Փաստ ինֆո

Ցմահ դատապարտյալին իբրև թե ներմամբ կամ համաներմամբ ազատ արձակելու պատրվակով առանձնապես խոշոր չափերի խարդախության և նույնչափ կաշառք տալու փորձին դրդելու վերաբերյալ գործով դատաքննությունն այսօր ավարտվեց: Մեղադրողին ժամանակ տրամադրվեց մեղադրական ճառի հրապարակմանը նախապատրաստվելու համար:

Այսօրվա դատական նիստում հրապարակվեցին տուժողի՝ հոկտեմբերի 27-ի ահաբեկչության գործով ցմահ դատապարտյալ, ներկայումս հանգուցյալ Էդուարդ Գրիգորյանի մոր և գործով ամբաստանյալ Թերեզա Սարգսյանի նախաքննության ժամանակ անցկացված առերես հարցաքննության արձանագրությունները: Տուժողն այն ժամանակ հարցաքննվել է վկայի, իսկ ամբաստանյալը կասկածյալի կարգավիճակում:

Սպառնացել են Նաիրի Հունանյանի մոր պես տուժողին խեղդել ու ջուրը գցել, իսկ նրա որդուն՝ բանտում ոչնչացնել

Ըստ դատարանում հրապարակված Թերեզա Սարգսյանի պատասխանների, ինքը տուժողից գումար չի պահանջել ու չի ստացել:

Ըստ ամբաստանյալի, ինքը գործով վկա Վարսիկ Մկրտչյանի խնդրանքով գրել է Էդիկ Գրիգորյանի անունով ներման վերաբերյալ դիմումը և այն հանձնել Վարսիկին, որի հետ եղել է տուժողը: «Ես լրագրողիկ չէի, որ դիմումի համար գումարներ պահանջեի կամ անհեթեթ ու անպատասխանատու հայտարարություններ անեի՝ մոլորեցնելով այդ մարդկանց»,- ասել է Թերեզա Սարգսյանը: Ըստ նրա, իր դեմ ցուցմունքներ տված Մկրտչյանն ու Օհանյանն իր դեմ դավեր են նյութում, փորձում են անավարտ թողնել իր գիրքը գնդակահարության և նոր օրենսդրությամբ ցմահ դատապարտվածների, ներառյալ հոկտեմբերի 27- ի գործով դատապարտվածների, վերաբերյալ: Նա տեսակետ է հայտնել, որ տուժողը գիտակցում էր, որ եթե դատապարտվածների վերաբերյալ գիրք հրատարակվի, ապա հետագայում նրանց գործերը վերաբացելու կամ ներում շնորհելու հույս չի լինի:

Մահացել է Հոկտեմբերի 27-ի գործով ցմահ ազատազրկման դատապարտյալ Էդվարդ Գրիգորյանը

Հիշեցնենք, որ ըստ մեղադրանքի, ամբաստանյալ Թերեզա Սարգսյանը ցմահ ազատազրկում կրող Էդուարդ Գրիգորյանի նկատմամբ համաներում կիրառելու և ներում շնորհելու կեղծ խոստմամբ, վերջինիս մորը՝ Թերեզա Օհանյանին, դրդել է իր միջոցով առանձնապես խոշոր չափերով՝ 4.903.740 ՀՀ դրամին համարժեք 12 000 ԱՄՆ դոլար գումար կաշառք տալ պաշտոնատար անձանց, ապա, ստանալով նշված գումարը, հափշտակել է առանձնապես խոշոր չափերով գույքը։

Նշենք, որ Էդիկ Գրիգորյանը նոյեմբերի 3-ին մահացել է. Քրեակատարողական վարչության հանրային կապերի բաժնից հաղորդել են, որ  դատապարտյալը սրտի շրջանում ցավեր է ունեցել, շտապօգնություն է հրավիրվել և նա տեղափոխվել է «Էրեբունի» բժշկական կենտրոն, որտեղև գրանցվել է կենսաբանական մահ։

Աղբյուր` Փաստինֆո