Փաստ ինֆո

Մեղադրական եզրակացության մեջ չի նշված հիմքը՝ ինչի համար են «Սասնա Ծռերը» գնացել այդ քայլին: «Սասնա Ծռեր-1»-ի գործով տասը հոգու վերաբերյալ մեղադրական եզրակացության եզրափակիչ մասերի հրապարակման ավարտից հետո հայտարարեց Պավել Մանուկյանը: «Այն գեղեցիկ բառը, որ կոչվում է ապստամբություն, չկա այստեղ»,- ասաց նա՝ հավելելով, որ իրենք ապստամբությամբ ժողովրդից խլած իրավունքն են ուզում ձեռք բերել ու ձեռք բերելու են:

Ապստամբելու իրավունքն՝ իր արտահայտությամբ, այս հանցագործ ռեժիմը, չարիքի իշխանությունը տվել է իրենց: «Այս հայրենիքը իմ պապերի հայրենիքն է, իմ զավակների հայրենիքն է, ես չեմ ուզում գաղթականի ուսապարկը շալակիս ման գամ»,- ասաց նա:

Դիմելով իշխանավորներին՝ նա հայտարարեց. «Երկիրը կանգնեցրել եք բռնագաղթի, աքսորի առաջ»: Նա հավելեց, որ պետական բոլոր գրված և չգրված հանցանքները ներկայիս իշխանությունը վաստակել է: Ի թիվս այլոց՝ նշվեց «աղքատ պետության մեջ շքեղ դղյակների», տարածքներ հանձնելու մասին և այլն:

«Հասանք նրան, որ ֆուտբոլային դիվանագիտության վերջը եկավ մեր դաշնակցի կողմից արդեն մարմնավաճառային դիվանագիտության, ահա թե ինչի բերեց, երբ քեզ դիմում են արդեն որպես պետություն լյուբովնիցայի կարգավիճակով»,- ասաց Պ.Մանուկյանը:

Պատանդ վերցնելու, շենք-շինությունների զավթելու մեղադրանքի հետ կապված Պավել Մանուկյանը հայտարարեց. «Իսկ Հայաստանն, արդեն տասնամյակներ շարունակ, ամբողջ պետությունն ու ժողովուրդը, պատանդ են, այս մասին ոչինչ չեք ուզում ասել»: Պ.Մանուկյանն արձանագրեց՝ մի մարդ, ով իր կյանքն է տվել այս ժողովրդին, ինչպե՞ս կարող է պատանդ պահել:
«Դուք պատկերացնո՞ւմ եք բժշկին պատանդ պահել, այն էլ զինվորական տղաներ, որոնք շատ լավ գիտեն բժշկի գերագույն արժեքը»,- ասաց Պ.Մանուկյանը՝ հավելելով, որ իրենք չեն գնացել հայի վրա զենք ուղղելու, այլ գնացել են հաստատելու, որ մոտեցել է «այս հանցավոր ռեժիմի վախճանը»:

Մեղադրական եզրակացությունը խայտառակություն է, Շահամիր Շահամիրյան ու Մխիթար Գոշի նման հանճարներ տված ժողովրդի դատական համակարգն այսօր դարձել է անճար, անմխիթար:

«Դուք դատարանը վեր եք ածել արդարության կառափնարանի»,- ասաց Պավել Մանուկյանը:

Վարուժան Ավետիսյանը որպես կեղծիք ու «հանցավոր համակարգի վախի դրսևորում» որակեց մեղադրական եզրակացության այն պնդումը, որ իրենք հրաժարվել են իրենց պահանջներից, չեն հրաժարվել: «Մենք զենքը վայր ենք դրել ու դուրս ենք եկել շրջապատված տարածքից, որպեսզի արյունահեղություն չլինի, առաջին, և որպեսզի պահպանենք ապստամբության հետագա զարգացման, ծավալման հնարավորությունը»,- ասաց նա:

Վ.Ավետիսյանն ընդգծեց, որ իր ընկերներն ու ինքը իրականացրել են «ապստամբության սրբազան իրավունքը», ինչը ոչ միայն իրավունք է, այլև պարտականություն: «Ես համոզված եմ, որ մենք շատ ենք ուշացել ապստամբելու, պետք էր դա ավելի շուտ անել»: Նա ընդգծեց, որ այն բնական իրավունք է և որ Հայաստանում դրա հիմքերը լիուլի բավարար էին: Հայաստանում ժողովրդի իշխանությունը զավթված է, իշխանությունը զավթած անձինք և կազմակերպությունները ձևավորվել են գաղութատեր օտարերկրյա պետության՝ Ռուսաստանի Դաշնության աջակցությամբ, որպես հանցավոր համագործակցություն:

«Եվ իշխանությունը շարունակաբար յուրացնելուց հետո և այդ ամբողջ ընթացքում, հասել են այն աստիճանի, որ զավթել են պետությունը նրա բոլոր ինստիտուտներով, խժռել են ամեն ինչ, երկիրը վերածել համակենտրոնացման ճամբարի», որտեղ ցանկապատ չկա և դրված է կանոն՝ ստրկացիր կամ հեռացիր:

Ըստ Վ.Ավետիսյանի, Հայրենիքում ստեղծվել են այնպիսի անտանելի պայմաններ, որ ժողովուրդն ուղղակի բռնագաղթի է ենթարկվում, դա ցեղասպանության տարրերից մեկն է:

«Մենք այսօր ռուսական կայսրության վերականգնման մի դավադիր գործընթացի, արդեն արագացող էտապի մեջ ենք և գաղութային վարչակազմն ամբողջ թափով լծվել է այդ ծրագիրը մեր Հայրենիքի վերջին հատվածը կլանելու, ռուսական կայսրությանը մատաղ անելու գործին, և դա նախատեսվում է իրականացնել ապրիլյան քառօրյայի տիպի դավադրությունների միջոցով»,- ասաց Վ.Ավետիսյանը՝ հավելելով, որ իրացնելով ապստամբելու իրավունքն ընդդեմ գաղութատիրության, ընդդեմ հայրենադավության, ընդդեմ համակարգված կոռուպցիայի, ընդդեմ իշխանության յուրացման, հանուն մեր Հայրենիքի իրավունքի, ազգային և քաղաքացիական, մարդկային արժանապատվության, իրավունքների ու ազատությունների իրենք զենք են վերցրել, շատ ճիշտ են արել և հնարավորության դեպքում դա նորից են անելու:

«Մենք հիմա ապստամբության մեկ ուրիշ փուլի մեջ ենք, որն ավարտվելու է ապստամբության երկրորդ ու վերջնական ալիքով, այդ ալիքը սրբել տանելու ձեզ բոլորիդ, Նյուրնբերգյան դատավարության օրինակով անցումային արդարադատության սկզբունքով ստեղծվելու է հանրային վստահություն վայելող դատարան, որտեղ քննվելու է հանցավոր համագործակցության մաս կազմած կազմակերպությունների և անձանց մեղավորության հարցը»,- ասաց նա՝ հավելելով, որ ոչ ոքի չի հաջողվելու արյամբ ազատագրված, վերաազատագրված Արցախ հանձնել, կասեցնել Քուռ-Արաքսյան հանրապետության ստեղծումը:

«Սատանայի ավետարանը, որն այստեղ տասն անգամ ընթերցվեց, որևէ առնչություն չունի «Սասնա ծռեր»-ի սկսած ապստամբության հետ՝ ոչ բովանդակային, ոչ գաղափարական առումով»,- մեղադրանքի առնչությամբ հայտարարեց Մխիթար Ավետիսյանը՝ նշելով, որ շատ ավելի օգտակար կլիներ ընթերցել հայոց ժողովրդական էպոսը: «Այն ինչ արել ենք, լավ ենք արել, ժողովրդից ներողություն ենք խնդրում չարածի համար»,- եզրափակեց նա:

Էդվարդ Գրիգորյանը հայտարարեց, որ մեղավոր է այն բանի համար, որ մինչև վերջ չի հասցրել, բայց ճանապարհին ենք:

Արմեն Բիլյանը հայտարարեց, որ մեղադրանքը չի ընդունում: «Ես ապստամբել եմ, նորից եմ ապստամբելու»,- ասաց նա: 1,5 միլիոն մարդ հեռացել է Հայրենիքից, 100 000-ավոր երեխաներ ծնվել են օտար երկրներում, սահմանամերձ գյուղերը դատարկ են:

Դատարանը սահմանեց ապացույցների հետազոտման կարգը, ապացույցների հետազոտումը կսկսվի գրավոր ապացույցների հետազոտումից, ըստ կարգի, վերջում, ցանկության դեպքում, իրենց ցուցմունք տալու իրավունքից կօգտվեն ամբաստանյալները:

Աղբյուր` Փաստինֆո