Փաստ ինֆո

Ծանրացուցիչ հանգամանքներում իրանահայ գործարարի 22 տարվա վաղեմության սպանության գործով այսօրվա դատական նիստում գործով ամբաստանյալ Գեորգի Սաֆարյանը միջնորդեց անթույլատրելի ճանաչել նույն գործի շրջանակում ավելի վաղ դատապարտված անձանց ցուցմունքները և քրեական գործի վարույթը կարճել: Ըստ ամբաստանյալի, գործի քննությամբ նախաքննական մարմինը ձեռք չի բերել ապացույցների բավարար ամբողջություն:

Դատական նիստին ներկա չէր տուժողի իրավահաջորդը, ուստի դատարանը որոշեց միջնորդության քննարկումն անցկացնել հաջորդ դատական նիստում՝ տուժողի իրավահաջորդի մասնակցությամբ, որպեսզի վերջինս ևս հնարավորություն ունենա միջնորդության մասին իր կարծիքը հայտնել:

Ամբաստանյալը հայտարարեց, որ «ողջամիտ ժամկետ» հասկացության իմաստը կորում է: Նա միաժամանակ հայտարարեց, որ ինքը սպանության հետ կապ չունի: Ամբաստանյալը հավելեց, որ իր կինը տառապում է քաղցկեղով, և ներկայումս նրա վիճակը վատացել է: Նա ընդգծեց, որ իրենք անչափահաս երեխա ունեն:

Դատարանն իր հերթին արձագանքեց, որ դատարանը պատշաճ կարգով նիստեր է նշանակել ու անցկացրել և այսուհետ ևս ամեն ինչ կանի, մասնավորապես, կապահովի գործի քննության բնականոն ընթացքը:

Նշենք, որ 1995 թվականի հունվարի 26-ին տեղի ունեցած սպանության երեք մասնակիցներ ավելի վաղ՝ անցյալ դարի 90-ականներին, դատապարտվել են: Իսկ ներկայումս դատարանում քննվող այդ գործով միակ ամբաստանյալ Գեորգի Սաֆարյանը ծանրացուցիչ հանգամանքներում կատարված սպանության և ավազակային հարձակման մեղադրանքներով 20 տարի հետախուզման մեջ է գտնվել:

Նույն` 95 թվականի մայիսի 30-ին նրա նկատմամբ հայտարարվել էր միջպետական, իսկ 99 թվականի նոյեմբերի 30-ին` միջազգային հետախուզում: 2014 թվականի հունվարին ոստիկանները օպերատիվ տեղեկություն էին ստացել, որ Գեորգի Սաֆարյանն ուրիշի անվան տակ բնակություն է հաստատել Ռուսաստանի Դաշնության Նովոկուզնեցկ քաղաքում, օպերատիվ տեղեկությունը հաստատվել են լուսանկարներով ու մատնահետքերով:

Ըստ դեպքի մասին ոստիկանության հաղորդագրության, նախապես հանցավոր համաձայնության գալով, չորս ընկեր գնացել էին Երևանի Կոմիտասի պողոտա, որտեղ բնակվում էր Իրանի Իսլամական Հանրապետության ազգությամբ հայ մի քաղաքացի` Հայկ Աբրահամյանը, որի հետ ընկերները մտերմություն էին հաստատել դեռևս 94 թվականին: Տեղեկանալով, որ գործարարն Իրանից վերադարձել է մեծ գումարով և նպատակ ունի ասֆալտի գործարան կառուցել, երեկոյան ութն անց կեսին ընկերներից մեկը մնացել է շենքի մոտ, մյուս երեքը՝ մտել տուն:

Հայկի գարեջրի բաժակում թույն էին խառնել, «բայց գյուղինստիտուտի ուսանող Գեորգի Սաֆարյանի բերած թույնը միայն քնեցրել էր Հայկին»: Տղաները գործի էին դրել պահեստային տարբերակը` երկուսը բռնել էին Հայկին, իսկ Գեորգին, իր հետ բերած մետաղալարով խեղդամահ էր արել նրան: Տնից հափշտակելով միայն թանկարժեք իրեր` հանցախումբը հեռացել էր, նշվում է ոստիկանության հաղորդագրության մեջ:

Աղբյուր` Փաստինֆո