Փաստ ինֆո

ՀՀ վճռաբեկ դատարանն այսօր արդարացրել է ՀՀ քննչական կոմիտեի Արմավիրի մարզային քննչական վարչության ՀԿԳ քննիչ պաշտոնավարած, Արդարադատության մայոր Սամվել Ավդոյանին ՀՀ քրեական օրենսգրքի 314-րդ հոդվածի 1-ին մասով՝ պաշտոնեական կեղծիքը, առաջադրված մեղադրանքում: Այս մասին «Փաստինֆո»-ին հայտնեց Ս.Ավդոյանի պաշտպան, փաստաբան Հունան Բաբայանը:

Ըստ մեղադրանքի, Սամվել Ավդոյանը՝ զբաղեցնելով ՀՀ ոստիկանության նախկին քննչական գլխավոր վարչության Արմավիրի մարզային քննչական բաժնի Վաղարշապատի քննչական բաժանմունքի ավագ քննիչի պաշտոնը՝ 2014 թվականի սեպտեմբերի 21-ին կազմել և հանձնել, շրջանառության մեջ է դրել պաշտոնական կեղծ փաստաթուղթ։

Վերաքննիչ քրեական դատարանը՝ դատավոր Ա.Ազարյանի նախագահությամբ, դատավորներ Տ.Սահակյանի ու Մ.Պապոյանի մասնակցությամբ 26-06-2017թ. որոշմամբ բավարարել էր մեղադրող Արմեն Շահբազյանի վերաքննիչ բողոքը, Սամվել Ավդոյանի վերաբերյալ ՀՀ Արմավիրի մարզի ընդհանուր իրավասության առաջին ատյանի դատարանի 2015թ. նոյեմբերի 25-ի արդարացման դատավճիռը բեկանել:

Որոշմամբ Սամվել Ավդոյանին մեղավոր էր ճանաչվել ՀՀ քրեական օրենսգրքի 314-րդ հոդվածի 1-ին մասով և նրա նկատմամբ նշանակվել էր տուգանք՝ նվազագույն աշխատավարձի երկուհարյուրապատիկի՝ 200.000 ՀՀ դրամի չափով՝ իշխանության ներկայացուցչի գործառույթներ իրականացնող պաշտոններ զբաղեցնելու իրավունքի զրկմամբ՝ 1 տարի ժամկետով:

Վերաքննիչ դատարանն արձանագրել էր, որ առաջին ատյանի դատարանը թույլ է տվել ՀՀ քրեական օրենսգրքի 314-րդ հոդվածի ոչ ճիշտ կիրառում, ինչը հանգեցրել է ՀՀ քրեական դատավարության օրենսգրքի 358-րդ հոդվածի պահանջներին չհամապատասխանող դատական ակտի կայացմանը։ Այսինքն՝ թույլ է տրվել ՀՀ քրեական դատավարության օրենսգրքի 397-398-րդ հոդվածներով նախատեսված նյութական և դատավարական իրավունքի խախտումներ:

Առաջին ատյանի դատարանի 2015թ. նոյեմբերի 25-ի դատավճռով ճանաչվել և հռչակվել էր Սամվել Ավդոյանի անմեղությունը ՀՀ քրեական օրենսգրքի 314-րդ հոդվածի 1-ին մասով առաջադրված մեղադրանքում՝ հանցակազմի բացակայության և ապացույցների անբավարարության պատճառաբանությամբ։

Վերաքննիչ դատարանի 2016թ. մարտի 22-ի որոշմամբ մեղադրողի վերաքննիչ բողոքը բավարարվել էր մասնակիորեն. Սամվել Ավդոյանի վերաբերյալ ՀՀ քրեական օրենսգրքի 314-րդ հոդվածի 1-ին մասով ՀՀ Արմավիրի մարզի ընդհանուր իրավասության առաջին ատյանի դատարանի 2015թ. նոյեմբերի 25-ի դատավճիռը բեկանվել է և գործն ուղարկել նույն դատարան՝ այլ կազմով նոր քննության՝ սահմանելով նոր քննության ծավալը:

Վերաքննիչ դատարանի վերոհիշյալ որոշման դեմ ամբաստանյալ Սամվել Ավդոյանի պաշտպաններ Հունան Բաբայանի և Կարեն Հովհաննիսյանի վճռաբեկ բողոքը ՀՀ վճռաբեկ դատարանի 2016թ. դեկտեմբերի 23-ի որոշմամբ բավարարվել էր մասնակիորեն. ամբաստանյալ Սամվել Ավդոյանի վերաբերյալ ՀՀ վերաքննիչ քրեական դատարանի 2016թ. մարտի 22-ի որոշումը բեկանվել էր և գործն ուղարկվել Վերաքննիչ դատարան՝ նոր քննության:

Աղբյուր` Փաստինֆո