Փաստ ինֆո

«Մոր և մանկան առողջության պահպանման գիտահետազոտական կենտրոն»-ում դեռևս տարեսկզբին պտղի մահվան դեպք էր գրանցվել:

Ավելի ուշ պարզվեց, որ մանկաբարձական բաժնի ղեկավարը հղիին կեսարյան հատում կատարելու ցուցման դեպքում չի կազմակերպել գործընթացը և հասուն պտուղը մահացել է:

Հարուցված քրեական այժմ ամբաստանյալի աթոռին է հայտնվել նույն կենտրոնի մանկաբարձական բաժնի ղեկավար, բժիշկ մանկաբարձ-գինեկոլոգ Արմեն Խաչատրյանը, ով ունենալով պարտականություն անմիջականորեն ղեկավարելու բաժնի կառուցվածքում ընդգրկված բաժանմունքների, կաբինետների և ենթաբաժինների գործունեությունը, կազմակերպելու և ապահովելու հիվանդների ժամանակին հետազոտումը և բուժումը, հղիի բուժման գործունեությունը չի կազմակերպել՝ դրսևորել է անփույթ և անբարեխիղճ վերաբերմունք:

Ըստ մեղադրանքի՝ Արմեն Խաչատրյանը 2017թ. հունվարի 14-ին՝ ժամը 13:15-ին, «Մոր և մանկան առողջության պահպանման գիտահետազոտական կենտրոն» ՓԲ ընկերություն ընդունված Նարինե Գեդեոնյանին պտղի հիպօքսիա հայտնաբերելու և ծննդալուծումը կեսարյան հատման միջոցով կատարելու ցուցումի պայմաններում, տվյալ վիրահատությունը նախապատրաստող բժիշկ մանկաբարձ գինեկոլոգ Սոնա Աբելյանին հանձնարարել է մասնակցել մեկ այլ վիրահատության կատարմանը, ինչպես նաև հիշյալ բուժհիմնարկի մանկաբարձական բաժնում այդ պահին գտնվող հերթապահ այլ մանկաբարձ-գինեկոլոգին չի հանձնարարել Ն.Գեդեոնյանի ծննդալուծումը կատարել կեսարյան հատման միջոցով, այսինքն՝ վերջինիս բուժման գործունեությունը չի կազմակերպել` դրանով իսկ չկատարելով իր մասնագիտական պարտականությունները, դրանց նկատմամբ դրսևորել է անփույթ և անբարեխիղճ վերաբերմունք, որի հետևանքով Նարինե Գեդեոնյանի իգական սեռի հասուն պտուղը մահացել է, տեղի է ունեցել հղիության ընդհատում՝ կնոջ առողջությանը անզգուշությամբ պատճառելով ծանր վնաս:

Արմեն Խաչատրյանին մեղադրանք է առաջադրվել՝ ՀՀ քրեական օրենսգրքի 130-րդ հոդվածի 1-ին մասով:

Նրա նկատմամբ որպես խափանման միջոց է ընտրվել չհեռանալու մասին ստորագրությունը:

Աղբյուր` Փաստինֆո