Փաստ ինֆո

Ազգությամբ հայ երեխաները, ում ծնողները Հայաստանի Հանրապետության քաղաքացի չեն, Հայաստանում բնակություն հաստատելու պահից քաղաքացիություն ձեռք բերելու իրավունք կստանան:

Ազգային ժողովի պետական-իրավական և ումարդ իրավունքների պաշտպանության հարցերի մշտական հանձնաժողովը երկրորդ ընթերցմամբ դրական եզրակացություն տվեց «Քաղաքացիության մասին» ՀՀ օրենքում փոփոխություններ և լրացումներ կատարելու մասին օրենքի նախագծին:

Հիմնական զեկուցող, ՀՀ ոստիկանության պետի տեղակալ Վարդան Եղիազարյանն ընդգծեց, որ երեխան, ում ծնողները ՀՀ քաղաքացի չեն, ՀՀ-ում բնակություն հաստատելու պահից քաղաքացիություն ստանալու իրավունք կստանան` ծնողների գրավոր համաձայնության առկայության պարագայում:

«Նախագծի ընդունումը պայմանավորված է գործող օրենքը սահմանադրական փոփոխություններին համապատասխանեցնելու, ինչպես նաև իրավակիրառ պրակտիկայում առաջացած օրենսդրական բացերին լուծում տալու անհրաժեշտությամբ:

«Մասնավորապես, նախագծով առաջարկվում է Հայաստանի քաղաքացի չհանդիսացող ծնողների ազգությամբ հայ երեխաների կողմից քաղաքացիություն ձեռք բերելու առավել պարզեցված ընթացակարգ»,- «Արմենպրես»-ի փոխանցմամբ` ընդգծեց Վարդան Եղիազարյանը:

Նախագծով առաջարկվում է հստակեցնել նաև ՀՀ քաղաքացիներից ծնված երեխաների կողմից քաղաքացիություն ձեռք բերելու վերաբերյալ դրույթները, ինչպես նաև ՀՀ քաղաքացիություն ստանալու և դրա հիմքերը սահմանող իրավակարգավորումները: Նախագծով առաջարկվող մյուս փոփոխությունները կրում են տեխնիկական բնույթ, առաջին ընթերցումից հետո Ազգային ժողովի պատգամավորներն առաջարկներ չեն ներկայացրել:

Աղբյուր` Փաստինֆո