Փաստ ինֆո

ԱՄՆ պատժամիջոցների ցանկում հայտնված հայազգի գործարար Ռուբեն Թաթուլյանը, ըստ վարչապետ Կարեն Կարապետյանի խոսնակի, չի հանդիսանում «Հայաստանի ներդրողների ակումբի» անդամ։

Այս մասին գրում է Azatutyun.am-ը՝ ընդգծելով, որ այս տարվա մայիսին, երբ ռուսական մամուլը գրեց, որ ձերբակալվել է Ռուբեն Թաթուլյանը, Հայաստանի տնտեսական զարգացման և ներդրումների փոխնախարարը հայտարարել էր, որ նա Ներդրողների ակումբի 30 անդամներից մեկն է, և որ կառավարությունը Թաթուլյանի հետ չհամագործակցելու խնդիր չի տեսնում։

Վարչապետի խոսնակ Արամ Արարատյանը, սակայն, այսօր չհստակեցրեց՝ արդյոք Թաթուլյանից ներդրումներ կընդունեն։

«Ես որքան գիտեմ՝ կոնկրետ Ձեր նշված անձնավորությունը չի հանդիսանում «Հայաստանի ներդրողների ակումբի» անդամ, էդ՝ մեկ: Եվ երկրորդը՝ վարչապետի խնդիրը չի անձամբ ճանաչել ակումբի բոլոր անդամներին կամ իմանալ բոլոր ակումբի անդամներին: Մեր մոտեցումը, որը արտահայտել է վարչապետը, շատ հստակ է, բազմիցս արտահայտվել է Կարեն Կարապետյանի կողմից՝ մենք պատրաստակամ ենք աջակցել և համագործակցել ցանկացած գործարարի հետ, որը պատրաստակամ է ներդրումային ծրագրեր իրականացնել Հայաստանում: Սա է իմ մեկնաբանությունը», - ասաց Արարատյանը:

«Այդ թվում՝ եթե նա ընդգրկվել է ԱՄՆ պատժամիջոցների ցանկում, դուք պատրաստ եք անգամ նման մարդու հետ համագործակցել», - «Ազատության» այս դիտարկմանը վարչապետի խոսնակն արձագանքեց․ - «Ես նորից եմ կրկնում․ որքան ես գիտեմ՝ էդ մարդը չի հանդիսանում «Հայաստանի ներդրողների ակումբի» անդամ»:

Սոչիաբնակ հայ գործարար Ռուբեն Թաթուլյանը, ում անունը լրատվամիջոցները կապում են նաև քրեական աշխարհի հետ, Հայաստանի դիվանագիտական անձնագիր ունի: Արտաքին գործերի նախարարությունից «Ազատությանը» խոստացան, որ թեմային կանդրադառնան ավելի ուշ։

Ըստ վարչապետի խոսնակի՝ թեև Կարեն Կարապետյանն է հիմնել Ներդրողների ակումբը, կառավարությունը իրավասու չէ որոշելու դրա կազմը․ - «Դա մեզ ենթակա կառույց չէ: Այո, Կարեն Կարապետյանի նախաձեռնությամբ է ինքը ստեղծվել, բայց ինքը առանձին գործող կառույց է, այն կառավարությանը կից կամ ենթակա մարմին չի, ուստի մենք լիազորություններ չունենք որոշելու, թե ով էնտեղ պետք է լինի և ով չպետք է էնտեղ լինի»:

«Եթե հիմա այդ անձնավորությունը թեկուզ Ներդրողների ակումբի միջոցով փորձի ներդրումներ իրականացնել Հայաստանում, դուք համաձայնությունը կտա՞ք, թե՞ փաստը, որ նա հայտնվել է ԱՄՆ պատժամիջոցների ցանկում, դուք գոնե ձեր առարկությունը կհայտնեք Ներդրողների ակումբին», - այս հարցին էլ Արամ Արարատյանը հակադարձեց․ - «Էս պարագայում ես լրացուցիչ ասելու բան չունեմ: Երբ դա լինի կոնկրետ առարկայական խոսակցություն, էդ ժամանակ կհասկանանք և կորոշենք: Էս պահին ես որևէ ավելի բան ասելու չունեմ»:

Մանրամասները՝ սկզբնաղբյուր-կայքում

Աղբյուր` Փաստինֆո