Փաստ ինֆո

Մամուլի ազատության հարցերով ԵԱՀԿ ներկայացուցիչ Հարլեմ Դեզիրը մտահոգություն է հայտնել Ադրբեջանում Kanal 13 ինտերնետային հեռուստաընկերության ղեկավար Ազիզ Օրուջևի հանդեպ կայացված դատավճռի առնչությամբ: Այս մասին «Արմենպրես»-ին տեղեկացրին ԵԱՀԿ մամուլի ծառայությունից:

Ծանր հանցագործությունների Բաքվի դատարանը դեկտեմբերի 15-ին Օրուջևին դատապարտել է վեց տարվա ազատազրկման ապօրինի ձեռնարկատիրության և իշխանության չարաշահման համար:

«Կոչ եմ անում իշխանություններին վերանայել Ազիզ Օրուջևի դատավճիռը և վերջ դնել նրա ազատությանն ու անվտանգությանը սպառնացող սահմանափակող միջոցներին: Հուսով եմ, որ այս վճիռը կվերանայվի վերաքննիչ բողոքի ընթացքում»,- նշել է Դեզիրը: ԵԱՀԿ ներկայացուցիչը հիշատակել է նաև 2017թ-ի մայիսին Թբիլիսիում առևանգված լրագրող Աֆղան Մուխտարլիի դեպքը:

«Հաշվի չառնելով այն լրջագույն տեղեկությունները, որ Մուխտարլին առևանգվել է, և Ադրբեջանում նրա հանդեպ- ներկայացվել են շինծու մեղադրանքներ՝ Մուխտարլին պահվում է անազատության մեջ, ինչը մտահոգիչ է: Կոչ եմ անում իշխանություններին վերացնել լրագրողի հանդեպ բոլոր մեղադրանքները և հարգել նրա ազատ արտահայտման իրավունքը»,- նշել է Հարլեմ Դեզիրը: Նա նաև շեշտել է, որ լրագրող Խադիջա Իսմայիլովայի բանկային հաշիվների սառեցումը, երկրից դուրս գալու սահմանափակումը լուրջ քայլեր են, որոնք խոչընդոտում են լրագրողների մասնագիտական գործունեությունը: Դեզիրը նաև հիասթափություն է հայտնել Բաքվի Վերաքննիչ դատարանի կայացրած որոշման առնչությամբ, որով պահպանվում էր բլոգեր և Լրագրողների պաշտպանության և անվտանգության ինստիտուտի ներկայացուցիչ Մեհման Հուսեյնովի՝ երկու տարվա ազատազրկման որոշումը:

Աղբյուր` Փաստինֆո