Փաստ ինֆո

Նուբարաշենի խճուղում դաժան ծեծի հետևանքով սպանված 58-ամյա Եղիշե Խաչատրյանի գործով այսօր` դատական նիստի ընդմիջման ժամանակ, ամբաստանյալ Արտաշես Չիչոյանի համար շտապօգնություն հրավիրվեց:

Այն, որ շտապօգնություն էր ժամանել դատարան, դատավարությանը ներկա «Փաստինֆո»-ի լրագրողը ինչպես նաև մյուս մասնակիցներն ականատես եղան, սակայն դատական նիստը վերսկսվելուց հետո նախագահող դատավոր Աննա Դանիբեկյանն արձանագրեց միայն շտապօգնություն հրավիրելու փաստը, անգամ չհրապարակեց, թե ամբաստանյալն ինչի՞ց է գանգատվել և թե շտապօգնության բժիշկը ի՞նչ է ախտորոշել:

Իսկ մինչ այդ, գործով դատական նիստի սկզբում տուժողի իրավահաջորդի ներկայացուցիչ փաստաբան Ինեսսա Պետրոսյանը դատարանին տրամադրեց բժշկական փաստաթղթից մի քաղվածք, որում նշվում էր, որ խստիվ արգելվում է տուժող Էմմա Աբրահամյանին սթրեսային իրավիճակներում գտնվել: Պաշտպանը նաև հավելեց, որ տուժող Աբրահամյանը 4 դատական նիստ հարցաքննվել է և նա այնպիսի վիճակում է գտնվել, որ հարցաքննվելու ընթացքում շտապօգնություն հրավիրվելու անհրաժեշտություն է առաջացել:

Ուստիև՝ տուժող կողմը դատարանին խնդրեց ավարտված համարել տուժողի հարցաքննությունը՝ հաշվի առնելով նաև այն, որ տարեց կին է, ունի առոջական խնդիրներ:

Պաշտպանական կողմն առարկեց՝ կարծիք հայտնելով, որ սթրեսային վիճակում անձը կարող է հայտնվել նաև ֆիլմ դիտելուց, ավելի՝ սթրեսային վիճակը իրավական կատեգորիա չէ և որ իրենք առաջնորդվում են քրեական դատավարության պահանջներով, որով սահմանվում է տուժողի հարցաքննության կարգը:

Միևնույն ժամանակ պաշտպանական կողմը մտավախություն հայտնեց, որ այս իրավիճակը կարող է վատ նախադեպ լինել՝ հետագայում էլ այլ գործերով վկաները բժշկից փաստաթուղթ ներկայացնեն՝ հրաժարվելով ցուցմունք տալուց՝ ասելով, որ սթրեսային վիճակում են հայտնվում:

Յուրի Հակոբյանի պաշտպան Մինասյանն էլ հայտարարեց, որ եթե տուժողը չի ներկայանում դատարան, ինչպե՞ս կարող են այդ ապացույցը դնել մեղադրանքի հիմքում:

Տուժողի իրավահաջորդ լեզվաբան Մեյթիխանյանն էլ հայտարարեց, որ իր համար թանկ է սկեսուրի առողջությունը, ամուսինն այլևս չկա, և սկեսուրի ապրած յուրաքանչյուր օրն իրենց համար թանկ է:

Ստեղծված իրավիճակից դուրս գալու համար պաշտպանական կողմը դատարանին միջնորդեց տուժողի հարցաքննությունը համարեն չավարտված, ապացույցների հաջորդականության նոր կարգ սահմանել և առաջ անցնել, երբ տուժողի առողջական վիճակը կթույլատրի, այդ ժամանակ նրան կհարցաքննեն:

Միջնորդությանն առարկելով՝ տուժողի իրավահաջորդի ներկայացուցիչ Ինեսսա Պետրոսյանը նույնիսկ հրապարակեց տվյալներ, թե ամբաստանյալների պաշտպաններից յուրաքանչյուրը քանի հարց է ուղղել տուժող Էմմա Աբրահամյանի:

Ըստ Պետրոսյանի՝ տուժողին 97 հարց էր ուղղել ամբաստանյալ Խաչիկ Կոսյանի պաշտպան Վաչագան Քոսյանը, 147 հարց՝ Արտաշես Չիչոյանի պաշտպան Միհրան Պողոսյանը, իսկ Արարատ Նիկողոսյանի պաշտպան Լիպարիտ Սիմոնյանը՝ 70 հարց:

Գործով մյուս ամբաստանյալ Յուրի Հակոբյանի պաշտպանի հարցերին տուժող կողմը չէր անդրադարձել:

Եթե մյուս պաշտպաններին գոնե հաջողվել է հարցեր ուղղել տուժողին, թեև չեն սպառել իրենց հարցերը, պաշտպան Մինասյանին այդ հնարավորությունը, կարելի է ասել, չի էլ տրվել, մեկ-երկու հարց է հնչեցրել նախորդ նիստում, որից հետո տուժողի ինքնազգացողությունը վատացել է, և նրան տեղափոխել են հիվանդանոց:

Պաշտպանական կողմը դատարանի ուշադրությունը հրավիրեց նաև այն հանգամանքի վրա, որ ամբաստանյալները ևս հարցեր տալու իրավունք ունեն, սակայն դատախազ Վարդգես Սարգսյանը և տուժողի իրավահաջորդի ներկայացուցիչ Ինեսսա Պետրոսյանը կարծիք հայտնեցին, որ տուժողի հարցաքննությունը կայացած չհամարելու մասին պաշտպանական կողմի հայտարարություններն առարկայազուրկ են:

Դրան ի պատասխան՝ Արտաշես Չիչոյանի պաշտպան Միհրան Պողոսյանը հայտարարեց, որ տուժողի նախաքննական և դատաքննական ցուցմունքներում առկա են բազմաթիվ էական հակասություններ, և այս պայմաններում չի կարող տուժողի ցուցմունքն ավարտված համարել: Այդ հակասությունների վերաբերյալ ևս պաշտպանական կողմը հնարավորություն պետք է ունենա տուժողին հարցեր ուղղելու:

Սակայն դատարանը մերժեց պաշտպանական կողմի միջնորդությունը՝ հարգելի համարելով տուժողի բացակայությունը, գտնելով, որ տուժողի ցուցմունքները չավարտված համարելու պաշտպանական կողմի միջնորդությունն անհիմն է:

Այս պայմաններում պաշտպան Միհրան Պողոսյանը դատարանից մեկ շաբաթ ժամանակ խնդրեց՝ նախ նախագահողին ինքնաբացարկ հայտնելու, ապա նաև իր կողմից վկայակոչված՝ տուժողի նախաքննական և դատաքննական ցուցմունքներում առկա հակասությունները վեր հանելու և դատարանին ներկայացնելու համար:

Դատարանը որոշեց, որ պաշտպանին մեկ ժամը բավարար է և դատական նիստը ընդմիջեց, այդ ընթացքում էլ ամբաստանյալ Չիչոյանի ինքնազգացողությունը վատացավ:

Այսպես, հիշեցնենք, որ այս գործը դատավոր Դանիբեկյանի վարույթում է 26.12.2016 թվականից, շուրջ մեկ տարվա ընթացքում նշանակվել է 16 դատական նիստ, որից մեկը չի կայացել նախագահողի վատառողջ լինելու պատճառաբանությամբ:

Նշենք նաև, որ ապացույցների հաջորդականության կարգ սահմանելիս դատարանը սկզբից որոշել էր հարցաքննել տուժողներին, սակայն, ինչպես տեսնում ենք, մինչ այս պահն ընդամենը մեկ տուժողի է դատարանը լսել:

Դատական հաջորդ նիստը նշանակվեց դեկտեմբերի 25-ին, թեև դատավարության կողմերը նշեցին, որ այդ օրը նախապես նշանակված նիստեր ունեն, սակայն դատարանը հայտարարեց՝ այդպես է որոշվել:

Աղբյուր` Փաստինֆո