Փաստ ինֆո

Արագածոտնի մարզի ընդհանուր իրավասության դատարանի դատավճռով՝ անմեղսունակության վիճակում 4 ամսական երեխայի սպանությունը կատարած Արմինեն պատժի կրումից ազատվեց, սակայն նրա նկատմամբ դատարանը հարկադիր բուժում նշանակեց: Այդ մասին «Փաստինֆո»-ն տեղեկացավ, Արմինեի պաշտպան Հայկազ Գալստյանից:

Ավելի վաղ տեղեկացրել էինք, որ ըստ մեղադրանքի՝ Աշտարակ քաղաքի 38-ամյա բնակչուհին 2008 թվականին քարով հարվածել է փաստացի ամուսնական հարաբերությունների մեջ գտնվող տղամարդու երկրորդ կնոջ մանկահասակ՝ 08.12.2007թ.-ին ծնված, 4 ամսական երեխայի գլխին և սպանել։

Երեխայի մայրն ու տղամարդը մահացած երեխային թաղել էին նկուղային կիսակառույցի շինության հարևանությամբ:

Արմինեին մեղադրանք է առաջադրվել` ՀՀ քրեական օրենսգրքի 104-րդ հոդվածի 1-ին մասով, և գործը դատարան էր ուղարկվել՝ նրա նկատմամբ բժշկական բնույթի հարկադրական միջոցներ կիրառելու համար:

Հիշեցնենք, որ արտաշիրիմում էր կատարվել և էական նշանակություն ունեցող հանգամանքների պարզաբանման համար նշանակվել էր դատաբժշկական, դատահոգեբուժական և դատահոգեբանական համալիր ստացիոնար, դատակենսաբանական փորձաքննություններ։

Դատաբժշկական փորձաքննության համաձայն՝ երեխան մահացել է` նրա նկատմամբ կիրառված բռնության հետևանքով. նրան պատճառվել էին գանգուղեղային բութ վնասվածքներ՝ ճակատոսկրի աջ և ձախ կեսերի, աջ և ձախ գագաթոսկրերի վերնոսկրային, ապոնևրոզային, ներոսկրային արյունազեղումներ:

Եզրակացության համաձայն՝ երեխային այդ վնասվածքները պատճառվել են բութ առարկաների ներգործության, հնարավոր է գլխին հարվածներ հասցնելու հետևանքով՝ կենդանության օրոք, որոնք ունեն առողջությանը ծանր վնասի պատճառման հատկանիշներ, և այդ վնասվածքները տվյալ դեպքում բերել են մահվան:

Իսկ ստացիոնար դատահոգեբուժական և դատահոգեբանական համալիր փորձաքննության համաձայն՝ 38-ամյա կնոջ մոտ հայտնաբերվել է «Թուլամտություն` անհայտ ախտածագման»:

Հանցագործության կատարման ժամանակ կնոջ մեղսունակության հարցը փորձագետները դժվարացել են պարզել՝ մատնանշելով օբյեկտիվ տեղեկությունների, որևէ բուժփաստաթղթերի բացակայությունը, սակայն փաստել են, որ ներկա հոգեկան վիճակով նա չի կարող գիտակցել իր գործողությունների վտանգավորությունը և ղեկավարել դրանք, չի կարող մասնակցել դատաքննչական գործողություններին, կարիք ունի հարկադրական բուժման՝ ընդհանուր հսկողության հոգեբուժական բաժանմունքի պայմաններում:

Աղբյուր` Փաստինֆո