Փաստ ինֆո

Նոյեմբերի 20-ին դատախազ եղբայրների կողմից Քննչական կոմիտեի ավագ քննիչին ծեծի ենթարկելու դեպքն անձերի միջև վեճ չէ: Այդ մասին այսօր Քննչական կոմիտեում կարգապահական հանձնաժողովի 3 տարիների գործունեության ամփոփման ժամանակ լրագրողների հարցին ի պատասխան ասաց Արթուր Ղամբարյանը, ով հանդիսանում է ՀՀ ՔԿ կարգապահական հանձնաժողովի նախագահ:

Անընդունելի համարելով ծեծի եղանակով հարցերի լուծումը՝ Արթուր Ղամբարյանը նշեց, որ որպես իրավաբան երեք նկատառում ունի այդ դեպքի հետ կապված:

«Երբ քննիչ և դատախազ միմյանց հետ հարցերը պարզելու համար ընտրում են ծեծի եղանակը, դա բացասական ազդեցություն է թողնում իրավապահ մարմինների գործունեության վրա, մասնավորապես՝ Դատախազության և Քննչական կոմիտեի հանրային լեգիտիմության վրա:

Դատախազը և քննիչը, ովքեր մեղադրանք պետք է առաջադրեն ծեծի հանցակազմով որևէ մեկին, այդ նույն մարմնի ներկայացուցիչները հարցեր պարզում են ծեծի եղանակով:

Ղամբարյանն այս դեպքը որպես ծեծ չի դիտարկում երկու մասնավոր անձանց միջև: Նախ պետք է հասկանալ՝ ծեծի պատճառը որն է, ինչից է առաջացել վիճաբանությունը, ինչի հետևանքով քննիչը նաև մարմնական վնասվածքներ է ստացել:

Ըստ ներքին անվտանգության վարչություն ներկայացված զեկուցագրի՝ պատճառը եղել է այն, որ դատախազը, ըստ նախնական տվյալների, որևէ գործի քննարկման ժամանակ բանավոր ցուցում է տվել քննիչին, իսկ քննիչը չի համաձայնել այդ բանավոր ցուցումը կատարել՝ ասելով որ գրավոր ներկայացնեն, քանի որ օրենքի պահանջ է: Այստեղից էլ վիճաբանություն է ծագել:

Ղամբարյանը նշում է՝ արդյոք դատախազը իրավասու՞ է բանավոր ցուցում տալ քննիչին և հավելում, որ դատախազներն իրավասու չեն բանավոր ցուցումներ տալու, դա բացասական է ազդում նախաքննական մարմնի քննության վրա, օրենքի հստակ պահանջ է՝ դատախազ պարտավոր է ցուցում տալ գրավոր, որպեսզի քննիչը նաև բողոքարկելու իրավունք ունենա, իսկ երբ բանավոր ես ասում, դա լիազորություններից որոշակիորեն շեղում է:

Ուստի՝ այստեղ քրեաիրավական գնահատական տալուց պետք է հասկանալ, որ ոչ թե մասնավոր վեճ է անձերի միջև, այլ դատավարական գործողությունն օրենքի պահանջով չի կատարվել, ինչի հետևանքով էլ տեղի է ունեցել վիճաբանությունը:

Ղամբարյանը նաև նշեց, որ Քրեական դատավարության օրենսգրքի 200-րդ հոդվածը քննություն կատարող մարմնին պարտավորեցնում է վեր հանել հանցագործության պատճառները և համապատասխան միջնորդագիր ներկայացնել այն պաշտոնատար անձին, ով պատասխանատու է:

Եթե քրեական գործի քննության ընթացքում կպարզվի, որ այդ դեպքի պատճառը եղել են դատավարական շեղումները, այսինքն՝ բանավոր ցուցում տալը, ապա, կարծում ե,մ քննություն կատարող մարմինը 200-րդ հոդվածը պետք է կիրառի և միջոցներ ձեռնարկի, որպեսզի հետագայում այս դեպքերը չկրկնվեն:

«Եթե այսօր քննիչի աշխատասենյակում է տեղի ունեցել այդ ծեծը, կարող է վաղը տեղափոխվի վերադաս դատախազի աշխատասենյակ կամ դատական նիստերի դահլիճ: Սա պետք խստագույնս դատապարտվի` կանխարգելման նպատակով: Նման դեպքերը խիստ վտանգավոր են»,- ասաց Արթուր Ղամբարյանը:

Աղբյուր` Փաստինֆո