Փաստ ինֆո

Արաբկիր վարչական շրջանի տարածքում խմբով ավազակություն կատարելու գործով ամբաստանյալ Սուրեն Կիրակոսյանը մեղավոր է ճանաչվել ՀՀ քրեական օրենսգրքի 175-րդ հոդվածի 2-րդ մասի 1-ին, 3-րդ, 4-րդ կետերով (մի խումբ անձանց կողմից նախնական համաձայնությամբ, բնակարան ապօրինի մուտք գործելով, զենքի կամ որպես զենք օգտագործվող այլ առարկաների գործադրմամբ ավազակություն) և դատապարտվել 6 տարվա ազատազրկման:

Ամբաստանյալ Միքայել Մինասյանը մեղավոր է ճանաչվել նույնպիսի մեղադրանքում և դատապարտվել ազատազրկման 6 տարի 6 ամիս ժամկետով:

Միաժամանակ նշանակված պատժին լրիվ գումարվել է մեկ այլ դատավճռով կողոպուտի մեղադրանքով ազատազրկման ձևով նշանակված 6 ամիս ժամկետով պատիժը և վերջնական պատիժ է սահմանել ազատազրկում 7 տարի:

Ըստ մեղադրանքի, Սուրեն Կիրակոսյանը, ավազակությամբ ուրիշի գույքի հափշտակություն կատարելու դիտավորությամբ, նախնական համաձայնության գալով Միքայել Մինասյանի հետ, 2016 թվականի նոյեմբերի 23-ին ժամը 20.40-ի սահմաններում, դիմակավորված, բաց դռնից ապօրինի մուտք են գործել Արաբկիր վարչական շրջանի տարածքում գտնվող մի տուն, որտեղ Ս.Կիրակոսյանը իր մոտ գտնվող որպես զենք օգտագործվող կրակայրիչ ատրճանակի գործադրմամբ, իսկ Մ.Մինասյանը իր մոտ գտնվող որպես զենք օգտագործվող ծալովի դանակի գործադրմամբ, տան նախասրահում, առողջության համար վտանգավոր բռնություն գործադրելու սպառնալիքով հարձակվել են նշված տան բնակչուհի Գայանեի վրա, որի ընթացքում Ս.Կիրակոսյանը փակել է վերջինիս բերանը և իր մոտ գտնվող կրակայրիչ ատրճանակը պահել նրա քունքի հատվածում, իսկ Մ.Մինասյանը իր մոտ գտնվող ծալովի դանակը պահել է նրա պարանոցի հատվածում:

Դրանից հետո կնոջը հրելով մտցրել են տան ննջասենյակ, որտեղ Ս.Կիրակոսյանը, շարունակելով իր հանցավոր գործողությունները, ատրճանակը պահել է ննջասենյակում գտնվող Գայանեի ու նրա մոր ուղղությամբ, հրամայել ձայն չհանել, հակառակ դեպքում սպառնալով սպանել նրանց, իսկ Մ.Մինասյանը հարձակվել է ննջասենյակի մահճակալի վրա պառկած՝ Գայանեի եղբոր` Հովհաննեսի, վրա, և փորձել կպչուն ժապավենով և պոլիէթիլենային ամրակներով կապել վերջինիս ձեռքերը: Հանդիպելով նրա դիմադրությանը, այն կոտրելու նպատակով, առողջության համար վտանգավոր բռնություն է գործադրել վերջինիս նկատմամբ` իր մոտ գտնվող ծալովի դանակով հարվածելով նրա ձախ ոտքին:

Այդ ընթացքում Գայանեն ազատվել է Ս.Կիրակոսյանի ձեռքերից և բարձրանալով ննջասենյակի պատուհանի տակ դրված բազմոցի վրա բարձրաձայն օգնություն է կանչել: Ս.Կիրակոսյանը և Մ.Մինասյանը օգնության կանչերի հետևանքով բռնվելուց և բացահայտվելուց վախենալով` ոչինչ չհափշտակելով դիմել են փախուստի` չկարողանալով մինչև վերջ հասցնել իրենց հանցավոր մտադրությունը:

Դատարանն ապացուցված է համարել, որ ամբաստանյալներ Սուրեն Կիրակոսյանը և Միքայել Մինասյանը կատարել են արարք, որը համապատասխանում է ՀՀ քրեական օրենսգրքի 175-րդ հոդվածի 2-րդ մասի 1-ին, 3-րդ, 4-րդ կետերի հատկանիշներին, հետևաբար նրանք պետք է քրեական պատասխանատվության ենթարկվեն և պատիժ կրեն:

Աղբյուր` Փաստինֆո