Փաստ ինֆո

Արդեն հանգուցյալ ոստիկանի մասնակցությամբ ավազակության գործով այսօրվա դատական նիստում հետազոտվեցին իրեղեն ապացույցները: Դրանք կազմում են 37 փաթեթ՝ ավազակության երկու մասնակցի, ինչպես նաև տուժողի հագուստները, որոնք նրանք կրել են դեպքի օրը՝ արյան հետքերով, դրանք մի կողմից վկայում են պայքարի, իսկ մյուս կողմից՝ անկոչ հյուրերին դիմակայության մասին:

Հետազոտվեցին նաև հարձակվողների «աշխատանքային» գործիքներն ու պարագաները՝ դանակ, պտուտակահան, 9 մմ տրամաչափի ատրճանակի փամփուշտներ, մեկ կրակված գնդակ, ինչպես նաև դիմակներ, ձեռնոցներ, լուսարձակ, կպչուն ժապավեն: Հետազոտվեց նաև թավան, որով տանտիրուհին փորձել է պաշտպանվել «հյուրերից»:

Ըստ դատարանի սահմանած ապացույցների հետազոտման կարգի, իրեղեն ապացույցների հետազոտումից հետո ամբաստանյալ Էդգար Մանուկյանը պետք է օգտվեր ցուցմունք տալու իր իրավունքից, սակայն նրա պաշտպան Կարեն Հակոբյանը խնդրեց հետաձգել դատական նիստը, որպեսզի ինքը հնարավորություն ունենա ցուցմունք տալու-չտալու հարցը քննարկել իր պաշտպանյալի հետ: Դատարանը բավարարեց միջնորդությունը:

Ըստ գործով միակ ամբաստանյալ Էդգար Մանուկյանին առաջադրված մեղադրանքի, նա գործարարի համբավ ունեցող տանտիրոջ ու նրա ընտանիքի անդամների գույքը կյանքի կամ առողջության համար վտանգավոր բռնություն գործադրելու սպառնալիքով հափշտակելու հարցով նախնական համաձայնության է եկել ոստիկանության ծառայող Հրաչյա Ֆալանջյանի ու քննությամբ չպարզված անձի հետ:

Հափշտակությունն իրականացնելու համար զինվելով 9մմ տրամաչափի ատրճանակով և փամփուշտներով, ինչպես նաև` դանակով, փականքներ բացելու համար նախատեսված պտուտակահանով, զոհին կապելու համար նախատեսված կպչուն ժապավեններով, լապտերներով, դիմակներով և ձեռնոցներով` 2016թ. մայիսի 13-ին ժամը 4-ի սահմաններում, ոստիկան Հ.Ֆալանջյանին պատկանող «Մերսեդես Բենց» մակնիշի ավտոմեքենայով մեկնել են հիշյալ անձի տուն: Հ.Ֆալանջյանի հետ մոտեցել են տանը և դարպասի վրայով մագլցելու եղանակով ապօրինաբար մուտք են գործել տուժած ընտանիքին պատկանող տան տարածք:

Այնուհետև բաց պատուհանից տան բնակելի հատված ապօրինի մուտք գործելուց հետո դիմակավորված, ատրճանակի և դանակի գործադրմամբ կյանքի և առողջության համար վտանգավոր բռնություն գործադրելու սպառնալիքով հարձակվել են ննջասենյակում պառկած ամուսինների վրա և գույք հանձնելու պահանջ են ներկայացրել նրանց:

Հանդիպելով ամուսինների ֆիզիկական հակազդեցությանը` այն կոտրելու և հանցավոր նպատակին հասնելու համար Էդգար Մանուկյանն իր մոտ գտնվող դանակով հարվածներ է հասցրել տանտիրոջ մարմնի տարբեր մասերին՝ նրա առողջությանը դիտավորությամբ պատճառելով կյանքին վտանգ սպառնացող ծանր վնաս: Նույն ժամանակ Հրաչյա Ֆալանջյանը իր մոտ գտնվող խլացուցիչով ատրճանակից կրակ է արձակել տանտիրոջ որովայնին` դիտավորությամբ պատճառելով կյանքին վտանգ սպառնացող ծանր վնաս:

Հարևան ննջասենյակում մանկահասակ երկու երեխաների հետ քնած տանտիրոջ դուստրն՝ ամուսնու հետ, և երրորդ ննջասենյակում քնած անչափահաս որդին ձայներից արթնանալով` շտապել են ծնողների ննջասենյակ և միանալով պայքարին` փորձել են վնասազերծել Հ.Ֆալանջյանին և Է.Մանուկյանին:

Վերջիններս, շարունակելով հարձակումը` անչափահասին դանակով հարվածելով` նրա առողջությանը պատճառել են թեթև վնաս` առողջության կարճատև քայքայումով, իդսկ փեսային՝ առողջության տևական քայքայումով միջին ծանրության վնաս:

Այնուհետև, Հ.Ֆալանջյանը կորցնելով դիմակը, և որպես հիշյալ վարչական տարածքը նախկինում սպասարկած ոստիկանության ծառայող ճանաչելի դառնալով իր ծանոթ տանտիրոջ և նրա ընտանիքի անդամների համար` հանցակցի սահմանազանցմամբ, տան անդամներին սպանելու, այն է` երկու և ավելի անձանց սպանելու, ինչպես նաև կատարվող հանցանքը թաքցնելու և այն հեշտացնելու դիտավորությամբ գործադրել է իր մոտ գտնվող խլացուցիչով ատրճանակը` կրակ է արձակել անչափահասի ուղղությամբ, ինչը չի ընդգրկվել Էդգար Մանուկյանի դիտավորությամբ:

Ըստ մեղադրական եզրակացության, Հրաչյա Ֆալանջյանի և Էդգար Մանուկյանի հանցավոր գործողությունները կանխվել են ընտանիքի անդամների կողմից, որի ընթացքում Հրաչյա Ֆալանջյանը բազմաթիվ վերքեր ստանալու հետևանքով մահացել է, իսկ Էդգար Մանուկյանին պատճառվել է կյանքին վտանգ սպառնացող ծանր վնաս:

Նշենք, որ Ֆալանջյանի նկատմամբ քրեական հետապնդումը դադարեցվել է մահվան հիմքով:

Աղբյուր` Փաստինֆո