Փաստ ինֆո

Մարաշի զինված խմբի գործով այսօրվա դատական նիստում հետազոտվեց, ըստ նախաքննական մարմնի, Վահան Շիրխանյանի, Արթուր Վարդանյանի և Լիլիթի միջև՝ Վահան Շիրխանյանի տանը, տեղի ունեցած խոսակցության ձայնագրության վերծանումը:

Խոսակցության ձայնագրությունը հայտնաբերվել է գործից անջատված մասով մեղադրյալ Լիլիթ Թորոսյանի համակարգչի զննությամբ:

Խոսակցության մեջ շոշափվում է այն ժամանակ գործող պաշտպանության նախարար Սեյրան Օհանյանի անունը: Վահան Շիրխանյանը (ներկայացված է որպես Վ.Շ.) ասում է, որ խոսել է նախարարի հետ «Սպաների համահայկական միության» մասին, որում լինելու է 25 հազարից ոչ պակաս սպա, ըստ Վ.Շ.-ի, «դա մի հատ պահեստային բանակ է»:

Ձայնագրության մեջ Վ.Շ.-ն ասում է, որ Սեյրան Օհանյանին ասել է՝ «ոչ թե քո հետ կապված, այլ ժողովրդի ատելությունն էնքան մեծ է, որ մի օր մեկ էլ կլսես հեռուստացույցով, որ էսպիսի բան է եղել: Ի՞նչ ես անելու: Ասեց՝ ես իմ ժողովրդի դեմ դուրս չեմ գա»:

Ըստ Վ.Շ.-ի, պետք է ամեն ինչ անել քաղաքից դուրս: Ա.Վ.-ն՝ Արթուր Վարդանյանը հարցնում է՝ ասենք Սերժը վարի գնաց, հնչում է Վ.Շ.-ի պատասխանը՝ ամեն ինչ միանգամից անցնում է Սեյրանի ձեռքը և «կշարժվի մեր ասածով»:

«Էս երկիրը փրկելու, ժողովրդին փրկելու» համար Վ.Շ.-ն ասում է՝ ինքնաթիռը թռնում է, ու ընկնում է, թող մի հիսուն հոգի էլ մարդ լինի, ընկնում է: Ամենահեշտ բանն ասելն է՝ թե խփեցին, հիսուն տարի ման են գալու, թե ո՞նց եղավ, ի՞նչ եղավ:

Վ.Շ.-ն նշում է՝ պիտի ամենահեշտը՝ համեմատաբար և ապահով տարբերակն ընտրել:

Վ.Շ.-ն հարցնում է «դաշնակներից մարդ կա՞ն շուրջդ», ապա բացասական պատասխան ստանալով՝ հավելում է. «Դաշնակների մեջ կա ծպտյալ դաշնակ կարգավիճակ, ծպտյալ, ուշադիր եղիր»:

Վահան Շիրխանյանի պաշտպան Հայկ Ալումյանը հայտարարեց, որ գործում ապացույց չկա, որ խոսակցությունը հիշյալ երեք անձանց միջև է ընթանում, դա մերկապարանոց է, ասաց նա:

Ամբաստանյալ Արա Պողոսյանն այսօր հայտարարեց, որ շուրջ երկու տարի իրենք համբերատար սպասել են՝ հույս ունենալով, որ մի օր էլ Հայաստանում կվերակենդանան վաղուց գերեզման իջեցված խիղճն ու բարոյականությունը, մարդու իրավունքները: Թեև վերջերս ստորագրված ՀՀ-ԵՄ Համապարփակ և ընդլայնված գործընկերության համաձայնագրով Հայաստանը ստանձնել է որոշակի պարտավորություններ, մասնավորապես, բարեփոխումներ իրականացնել ու կառուցել ժողովրդավարական Հայաստան, սակայն Ա.Պողոսյանի կարծիքով, երկրում բարեփոխումներ ու առաջընթաց հնարավոր չէ, քանի դեռ շարունակվում են քաղաքական դատավարությունները, քանի դեռ ԱԱԾ բարձրաստիճան պաշտոնյան մարդկանց խոշտանգելով ստիպում է իր կազմած ցուցմունքի տակ ստորագրել։

«Ասում են անարդարությունը քաղցկեղ է և պետք է այն արմատախիլ անել, համաձայն եմ, բայց այդ դեպքում ինչու է այսքան մարդ մինչև այժմ գտնվում բանտերում»: Ըստ ամբաստանյալի, Հայաստանը երբեք չի փոխվի, քանի դեռ բանտերում փակված են քաղաքական գործերով տասնյակ բանտարկյալներ: Այսպես երկար շարունակվել չի կարող և այս ոգով մեր երազների Հայաստանը չի կառուցվի: Ըստ ամբաստանյալի, իրենք որևէ հեղաշրջում չեն ցանկացել ու չեն էլ ցանկանում, որևէ նման գաղափարի չեն հարել ու չեն հարում: Վերաձևակերպելով Ժան-Ժակ Ռուսոյի բառերը՝ Արա Պողոսյանն իրենց դատի վերաբերյալ ասաց. «Մենք մոտենում ենք ճգնաժամին և մեծ փոփոխությունների դարաշրջանին»:

Աղբյուր` Փաստինֆո