Փաստ ինֆո

«Սասնա Ծռեր-1»-ի գործում այսօրվա դատական նիստի ընդմիջմանը շտապօգնություն կանչվեց Արայիկ Խանդոյանի վատ ինքնազգացողության հետ կապված:

Ընդմիջմանը հաջորդած դատական նիստում հանրային պաշտպան Արմինե Ֆանյանը բարձրաձայնեց իր պաշտպանյալ Արմեն Բիլյանի առողջական վիճակի խնդիրների մասին և խնդրեց դատարանին, որպեսզի շտապօգնությունն իր պաշտպանյալին ևս հետազոտի:

Պաշտպանը հայտնեց, որ Արմեն Բիլյանը երեք օր է, ինչ հացադուլի մեջ է, նա պատշաճ բուժօգնություն է պահանջում: Արմինե Ֆանյանը հայտարարեց, որ իր պաշտպանյալն իրեն վատ է զգում, ունի գլխապտույտներ, իսկ քրեակատարողական հիմնարկն անգործություն է դրսևորում:

Դատարանը բավարարեց պաշտպանի միջնորդությունը, դատական նիստն ընդմիջեց՝ հնարավորություն տալով, որպեսզի շտապօգնության բժիշկներն Արմեն Բիլյանին ևս հետազոտեն:

Այսօրվա դատական նիստում պաշտպանական կողմը բարձրաձայնեց իրենց պաշտպանյալների իրավունքի մեկ այլ խախտման մասին ևս: Մասնավորապես, Սմբատ Բարսեղյանը ցանկացել է դատական նիստին իր հետ բերել գրառումներով տետրը, քրեակատարողական հիմնարկում փորձել են կարդալ գրառումները, պարզել ինչ է այնտեղ գրված, ինքը հրաժարվել է ցույց տալ: Ուղղակի թափահարել է տետրը, որպեսզի տեսանելի լինի, որ դրանում որևէ արգելված իր չկա: Սմբատ Բարսեղյանին արգելել են տետրը բերել դատարան: Ս.Բարսեղյանի պաշտպան Հայկ Ալումյանը միջնորդեց, որպեսզի այդ հարցի լուծումը տրվի:

Դատարանը հայտարարեց, որ դա իր իրավասություններից դուրս է, առաջարկեց պաշտպանին անձամբ այդ հարցով զբաղվել: Պաշտպանը միջնորդեց ընդմիջել դատական նիստը, որպեսզի ինքը կարողանա անձամբ զբաղվել այդ հարցով:

Պաշտպան Արայիկ Պապիկյանն իր հերթին հայտարարեց, որ «Սասնա Ծռեր»-ի գործերի շրջանակներում երեք դեպք է եղել. մի դեպքում նիստի համար արված գրառումները վերցրել են, հաջորդ օրն են վերադարձրել, մի դեպքում՝ երեկոյան են վերադարձրել, իսկ մի դեպքում ուղղակի պատռել են գրառումները: «Եթե վերցրել-պահել են իրենց մոտ, ուրեմն կարող էին նաև բովանդակությունն ընթերցել, նաև անձանց զրկել են հայտարարություն կատարելու հնարավորությունից»,- «Փաստինֆո»-ի լրագրողի հետ զրույցում նկատեց Արայիկ Պապիկյանը՝ հավելելով, որ ամենաարտառոցը գրառումները պատռելու դեպքն էր:

Պաշտպանը պաշտպանյալի հետ աշխատելով ձեռագիր միջնորդություն էին պատրաստել հաջորդ օրը դատարանում ներկայացնելու համար, պաշտպանի ներկայությամբ պաշտպանյալին քրեակատարողական հիմնարկում խուզարկել են, ձեռքից չեն վերցրել, որպես թույլատրված առարկա մնացել է իր մոտ, իսկ պաշտպանի գնալուց հետո փորձել են վերցնել, բովանդակությունը կարդալ, պաշտպանյալը դա թույլ չի տվել, նրանք էլ պատռել են գրառումները ու թափել:

Ա. Պապիկյանը հավելեց, որ վերադասության կարգով, Քրեակատարողական ծառայություն են բողոքարկել ՔԿՀ աշխատակիցների գործողությունները, դեռ որևէ արդյունք չունեն:

Հնարավոր է, որ արդյունք լինի, սակայն փաստն այն է, որ պահը՝ այն, ինչ որ պետք է ասվեր, իրենք արդեն բաց են թողել: Եթե ինչ-որ մեկին անգամ նկատողություն հայտարարվի, դրանից իրավիճակն արդեն չի փոխվի, նշեց պաշտպանը:

Աղբյուր` Փաստինֆո