Փաստ ինֆո

Ազգային ժողովը քննարկում է Եվրասիական տնտեսական միության Մաքսային օրենսգիրքը վավերացնելու մասին օրենքի նախագիծը: Հիմնական զեկուցող, ՀՀ պետական եկամուտների կոմիտեի նախագահի տեղակալ Վախթանգ Միրումյանը հիշեցրեց, որ Եվրասիական տնտեսական միության Մաքսային օրենսգրքի մասին պայմանագիրը ստորագրվել է 2017 թ. ապրիլի 10-ին:

«Պայմանագիրը նախատեսում է երեք հավելված: Առաջին հավելվածը նախատեսում է հենց Եվրասիական տնտեսական միության Մաքսային օրենսգիրքը, երկրորդ հավելվածով սահմանվում են Եվրասիական տնտեսական միության իրավունքի մաս կազմող այն միջազգային պայմանագրերը, որոնք չեղյալ են հայտարարվելու Մաքսային օրենսգրքի ընդունմամբ, երրորդ հավելվածը սահմանում է Եվրասիական տնտեսական միության իրավունքի մաս կազմող միջազգային պայմանագրերը, որոնց առանձին դրույթներ են ուժը կորցրած ճանաչվելու Մաքսային օրենսգրքի ընդունմամբ»,- «Արմենպրես»-ի փոխանցմամբ՝ ընդգծեց Միրումյանը:

Միրումյանը շեշտեց, որ նոր Մաքսային օրենսգիրքը նախատեսում է մաքսային ընթացակարգերի էական բարելավում: Նրա խոսքով՝ անհամեմատ կրճատվում են թե ապրանքների մաքսային հայտարարագրման, թե տեղափոխման ժամկետները, էապես կրճատվում են արտաքին տնտեսական գործունեություն իրականացնող սուբյեկտների և մաքսային մարմինների միջև եղած շփումները, մաքսային ընթացակարգերի առումով օրենսգիրքը սահմանում է հստակ կանոններ:

«Կրճատվում է ապրանքների հայտարարագրերի ընդունման ժամկետը՝ երկու ժամից սահմանվելով մեկ ժամ: Ընդ որում, սա ոչ միայն կրճատում է, այլ նաև պարտավորեցնում է մաքսային մարմիններին, որպեսզի մաքսային հայտարարագրերում առկա անճշտությունների դեպքում ոչ թե միանգամից մերժեն մաքսային հայտարարագիրը, այլ առկա անճշտությունների մասին տեղեկացնեն տնտեսավարողներին՝ նրանց հնարավորություն տալով ուղղել հայտարարագիրը, որից հետո այդ հայտարարագրի ընդունումը կատարել մեկ ժամվա ընթացքում: Օրենսգրքով նախատեսված է հնարավորություն մաքսային հայտարարագրում իրականացնել առանց ուղեկցող փաստաթղթերի:

Սա, ըստ էության, նորություն է: Համեմատության համար նշեմ, որ ներկայումս մաքսային հայտարարագրումը կատարվում է ուղեկցող փաստաթղթերով՝ անկախ նրանից, թե ինչ ուղի է ընտրվելու՝ կանաչ, դեղին, թե կարմիր: Այս մոտեցումը փոխվում է, այսինքն՝ քանի դեռ ուղին ընտրված չէ, տնտեսավարող սուբյեկտը կարող է ներկայացնել մաքսային հայտարարագիր առանց ուղեկցող փաստաթղթերի, որից հետո, եթե կընտրվի կանաչ ուղի, կնշանակի, որ ուղեկցող փաստաթղթերը ներկայացնելու անհրաժեշտություն չկա, իսկ եթե կընտրվի դեղին կամ կարմիր ուղի, արդեն կառաջանա ուղեկցող փաստաթղթեր ներկայացնելու անհրաժեշտություն»,- մանրամասնեց Վախթանգ Միրումյանը:

ԵԱՏՄ Մաքսային օրենսգրքով ամրագրված է փաստաթղթավորման մեկ պատուհանի սկզբունք, ինչը նշանակում է, որ եթե որևէ մաքսային ընթացակարգի ներքո տնտեսավարող սուբյեկտը ներկայացրել է համապատասխան տեղեկատվություն, որն արդեն առկա է մաքսային մարմիններում, ապա համանման գործարք իրականացնելու պարագայում այդ փաստաթուղթը ներկայացնելու անհրաժեշտություն այլևս չի լինի:

«Օրինակ, եթե տնտեսավարող սուբյեկտը ժամանակավոր ներմուծում ընթացակարգով իրականացրել է ապրանքների ներմուծում և որպես մաքսային ապահովման միջոց ներկայացրել է համապատասխան երաշխիք՝ մեկ տարի ժամանակահատվածով, ապա մեկ տարվա ընթացքում ներմուծումներ իրականացնելու դեպքում այդ փաստաթուղթը ներկայացնելու անհրաժեշտություն չի լինի»,- պարզաբանեց ՊԵԿ փոխնախագահը:

Ներդրված է վճարումների կատարման կանխավճարային համակարգը: Միրումյանի խոսքով՝ սա հնարավորություն է տնտեսավարող սուբյեկտների համար այն առումով, որ կամավոր է: «Այսինքն՝ տնտեսավարող սուբյեկտները կարող են ունենալ կանխավճարային հաշիվ, որը հնարավորություն կունենան օգտագործել ապրանքային ներմուծումների ժամանակ:

Սա տնտեսավարողներին հնարավորություն է տալիս գիշերային ժամերին ներմուծում իրականացնելու դեպքում չսպասել վճարումների համար, այլ ներկայացված հայտարարագրի հիման վրա կարող են օգտագործել կանխավճարային հաշվի վրա եղած գումարները և առանց խոչընդոտի ապրանքը տեղափոխել»,- մանրամասնեց Միրումյանը:

Բոլոր ապրանքների ներմուծման մասով նախատեսված է մաքսատուրքի տարաժամկետման հնարավորություն՝ մինչև մեկ ամսով: Միրումյանը պարզաբանեց, թե նախատեսվում է, որ տնտեսավարողի ցանկության պարագայում մաքսատուրքի վճարումը կարող է հետաձգվել մինչև մեկ ամիս՝ տոկոսների վճարմամբ: Իսկ տոկոսները հաշվարկվում են՝ Կենտրոնական բանկի սահմանած վերաֆինանսավորման տոկոսադրույքից ելնելով: Սա թողնված է տնտեսավարողների ցանկությանը:

Եթե նրանք ցանկանում են մինչև մեկ ամիս ժամկետով տարաժամկետել մաքսատուրքի վճարումը, կարող են օգտվել այդ հնարավորությունից»,- ասաց ՊԵԿ փոխնախագահը:

Աղբյուր` Փաստինֆո