Փաստ ինֆո

Հայաստանը պարտադրված է ունենալ այն զինված ուժերը, որն ունի այսօր, քանի որ դա հնարավորություն կտա լուծել երկրի անվտանգության խնդիրները: Ինչպես հաղորդում է «Արմենպրես»-ը, այս մասին «Արմենիա» հեռուստաընկերությանը տված հարցազրույցում ասել է ՀՀ Նախագահ Սերժ Սարգսյանը:

«Global Military» ինդեքսը Հայաստանը համարում է Եվրոպայի ամենառազմականացված երկիրը և աշխարհի երրորդը: Պատասխանելով հարցին, թե չի մտահոգում իրեն այն, որ մենք դառնում ենք բանակ-պետություն՝ Սերժ Սարգսյանն ասել է.

«Ո՛չ, իհարկե չի մտահոգում: Նախ՝ դա մեր թերությունն է. իշխանությունների թերությունն է, որ այդպիսի տեղեկություններ հայտնվելուն պես՝ մենք բացատրական աշխատանքներ չենք կատարում: Գիտեք, այդպիսի ռեյտինգները, այդպիսի չափորոշիչները, դրանք միշտ յուրահատուկ են և առաջին հայացքից ստեղծվող տպավորությանը ոչ համապատասխանող:

Ի՞նչ նկատի ունեմ: Դուք ասում եք՝ ռազմականացված պետություն. առաջին տպավորությունն այն է, թե փողոցում տանկ կա, և նույնիսկ եթե տանկ չկա, ապա պետությունն ընդհանրապես ռազմականացված է, քաղաքացիական իրավունքները սահմանափակված են և այլն: Փառք Աստծո, որևէ մեկը դա չի կարող ասել»:

ՀՀ Նախագահն ընդգծել է, որ այդ ռեյտինգը որոշվել է մի քանի չափորոշիչներով. օրինակ՝ բնակչության մեկ շնչին ընկնող ծանր տեխնիկայի թվով:

«Իհարկե, նորմալ պայմաններում որևէ մեկի մտքով չէր անցնի, որ երեք միլիոն ժողովուրդը ունենար այսպիսի զինված ուժեր, բայց արդյո՞ք մենք կամավոր ենք այդ ճանապարհն ընդունել, մենք պարտադրված ենք դա անել:

Մի կողմից մեզ մեղադրում են, որ իբր թե մենք ավելի թույլ ենք ռազմականապես, քան Ադրբեջանը, մյուս կողմից ասում են ռազմականացված եք, հիմա ինչպե՞ս հասկանանք, ո՞րն է այն ոսկե միջինը:

Մենք պարտադրված ենք, մենք ուղղակի պարտադրված ենք ունենալ այն նվազագույնը, որը հնարավորություն կտա լուծել մեր անվտանգության խնդիրները: 2016 թվականի ապրիլն էլ ցույց տվեց, որ մենք մեզ ավելորդություններ թույլ չենք տվել և ավելորդ բաներ չունենք»,- հայտարարել է Նախագահ Սարգսյանը:

Աղբյուր` Փաստինֆո