Փաստ ինֆո

Առանձնապես խոշոր չափերով կաշառք ստանալու, դրան օժանդակելու և կաշառք տալու գործով մեղադրյալ փաստաբան Գայանե Գալոյանին «Աբովյան» ՔԿՀ-ից տեղափոխել են քաղաքացիական հիվանդանոց:

«Փաստինֆո»-ն Գայանե Գալոյանի պաշտպան Մնացական Ղազարյանից տեղեկացավ, որ նախաքննական մարմինը բավարարել է Գալոյանի նկատմամաբ հանձնաժողովային դատաբժշկական փորձաքննություն նշանակելու վերաբերյալ միջնորդությունը և փաստաբանը նախօրեին կալանավայրից տեղափոխվել է քաղաքացիական հիվանդանոց՝ փորձաքննությունն իրականացնելու նպատակով:

Ըստ պաշտպանի՝ Գալոյանի առողջական վիճակը կտրուկ վատացել է, ասթմայի նոպաներ է ունեցել և նման պայմաններում անհրաժեշտություն է առաջացել՝ այդ միջնորդությունը ներկայացնելու վերաբերյալ:

Հիշեցնենք, որ այսօր ավելի վաղ ՀՔԾ-ն, պաշտոնական հաղորդագրությամբ հանդես գալով, տեղեկացրել է, որ քրեական գործի նախաքննությունն ավարտվել է, և գործը՝ մեղադրական եզրակացությամբ, հանձնվել է դատավարական հսկողություն իրականացնող դատախազին` այն հաստատելու և դատարան ուղարկելու համար:

Ավելի վաղ պաշտպանը մեզ հետ զրույցում տեղեկացրել էր, որ փաստաբան Գայանե Գալոյանի ինքնազգացողությունը մինչև նրա կալանավորումը վատացել էր, դատարան է հրավիրվել շտապօգնություն և դեղորայքի միջոցով փորձ է արվել բարձր զարկերակային ճնշումը կարգավորել, սակայն նա հոսպիտալացվել է շաքարախտի պատճառով և գտնվում էր Երևանի հիվանդանոցներից մեկի ինտենսիվ թերապիայի բաժանմունքում:

Գայանե Գալոյանին մեղադրանք է առաջադրվել ՀՀ քրեական օրենսգրքի 38-311-րդ հոդվածի 4-րդ մասի 2-րդ կետով:

Տեղեկացրել էինք նաև, որ կալանավորվելու վերաբերյալ առաջին ատյանի դատարանի որոշման դեմ Գալոյանի պաշտպանի բերած վերաքննիչ բողոքը մերժվել է:

Աղբյուր` Փաստինֆո