Փաստ ինֆո

Ժիրայր Սեֆիլյանի ու մյուսների գործով այսօրվա դատական նիստում շարունակեցին ցուցմունքներ տալ ամբաստանյալները:

Մասնավորապես, ամբաստանյալ Գալուստ Գրիգորյանը հայտարարեց, որ հարցաքննության ժամանակ մտերմիկ վիճակ է ձևավորվել, անգամ ինքը քննիչի խնդրանքով իրենց համար սուրճ է պատրաստել, և ինքը՝ վստահելով քննիչին, չի կարդացել հարցաքննության արձանագրությունը, չի մտածել, որ կարձանագրվի այն, ինչ ինքը չի ասել:

Գալուստ Գրիգորյանը հայտարարեց, որ ընդունում է զենք փոխադրելու մեղադրանքը, բայց որ ասում են «զինված խումբ», դա հեքիաթ է. «…ոչ լսել եմ նման բան, ոչ էլ դրա անդամ եմ եղել»:

Ըստ Գալուստ Գրիգորյանի, տեղեկություններ չի ունեցել, որ Գևորգ Սաֆարյանը և Ժիրայր Սեֆիլյանը զանգվածային անկարգություններ են նախապատրաստել: Նա հայտարարեց, որ Գևորգ Սաֆարյանին ընդհանրապես չի ճանաչել, իսկ Սեֆիլյանին ճանաչել է հեռուստացույցից՝ որպես Արցախյան ազատամարտի հերոսի:

Ըստ ամբաստանյալի, Ժիրայր Սեֆիլյանի կողմից հեռուստաաշտարակ գրավելու նախապատրաստվելու մասին իրեն տվյալներ հայտնի չեն եղել:

Իսկ նախաքննական ցուցմունքում Գալուստ Գրիգորյանն ասել է. «2015թ. Հովհաննես Պետրոսյանը մեզ ասել էր, որ Ժիրայր Սեֆիլյանը ցանկանում է հեղաշրջում կատարել, ես ու Ներսես Պողոսյանն էլ, դժգոհ լինելով իշխանություններից, որոշել էինք մասնակցել հեղաշրջմանը: Ես և Հովհաննեսն անգամ մեկ անգամ ուսումնասիրեցինք Հանրային հեռուստատեսության հեռուստաաշտարակը, որը, ինչպես Հովհաննեսն էր ասել, պետք է գրավվեր դեկտեմբերի մեկին:

Սեֆիլյանը Հովիկին ասել էր, որ մեր նման էլի հայրենասերներ կան եւ հեռուստաաշտարակի գրավման ժամանակ օգնության են գալու լրացուցիչ ուժեր: Իսկ թե ինչ ուժերի մասին է խոսքը, չի ասել: Հովիկը նկատեց աշտարակի հարևանությամբ կառուցվող շինությունը և ասաց, որ այն դիպուկահարի համար լավ դիրք է»:

Լուսանկարը՝ Ֆոտոլուրի

Աղբյուր` Փաստինֆո