունակվել են, դատարանը վերադարձրել է ամբաստանյալին դահլիճ նրա գրությունը հրապարակելու համար: Գիրը հենց նրա համար է հորինվել, որ կարդացողն ընկալի գրողի միտքի՝ վերջինիս բացակայությամբ, նշեց Հայկ Ալումյանը:

Դատարանն, ըստ Հայկ Ալումյանի, հարցերով խճճել է ամբաստանյալին, ապա եզրակացրել, որ պաշտպանից հրաժարումն օրինական չէ, ուստի պաշտպանի մասնակցությունը պարտադիր է:

«Տարօրինակ է, որ 21-րդ դարում Եվրոպայի խորհրդի անդամ երկրի դատարանում այսպիսի երևույթներ են տեղի ունենում: Ես ափսոսում եմ, որ այդպիսի դատարան ունենք»,- ասաց Հայկ Ալումյանը՝ նկատելով, որ եթե «մենք չենք կարողանում Հայոց գրավոր լեզվով իրար հասկանալ, ինչպե՞ս ենք դատավարությանն իրար հասկանալու»:

Ի դեպ, դատարանն այսօրվա դատական նիստում վերացրել է Սմբատ Բարսեղյանի դատական սանկցիան, նրան դահլիճ վերադարձրել, ապա նրանից ճշտելով, որ չի հրաժարվում իր պաշտպանից, արձանագրել էր, որ պաշտպանի ներկայությունը պարտադիր է, սակայն նա չի ներկայացել դատական նիստին, և ևս մեկ դատական սանկցիա կիրառել պաշտպանի հանդեպ:

Լուսանկարը՝ Ֆոտոլուրի

Աղբյուր` Փաստինֆո