Փաստ ինֆո

Ժիրայր Սեֆիլյանի և մյուսների գործով ամբաստանյալ Հովհաննես Պետրոսյանը գտնում է, որ իր և Սեֆիլյանի մասով առաջադրված մեղադրանքները լավագույն մեղմ տարբերակն է և ի տարբերության Սեֆիլյանի՝ ինքը շնորհակալ է դրա համար:

Այդ մասին Շենգավիթ վարչական շրջանի ընդհանուր իրավասության դատարանում հայտարարեց ամբաստանյալ Պետրոսյանը՝ պատասխանելով Սեֆիլյանի պաշտպան Հայրապետյանի հարցերին, ապա նաև փորձեց բացատրել, թե ինչու:

Առաջադրված մեղադրանքների՝ կյանքի համար վտանգավոր բռնություն գործադրելով շենք, շինություններ զավթելու մասով ամբաստանյալը նշեց՝ եթե այս իրավիճակում մենք հեռուստաաշտարակը դիտում ենք շինությունը, ապա զորամասը միայն շինություն չէ, առավել ևս, եթե հաշվի ենք առնում, որ պատերազմող երկիր ենք և լարված իրավիճակ է, ապա նման պայմաններում սա լավագույն մեղմ տարբերակն է:

Ամբաստանյալի խոսքով՝ ինքը վատ իրավիճակում է, ունի առողջական խնդիրներով մայր, ընտանիք և գտնվում է կալանավայրում, սակայն եթե իր՝ դատարանում հայտնվելը նպաստելու է Հայաստանի ազգային շահերին, ապա միայն հպարտ է դրա համար:

Ըստ Պետրոսյանի՝ ինքը խաբված է եղել. «Անկախ նրանից իշխանությանը կուզենք, թե՝ ոչ, լավ կլինի, թե՝ ոչ, իր համար գերակա է պետության, ազգային շահը»:

Հովհաննես Պետրոսյանն իրեն որպես գործակալ ընկալող Սեֆիլյանի պաշտպանին էլ խորհուրդ տվեց գործակալին փնտրել այնտեղ, որտեղ չի սպասում և եթե ինքը գործակալ լիներ, ապա իր և Սեֆիլյանի հանդիպումների ձայնագրությունները գոնե գործի նյութերում կլինեին, սակայն նման բան չկա:

«Ամբողջ աշխարհում հպարտանալու բան է պետության մարդ լինելը, իսկ Հայստանում անձին վարկաբեկելու համար ասում են պետության մարդ է»,- ասաց Պետրոսյանը՝ հավելելով, որ չի ցանկանում մասնակից լինել քաղաքական թատրոնների:

Լուսանկարը՝ ֆոտոլուրի

Աղբյուր` Փաստինֆո