Փաստ ինֆո

Տավուշի մարզային վարչության Իջևանի բաժնի քրեական հետախուզության բաժանմունքի պետի կողմից խոշտանգման վերաբերյալ գործը ըստ ամենայնի շուտով կուղարկվի Տավուշի մարզի ընդհանուր իրավասության դատարան՝ քննության: Այս մասին «Փաստինֆո»-ի լրագրողը տեղեկացավ «Ընդդեմ իրավական կամայականության» ՀԿ փաստաբան Արա Ղարագյոզյանից, ով օրերս ներգրավվել է որպես տուժող ճանաչված քաղաքացու ներկայացուցիչ:

Հիշեցնենք, որ ՀՀ հատուկ քննչական ծառայությունում քննված քրեական գործի նախաքննության ընթացքում ձեռք բերված բավարար ապացույցներով հիմնավորվել է, որ ՀՀ ոստիկանության Տավուշի մարզային վարչության Իջևանի բաժնի քրեական հետախուզության բաժանմունքի պետ  Գերասիմ Մարդանյանը 2017 թվականի հոկտեմբերի 4-ին խոշտանգել է Տավուշի մարզի բնակիչ Ժ․ Ս․-ին:

ՀՀ ոստիկանության Տավուշի մարզային վարչության Իջևանի բաժնի ծառայողները 2017 թվականի հոկտեմբերի 4-ին Տավուշի մարզի Այգեհովիտ գյուղի բնակիչ Վ․ Ս․-ին ապօրինի ծառահատում կատարելու կասկածանքով բերման են ենթարկել ոստիկանության Իջևանի բաժին: Ոստիկանության աշխատակիցների պահանջով Վ. Ս․-ի եղբայրը՝ Ժ․ Ս․-ը, ՀՀ ոստիկանության Իջևանի բաժին է տեղափոխել եղբոր վարած ավտոմեքենան, որից հետո ոստիկանները նրան ուղեկցել են Իջևանի բաժնի աշխատասենյակներից մեկը: Այնուհետև աշխատասենյակ է մտել հիշյալ բաժնի քրեական հետախուզության բաժանմունքի պետը,   և ենթադրելով,  որ Ժ․ Ս․-ը նույնպես մասնակցել է ապօրինի ծառահատմանը, եղբոր հետ գտնվել է նույն ավտոմեքենայում ու չի ենթարկվել ավտոմեքենան կանգնեցնելու` ոստիկանների պահանջին, այդ արարքի համար պատժելու նպատակով խոշտանգել է վերջինիս. ապտակել է դեմքին, ոտքերով հարվածել որովայնին և ոտքերին՝ պատճառելով մարմնական վնասվածքներ:

«Պապ, մեզ ստեղ ծեծում են». Իջևանի քրեականի պետը բաժնում խոշտանգել է 19-ամյա տղային. «Հայկական Ժամանալ»

Գերասիմ Մարդանյանին մեղադրանք է առաջադրվել մեղադրանք է առաջադրվել ՀՀ քրեական օրենսգրքի 309.1 հոդվածի՝ Խոշտանգումը,  1-ին մասով:

«Փաստինֆո»-ի լրագրողի հետ զրույցում տուժողի ներկայացուցիչ Արա Ղարագյոզյանը նշեց, որ իր գործունեության քսան տարվա ընթացքում «Ընդդեմ իրավական կամայականության» ՀԿ-ն առաջին անգամ է առնչվում դեպքի, որի քննությամբ  պաշտոնյայի արարքը որակվել է որպես խոշտանգում,  որի նախաքննությունն ավարտվել է ու մեղադրական եզրակացության հաստատման համար  ուղարկվել է դատավարական հսկողություն իրականացնող դատախազին:

Ըստ փաստաբանի, նախկինում  նման գործերը հիմնականում  որակվում էին որպես լիազորությունների անցում և դրանց վարույթը կարճվում էր:

Արա Ղարագյոզյանը դրական է գնահատում, որ ՀՔԾ-ն իրականացրել է օբյեկտիվ քննություն, քաղաքական կամք է դրսևորել ու 4-8 տարվա ազատազրկում նախատեսող խոշտանգման մեղադրանքով  գործը կուղարկվի դատարան, որտեղ ըստ ամենայնի առաջին անգամ  կքննվի պաշտոնյայի կողմից խոշտանգման գործ,  և քաղաքացու խախտված իրավունքները կվերականգնվեն:

Փաստաբանը անձնական տեսակետ հայտնեց ու չբացառեց, որ դա կարող է ԵՄ-ի հետ Հայաստանի կնքած պայմանագրի ազդեցությունը լինել:

Աղբյուր` Փաստինֆո