Փաստ ինֆո

Կրասնոդարի երկրամասային դատարանը դեկտեմբերի 26-ին նշանակել է Սոչիի բնակիչ Պյոտր Պինչուկի վերաբերյալ քրեական գործով նախնական լսում: Ըստ crimerussia.com-ի, նա մեղադրվում է «հեղինակավոր» ձեռնարկատերեր Էդուարդ Կագոսյանի ու Թիմուր Մամուլիայի սպանությունների կազմակերպման, ինչպես նաև դրանց կատարմանը մասնակցելու մեջ: Բացի դրանից Պինչուկը մեղադրվում է նաև զենքի անօրինական շրջանառության մեջ:

Գործարար Էդուարդ Կագոսյանին, ով մտնում էր ներկայումս հանգուցյալ Դեդ Հասանի մերձավոր շրջապատի մեջ, սպանել են նրան պատկանող «Ակվա- Հաուս» սրճարանում 2010թ. հոկտեմբերին: 2 տարի անց Կագոսյանի քրոջ ամուսին Թիմուր Մամուլիան սպանվել է նույնպես այնտեղ: Երկու հանցագործությունների հանգամանքները նման են եղել իրար: Մարդասպանները մոտեցել են սրճարանին մոտոցիկլետով, ատրճանակից կրակել ու հեռացել: Ընդ որում, սպանությունները կատարողների գլուխներին եղել են մոտոցիկլետային սաղավարտներ:

Քննության վարկածի համաձայն, երկու հանցագործությունների կատարողներ են եղել Պյոտր Պինչուկն ու Դենիս Մուրդալովը: Ընդ որում, Էդուարդ Կագոսյանի սպանության պարագայում, ինչպես համարում է քննությունը, Պյոտր Պինչուկն եղել է հարձակման կազմակերպիչը՝ կատարելով չպարզված անձի պատվերը: Մինչդեռ Մամուլիային Պինչուկը սպանել է սեփական նախաձեռնությամբ, քանի որ վախենում էր առաջին զոհի հարազատների վրեժից:

Մուրդալովին կալանավորել են դեռևս 2012թ., իսկ Պինչուկը թաքնվել է Հունաստանում: Այնտեղից մեղադրյալը դատարանի որոշմամբ 2016թ. էքստրադիցիայի է ենթարկվել: 2017թ. փետրվարին Կրասնոդարի երկրամասային դատարանի ատենակալների կոլեգիան Դենիս Մուրդալովին անմեղ է ճանաչել Կագոսյանի ու Մամուլիայի սպանության կատարման մեջ, սակայն ընթացիկ տարվա մայիսին Գերագույն դատարանը բեկանել է այդ որոշումը ու ուղարկել գործը նոր քննության: Պյոտր Պինչուկի գործը կարող է մեկ վարույթում միավորված լինել Դենիս Մուրդալովի գործի հետ, քանի որ այդ մասին խնդրում են ինչպես տուժողները, այնպես էլ պաշտպանական կողմը:

Աղբյուր` Փաստինֆո