Փաստ ինֆո

Ազգային ժողովի ՀՅԴ խմբակցությունը ՀՀ 2018թ. պետական բյուջեի նախագիծը համարում է տնտեսական զարգացման համար հիմքեր ստեղծող և որոշ չափով գոտիները ձգելու փաստաթուղթ:
Ազգային ժողովում ՀՀ 2018թ. պետական բյուջեի նախագծի քննարկմանն այս մասին ասաց ՀՅԴ խմբակցության քարտուղար Աղվան Վարդանյանը:

«Կա վստահություն կառավարության նախաձեռնած բարեփոխումների հանդեպ, և լիահույս ենք, որ նույնիսկ այս տարվա համար նախատեսած տնտեսական ցուցանիշներն ավելին կլինեն և թույլ կտան այնպիսի հիմքեր ստեղծել, որոնք կդառնան սոցիալական լարվածությունը մեղմելու ,երկիրը որակական նոր մակարդակի բարձրացնելու հնարավորություն»,- «Արմենպրես»-ի փոխանցմամբ՝ նշեց Վարդանյանը: Պատգամավորը նշեց, որ, գիտակցելով բյուջեի ծանրաբեռնվածությունը և լարվածությունը, ՀՅԴ խմբակցությունը սահմանափակ առաջարկներ է ներկայացրել:

«Այս ընթացքում քննարկել ենք կառավարության հետ: Վստահ ենք, որ այն առաջարկները, որոնք հրատապ են, վերաբերում են սահմանամերձ շրջաններին, 2018թ. բյուջեով կամ դրա շրջանակներից դուրս հնարավոր կլինի իրականացնել: Այնպես որ մեր վստահությունը շարունակվում է, և մենք ակնկալում ենք ավելի լուրջ բարեփոխումներ»,- եզրափակեց Վարդանյանը:

«Ծառուկյան» և «Ելք» խմբակցությունները դեմ կքվեարկեն ՀՀ 2018թ. պետական բյուջեի նախագծին:

«Ծառուկյան» խմբակցության պատգամավոր Նաիրա Զոհրաբյանը նշեց, որ կառավարության գործունեությունը իրեն չի արդարացրել, քանի որ արդյունավետ չէ կոռուպցիայի դեմ պայքարը, ներդրումների համար բարենպաստ պայմաններ ստեղծելու քայլերը բավարար չեն: «Կառավարության գործունեությունը իրեն չի արդարացրել, հետևաբար, «Ծառուկյան» խմբակցությունը դեմ է քվեարկելու 2018թ. պետական բյուջեի նախագծին»,- ասաց Զոհրաբյանը:

«Ելք» խմբակցության ղեկավար Նիկոլ Փաշինյանը ևս հայտարարեց ՀՀ 2018թ. պետական բյուջեի նախագծին դեմ քվեարկելու մասին:

«Քանի որ մենք հավատում ենք փոփոխություններին և քանի որ մեզ համար անընդունելի են այս կառավարության գործունեությունն ու մոտեցումները, մենք դեմ ենք քվեարկելու 2018թ. պետական բյուջեի նախագծին»,- ասաց Փաշինյանը:

Աղբյուր` Փաստինֆո