Փաստ ինֆո

Դատարանն այսօր մերժեց փողերի լվացման աղմկահարույց գործով ամբաստանյալ, «Հայբիզնեսբանկ» ՓԲ ընկերության վարչության նախագահի նախկին տեղակալ Մելիք Եսայանի պաշտպան Սամվել Հովհաննիսյանի միջնորդությունը՝ կալանավորումը գրավով փոխարինելու և գործի քննությունը կասեցնելու մասին:

Պաշտպան Սամվել Հովհաննիսյանը «Փաստինֆո»-ի լրագրողի հետ զրույցում նշեց, որ երկու տարի նիստեր տեղի չեն ունենում իր պաշտպանյալի առողջական վիճակի հետ կապված, «նույնիսկ նախապատրաստական փուլ չենք անցել»:

Ըստ պաշտպանի, ոչ մի գործողություն չի կատարվել: Անցկացված դատաբժշկական երեք փորձաքննությունների եզրակացությունների համաձայն, Մ.Եսայանն անբուժելի ծանր հիվանդ է՝ կյանքի համար վտանգ ներկայացնող: Նրան, ըստ պաշտպանի, արգելված է դատական նիստերի մասնակցել:

Մելիք Եսայանը տառապում է ծանր հիպերտոնիայի երրորդ աստիճանով՝ կրիզային ընթացքով, արյան անբավարարության 2-3-րդ աստիճանով, մի շարք այլ հիվանդություններով ևս:

Պաշտպանը հայտնեց, որ դատարանի որոշումը բողոքարկելու է Վերաքննիչ դատարան:

Հիշեցնենք, որ ըստ մեղադրանքի, Մելիք Եսայանը 2008 թվականի մարտի 11-ից մինչև 2013 թվականի մայիսի 15-ը ներառյալ ժամանակահատվածում հանդիսանալով «Հայբիզնեսբանկ» ՓԲ ընկերության վարչության նախագահի տեղակալ-Տարածքային զարգացման և տեղեկատվական տեխնոլոգիաների դեպարտամենտի տնօրենը, մի խումբ անձանց կողմից նախնական համաձայնությամբ, 2012 թվականի օգոստոսից մինչև 2013 թվականի մարտ ամիսը ներառյալ ժամանակահատվածում, օգտագործելով իրավունք վերապահող պաշտոնական փաստաթղթեր հանդիսացող կեղծ պայմանագրեր և վճարման հանձնարարականներ, խարդախությամբ՝ խաբեության եղանակով հափշտակել, ապա օրինականացրել են Ռուսաստանի Դաշնության Մոսկվա քաղաքում գործող «Միր Բիզնես Բանկ» ՓԲ ընկերության կողմից, «Սբերբանկ» ՓԲ ընկերության միջոցով (միջնորդությամբ), «SWIFT» համակարգով «Հայբիզնեսբանկ» ՓԲ ընկերություն փոխանցված առանձնապես խոշոր չափերով ընդհանուր 5.804.577.000 ՀՀ դրամին համարժեք 10.980.000 եվրո գումար, որից՝ 1.000.000 եվրոն նախատեսված է եղել գումարի իրական շահառու, Բանկում թղթակցային հաշվեհամարներ բացած, ԻԻՀ «Քիշ Ինտերնեյշնլ Բանկ» ընկերության համար, իսկ 9.980.000 եվրոն՝ «SWIFT» հաղորդագրություններում անճշտություններ լինելու և վերջնական շահառուն նշված չլինելու պատճառով, ենթակա Է եղել վերադարձման ուղարկող «Միր Բիզնես Բանկ» ՓԲ ընկերությանը, ինչի հետևանքով «Քիշ Ինտերնեյշնլ Բանկ» և «Միր Բիզնես Բանկ» ՓԲ ընկերությունները իրավունք են ձեռք բերել նույն չափով գումարներ ստանալու հայցապահանջ ներկայացնել «Հայբիզնեսբանկ» ՓԲ ընկերության նկատմամբ, որը հատուցման պարտավորություն Է ստանձնել։

Մելիք Եսայանին մեղադրանք է առաջադրվել ՀՀ քրեական օրենսգրքի 214-րդ հոդվածի 2-րդ մասով՝ առևտրային կազմակերպության ծառայողի կողմից լիազորությունները չարաշահելը, որն առաջացրել է ծանր հետևանքներ, 325-րդ հոդվածի 2-րդ մասով՝ մի խումբ անձանց կողմից նախնական համաձայնությամբ փաստաթղթեր կեղծելը, իրացնելը կամ օգտագործելը, 178-րդ հոդվածի 3-րդ մասի 1-ին կետով՝ առանձնապես խոշոր չափերի խարդախություն, 190-րդ հոդվածի 3-րդ մասի 1-ին կետով՝ առանձնապես խոշոր չափերի փողերի լվացում:
Նշենք, որ սկզբնապես գործը դատարան էր ուղարկվել երկու ամբաստանյալի՝ «Հայբիզնեսբանկ» ՓԲ ընկերության վարչության նախկին նախագահ, ամբաստանյալ Արա Կիրակոսյանի և Մելիք Եսայանի վերաբերյալ, սակայն վերջինիս մասով գործն անջատվել էր ու կասեցվել մինչև նրա առողջանալը: Ավելի ուշ Մելիք Եսայանի մասով գործն առանձին ընդունվել էր դատարանի վարույթ և նշանակվել դատական քննություն:

Իսկ Արա Կիրակոսյանի մասով արդեն իսկ կայացվել է մեղադրական դատավճիռ. նա մեղավոր է ճանաչվել ՀՀ քրեական օրենսգրքի 214-րդ հոդվածի 2-րդ մասով՝ առևտրային կազմակերպության ծառայողի կողմից լիազորությունները չարաշահելը, որն առաջացրել է ծանր հետևանքներ, 325-րդ հոդվածի 2-րդ մասով՝ մի խումբ անձանց կողմից նախնական համաձայնությամբ փաստաթղթեր կեղծելը, իրացնելը կամ օգտագործելը, 178-րդ հոդվածի 3-րդ մասի 1-ին կետով՝ առանձնապես խոշոր չափերով խարդախությունը, 190-րդ հոդվածի 3-րդ մասի 1-ին կետով՝ առանձնապես խոշոր չափերով փողերի լվացումը, և դատապարտվել 13 տարվա ազատազրկման`ամբողջ գույքի բռնագրավմամբ, սակայն ոչ ավելի 1.000.000 եվրոյին համարժեք ՀՀ դրամ գումարից:

Ամբաստանյալի պաշտպան Հայկ Ալումյանը ներկայացրել է վերաքննիչ բողոք, որում միջնորդում է ամբողջությամբ բեկանել առաջին ատյանի դատարանի դատավճիռը, Արա Կիրակոսյանին առաջադրված մեղադրանքներում ճանաչել անմեղ և արդարացնել` ճանաչելով և հռչակելով նրա անմեղությունը: Միաժամանակ պաշտպանը միջնորդում է Արա Կիրակոսյանին առաջադրված մեղադրանքներից մեկում կամ մի քանիսում չարդարացնելու դեպքում այդ հոդվածով (հոդվածներով) առաջին ատյանի դատարանի դատավճռով սահմանված պատիժը մեղմացնել:
Վերաքննիչ բողոքի քննությունն ընթացքի մեջ է:

Աղբյուր` Փաստինֆո