Փաստ ինֆո

Երևանի Ջոն Կիրակոսյանի անվան դպրոցում երեխային ծեծի ենթարկելու փաստով 24.11.2017 թ ՀՀ Կենտրոն և Նորք Մարաշ վարչական շրջանների քննչական բաժնում հարուցվել է քրեական գործ ՀՀ քրեական օրենսգրքի 119-րդ հոդվածի 2-րդ մասի 3-րդ կետի հատկանիշերով՝ անչափահասի նկատմամբ խոշտանգում: Այս մասին Ֆեյսբուքում գրառում է թողել «Ընդդեմ իրավական կամայականության» ՀԿ փաստաբան Արա Ղարագյոզյանը՝ հավելելով, որ երեխան տուժող է ճանաչվել, իսկ ինքը՝ Արա Ղարագյոզյանը՝ տուժողի ներկայացուցիչ:

«Կազմակերպությունը մինչև վերջ պայքարելու է երեխայի իրավունքների համար, որ հանցագործություն կատարած անձինք ենթարկվեն քրեական պատասխանատվության»,- գրառման մեջ նշում է Ա.Ղարագյոզյանը:
Հիշեցնենք, որ ըստ «Հայկական ժամանակ»-ի տեղեկատվության, Երևանի Ջոն Կիրակոսյանի անվան դպրոցում առաջին դասարանցի մի խումբ աշակերտներ 7-ամյա դասընկերոջը տարել են զուգարան, «սկոտչով» կապել ձեռքերը, հարվածներ հասցրել, իսկ նրանցից մեկն էլ կտրել է երեխայի թարթիչները:

Դասվար Վերոնիկա Բաբաջանյանը, սակայն լրատվամիջոցի հետ զրույցում այլ տեսակետ է հայտնել: Ըստ նրա, երբ ինքը հարցրել է ինչ է տեղի ունեցել, երեխան պատասխանել է, որ ինքն է կտրել թարթիչները, երբ գտնվել է մոր տանը: Այդպիսով ցանկացել է տեսնել, թե թարթիչներն ինչ գույն ունեն: Դասվարի դիտարկմանը, որ դա կարող էր հայելու միջոցով պարզել, տղան պատասխանել է, թե իր սենյակում հայելի չկա, իսկ լոգասենյակում այն բարձր է կախված:

Դասվարը պատմել է, որ երեխայի ծնողներն ամուսնալուծված են, երեխան որոշ ժամանակ մոր հետ է ապրում, հետո՝ հոր: Ուսուցչուհին չի բացառել, որ ամուսինը հանդիմանել է կնոջը, և նա որոշել է կատարվածն ուրիշների վրա բարդել: «Ես միայն մի բան հասկացա. երեխան ավելի շատ թիրախ է երկու ծնողի: Մենք ուղղակի ընկանք այդ սարդոստայնի մեջ: Հայրը երևի նախատել է մորը»,- նշել էր Վերոնիկա Բաբաջանյանը:

Դասվարը համոզմունք էր հայտնել, որ այդ երեխաները նման բան չեն արել ու դրան ընդունակ էլ չէին:

Աղբյուր` Փաստինֆո