Փաստ ինֆո

Լեզվաբան Փառանձեմ Մեյթիխանյանի ամուսնու սպանության գործով այսօրվա դատական նիստին չէր ներկայացել տուժող Էմմա Աբրահամյանը:

Տուժողի իրավահաջորդը՝ լեզվաբան Փառանձեմ Մեյթիխանյանը, հայտարարեց, թե իր սկեսուրն այլևս դատարան չի ներկայանալու, իսկ նախորդ նիստերին սկեսուրին բերել է դատարան, որպեսզի ամբաստանյալների հարազատները, բարեկամները համոզվեն իրենց մեղավորության մեջ. «Ես մի մեծ կորուստ ունեցել եմ և այլևս երկրորդը չեմ ցանկանում ունենալ»,- հայտարարեց Մեյթիխանյանը:

Հիշեցնենք, որ նախորդ՝ հոկտեմբերի 31-ին կայացած դատական նիստում՝ Աբրահամյանի հարցաքննության ժամանակ, նրա ինքնազգացողությունը վատացավ, և դատարան շտապօգնություն հրավիրվեց:

Այսօր Ինեսսա Պետրոսյանը դատարանին տրամադրեց «Էրեբունի» ԲԿ-ի կողմից տրված տեղեկանք, ըստ որի՝ Էմմա Աբրահամյանն ստացել է ստացիոնար բուժում անհետաձգելի սրտաբանության բաժանմունքում՝ 31.10.2017թ. մինչև 03.11.2017թ:

Հիվանդի մոտ ախտորոշվել է ՍԻՀ անկայուն ստենոկարդիա, նախասրտերի ֆիբրիլյացիայի պարոքսիզմ, զարկերակային հիպերտենզիա, հիպերտոնիկ կրիզ, ցերեբրյալ աթերոսկլերոզ, խրոնիկական բրոնխիտ, քարային խոլեցեստիտ և այլ հիվանդություններ:

Ընդ որում՝ ԲԿ-ի համապատասխան գրության մեջ նշվում էր նաև, որ հիվանդի մոտ վերը նշված պաթոլոգիաների առկայությունը հաշվի առնելով՝ խորհուրդ չի տրվում նրան ներկայանալ դատարան՝ ցուցմունքներ տալու:

Այս ամենից բացի, փաստաբանը գտնում է, որ Աբրահամյանը 4 դատական նիստ հարցաքննվել է, մանրամասն ցուցմունքներ է տվել, ուստի՝ նրա առողջական վիճակով դատարան ներկայանալը և ցուցմունքներ տալը կարող է էլ ավելի վնասել նրան:

Ինեսսա Պետրոսյանը կարծիք հայտնեց, որ կարելի է ավարտված համարել նրա հարցաքննությունը:

Փաստաբանի այս հայտարարության վերաբերյալ Արարատ Նիկողոսյանի պաշտպան Լիպարիտ Սիմոնյանը հակադարձելով ասաց, որ քրեական դատավարության օրենսգիրքը չի սահմանում, թե քանի նիստով պետք է հարցաքննվի տուժողը: Բացի այդ, բժիշկը փորձագետ չի և չի կարող նման գնահատական տալ՝ խուրհուրդ է տրվում տուժողին հարցաքննվել, թե՝ ոչ:

Պաշտպանը նաև հայտարարեց, որ տուժողի նախաքննական և դատաքննական ցուցմունքներում առկա են հակասություններ, և դատարանը պարտավոր է միջոցներ ձեռնարկել՝ տուժողին լիարժեք հարցաքննելու համար:

Ուստիև՝ պաշտպանը դատարանին խնդրեց ապահովել իրենց պաշտպանական իրավունք, իսկ եթե ոչ, ապա դատախազը կարող է հրաժարվել այդ ապացույցից:

Այս հանգամանքին անդրադարձավ նաև ամբաստանյալ Արտաշես Չիչոյանի պաշտպան Միհրան Պողոսյանը՝ նշելով, որ այս պահին արդեն հակասություններ կան տուժողի ցուցմունքներում, իսկ նախաքննական ցուցմունքը պետք է հրապարակվի տուժողի ներկայությամբ, որպեսզի կարողանան իրենց հարցերը տալ այդ հակասությունների առնչությամբ: Իսկ տուժողի կիսատ ցուցմունքը չի կարող հետազոտված ապացույց համարել:

Գործով ամբաստանյալ Խաչիկ Կոսյանի պաշտպան Վաչագան Քոսյանն էլ հայտարարեց, որ լեզվաբան Մեյթիխանյանը ղեկավարել է նախաքննությունը և այսօր էլ ցանկանում է ղեկավարել դատաքննությունը: Պաշտպանը նաև հայտարարեց, որ դեռևս նախորդ նիստի հաջորդ օրը Մեյթիխանյանը հոդվածով է հանդես եկել, որ այլևս իր սկեսուրին դատարան չի բերելու, նման պայմաններում որտեղի՞ց Մեյթիխանյանը գիտեր, որ օրեր անց՝ տուժողի ստացիոնար բուժում ստանալուց հետո, բժիշկն այսպիսի գրություն էր տալու:

Գործով ամբաստանյալ Յուրի Հակոբյանի պաշտպանը ևս դատարանին խնդրեց ապահովել իրենց պաշտպանական իրավունքը և տուժողին հարցաքննելու լիարժեք հնարավորություն տալ:

Մեղադրանքից հրաժարվելու վերաբեյալ պաշտպանի հայտարարությանն արձագանքելով՝ դատախազը կարծիք հայտնեց, թե պաշտպանը թյուրիմացության մեջ է, և ինքը չի պատրաստվում հրաժարվել մեղադրանքից, իսկ բժշկի տված փաստաթուղթը վիճարկման ենթակա չէ, և որ պաշտպանական կողմը ևս կարող է դիմել ԲԿ՝ տուժողի առողջական վիճակի վերաբերյալ համապատասխան պարզաբանում ստանալու:

Նշենք, որ պաշտպանական կողմը դատարանից պահանջեց իրենց ևս տրամադրել տուժողի առողջական վիճակի մասին տեղեկանքը, որպեսզի ծանոթանան, և խնդրեցին դատական նիստը հետաձգել՝ ապահովելով տուժողի ներկայությունը:

Դատական նիստը կարճ ժամանակով հետաձգվեց, պաշտպանական կողմին տրամադրվեց այդ տեղեկանքը, սակայն դրա վերաբերյալ վերջիններս նշեցին, որ պետք է նախ համապատասխան ոլորտի մասնագետից պարզաբանում ստանալ՝ դրանում նշված հիվանդությունների վերաբերյալ, բացի այդ, նշված հիվանդություններն այնպես չէ, որ մեկ օրվա ընթացքում է տուժողը ձեռք բերել:

Իսկ նման պայմաններում նա կարողացել է նախաքննության ընթացքում մի քանի անգամ ցուցմունք տալ, իսկ դատարանում ինչո՞ւ չի կարող:

Դատարանն էլ տուժողի իրավահաջորդի ներկայացուցչից պահանջեց բժշկից համապատասխան նոր գրություն ստանալ, թե որքան ժամանակ հետո կարող տուժողը դատարան ներկայանալ:

Աղբյուր` Փաստինֆո