Փաստ ինֆո

Հայաստանում գյուղատնտեսական ապահովագրության պիլոտային ծրագիրը նախատեսվում է իրականացնել 2018-ի վերջին կամ 2019-ի սկզբին: Մինչ այդ կստեղծվի բյուրո, որը կգնահատի բնածին աղետների վնասներն ու կմշակի ապահովագրական պրոդուկտները:

«Արմենպրես»-ի փոխանցմամբ` լրագրողների հետ հանդիպմանը ՀՀ գյուղատնտեսության նախարարի տեղակալ Արմեն Հարությունյանը մանրամասներ հայտնեց նոր գործարկվելիք ապահովագրական համակարգի վերաբերյալ:

«Տարբեր ապահովագրական գործիքներ կան, բայց գյուղատնտեսական ապահովագրությունը տարբերվում է իր ծավալներով և ընդգրկունությամբ: Որպեսզի կարողանանք հստակ տեղեկատվություն հավաքել վնասների մասին, թե ինչի դիմաց որքան փոխհատուցում պետք է իրականացվի, մեզ պետք է վնաս գնահատողների ինստիտուտ ստեղծել: Այդ նպատակով 2018-ին մասնագետների վերապատրաստումներ տեղի կունենան նոր ստեղծվելիք բյուրոյի կողմից»,- ասաց փոխնախարարը:

Գյուղատնտեսական ապահովագրական համակարգի ներդրման նպատակով Հայաստանը 5 միլիոն եվրո է ստացել Վերականգնման վարկերի բանկի (KfW) և ևս 2 միլիոն եվրո Կլիմայի ներդրումային հիմնադրամից: 5 միլիոնից 4.8-ը ծառայելու է որպես սուբսիդավորման վճար, 200 հազար եվրոն` տեխնիկական աջակցություն: Եվս 5 միլիոն եվրո համաֆինանսավորմամբ պետական բյուջեից է տրամադրվելու շահառուների սուբսիդավորմանը: Կլիմայի ներդրումային հիմնադրամն էլ տրամադրել է 2 միլիոն եվրո, որից 200 հազարը կուղղվի սուբսիդավորման գումարներին, իսկ 1.8-ը նախատեսված է խորհրդատուի վարձատրության համար:

Փոխնախարարի խոսքով` այս պահին երեք կազմակերպություններից ձևավորվել է խորհրդատվական կոնսորցիում, որում ներգրավված են շվեյցարական «MFstrategy», հարավամերիկյան «Microinsurance» և իտալական «Agriconsulting Europe» ընկերությունները:

Արմեն Հարությունյանը տեղեկացրեց, որ առաջին հերթին ապահովագրվելու է պտուղ-բանջարեղենի և հացահատիկի արտադրությունը, երկրորդ փուլով հնարավոր կլինի խոսել նաև անասնապահության ապահովագրության մասին:

«Համակարգի ներդրման առաջին տարում կընտրվեն հիմնական ռիսկերն ու մշակաբույսերը: Նախատեսում ենք 1-2 ռիսկի ու 5-10 մշակաբույսի ընտրություն: Ակնկալում են 2018-ի վերջում առաջին պիլոտային ապահովագրությունն իրականացնել»,-ասաց Արﬔն Հարությունյանը` հավելելով, որ ռիսկերից առաջինը կարկտահարությունն է: Նա նշեց, որ հետագայում 4 հիմնական ռիսկեր են առանձնացվելու `կարկտահարություն, ցրտահարություն, երաշտ և ուժեղ քամիներ:

«Ընթացքում, երբ հասկանանք, որ կան այլ ռիսկեր, որոնց վնասը խոչընդոտում է գյուղատնտեսների ու ներդրողների աշխատանքին, կարող ենք նաև դրանք դիտարկել»,-ասաց փոխնախարար Հարությունյանը:

Սուբսիդավորումը կկատարվի դրամային տեսքով, ինչ վերաբերում է հատուցման չափին, Արմեն Հարությունյանը նկատեց, որ խորհրդատուի հետ դեռ պետք է այդ հարցը հստակեցնեն: Նրա խոսքով` միջազգային պրակտիկան ցույց է տալիս, որ սովորաբար ընտրվում է նվազագույն շեմ, որի համար գյուղացին չի ստանում փոխհատուցում, դա կարող է լինել 5, 10 տոկոս կամ գուցե ավելի:

«Իսկ այն համայնքներում, որտեղ բնածին աղետների ռիսկերը շատ բարձր են, մենք շարունակելու ենք խթանել ֆիզիկական պաշտպանության միջոցները: Եթե կա համայնք, որտեղ 5 տարվա ընթացքում 3 անգամ բնածին աղետ է եղել, այն պետք է ապավինի ֆիզիկական պաշտպանության միջոցներին, այլապես ապահովագրությունը գնալով թանկանալու է նրանց համար»,-հավելեց Արմեն Հարությունյանը: Նա նաև նշեց, որ հստակեցման է սպասում ապահովագրությունը պարտադիր, թե կամավոր լինելու հարցը:

«Մենք վստահ ենք, որ համակարգն աշխատելու է և այն ոչ միայն նպաստելու է տեղացի գյուղացիների պաշտպանությանը, այլև` ներդրողների ներգրավմանը»,-շեշտեց փոխնախարարը:

Արմեն Հարությունյանը հայտնեց նաև, որ հաջորդ տարի ընտրվելու է վերապահովագրական ընկերություն, որպեսզի մեծ վնասների դեպքում տեղի ապահովագրական ընկերությունները փոխհատուցման հնարավորություն ստանան:

Աղբյուր` Փաստինֆո