Փաստ ինֆո

Ազգային ժողովի «Ելք» խմբակցության ղեկավար Նիկոլ Փաշինյանը կարծում է, որ պետությունն ու հանրությունը միջամտելու իրավունքն ունեն այն դեպքերին, երբ ընտանիքի անդամը սպանում է ընտանիքի անդամին կամ գործադրում է բռնություն, որի արդյունքում մարդը հայտնվում է վերակենդանացման բաժանմունք:

Պատգամավորը նման կարծիք հայտնեց Ազգային ժողովում «Ընտանիքում բռնության կանխարգելման, ընտանիքում բռնության ենթարկված անձանց պաշտպանության և ընտանիքում հաﬔրաշխության վերականգնման մասին» օրենքի նախագծի քննարկման ժամանակ:

«Պետությունը և հանրությունն անելիք ունեն նաև այն իրավիճակներում, երբ ընտանիքում կատարվում են երևույթներ, որոնք վաղ թե ուշ հանգեցնելու են կամ սպանության կամ իրավիճակի, երբ ընտանիքի անդամների մեկը կհայտնվի վերակենդանացման բաժանմունք»,- «Արմենպրես»-ի փոխանցմամբ՝ ընդգծեց Փաշինյանը:

Պատգամավորն ընդգծեց, որ առաջարկվող օրենքի նախագիծը մեր երկրի, մեր պետության և ժողովրդի համար է:

«Եվ այս օրենքի հետ կապված մարդիկ ճիշտ հարցադրում են անում, երբ ասում են՝ «ինչ-որ մեկը կարո՞ղ է իմ ընտանիք մտնել ու միջամտել ընտանեկան խնդիրներին»:

Սա շատ ճիշտ դիտարկում է, և եթե չեք ցանկանում, որ ինչ-որ մեկը ձեր ընտանիք մտնի, ուրեմն մի այնպես արեք, որ ձեր ընտանեկան հարցը դառնա ձեր հարևանի, շենքի, թաղի, երկրի ու պետության հարցը: Ուրեմն մտահոգվեք ձեր ընտանիքի ներսում առկա խնդիրների մասին այնպես, որ դա լինի միայն ձեր ընտանիքի հարցը:

Ով ցանկանում է, որ այս օրենքը իր ընտանիքին չվերաբերի, ինքը դա կարող է հեշտ անել՝ իր ընտանիքում համապատասխան պահվածք ցուցաբերելով»,- եզրափակեց Փաշինյանը:

Աղբյուր` Փաստինֆո