Փաստ ինֆո

Իրականացված որակական հետազոտության արդյունքում պարզ է դարձել՝ ընտանեկան բռնությունը շատերը դիտարկում են որպես սոցիալական խնդիր: Հետազոտության նպատակը եղել են
ոչ թե բռնության դեպքերը, այլ բռնության վերաբերյալ մարդկանց ընկալումները հասկանալը:

«Արմենպրես»-ի հաղորդմամբ՝ նոյեմբերի 30-ին կայացավ հետազոտության արդյունքների ամփոփումը:

«Որակական հետազոտությունը հնարավորություն չի տալիս սոցիալական միջավայրի մասին ընդհանրական եզրակացություններ անել: Դրա նպատակն է հասկանալ, թե հասարակության տարբեր շերտեր ինչպես են ընկալում ընտանիքում բռնությունը: Այն հիմք է տալիս հասկանալու ,թե ինչ գործիքներ կարելի է օգտագործել, որպեսզի հասարակության բոլոր շերտերն ընդգրկվեն երևույթի դեմ պայքարում»,-ասաց ՄԱԿ Բնակչության հիմնադրամի հայաստանյան գրասենյակի գործադիր ներկայացուցիչ Գարիկ Հայրապետյանն ու հավելեց՝ հետազոտության արդյունքում պարզ է դարձել, որ ընտանեկան բռնության վերաբերյալ հանրության ընկալումները լայն են՝ դրա դեմ պայքարելուց մինչ այն արդարացնելու ցանկությունը:

Հետազոտությունն իրականացրել է Մարդկային զարգացման միջազգային կենտրոնը՝ ՄԱԿ-ի բնակչության հիմնադրամի և ԵՄ-ի ֆինանսավորմամբ: Հայաստանում ԵՄ պատվիրակության համագործակցության բաժնի ղեկավար Գրեգորի Ցուրիսի խոսքով՝ ԵՄ-ն առաջին անգամ չէ, որ աջակցում է նման նախաձեռնությունների:

«Մենք աջակցեցինք, քանի որ ուզում ենք մեր միջամտության հիմքում դնել ապացույցները: Այս հետազոտությունը լրացնում է մի շարք քանակական հետազոտությունների: Այն նման մասշտաբի առաջին որակական հետազոտությունն է Հայաստանում»,-ասաց նա:

Հետազոտություն է իրականացվել 13 ֆոկուս խմբերում քննարկման ձևով: Ֆոկուս խմբերում ներառված են եղել 135 տղամարդ և կին Երևանից, Շիրակի երկու և Գեղարքունիքի չորս համայնքներից: Ֆոկուս խմբերի հետազոտության արդյունքները համալրելու նպատակով կազմակերպվել են 30 փորձագիտական հարցազրույցներ պետական գերատեսչությունների, միջազգային կազմակերպությունների, գիտակրթական հաստատությունների հետ:

Մարդկային զարգացման միջազգային կենտրոնի ներկայացուցիչ Քրիստինե Սարգսյանի խոսքով՝ որակական հետազոտության տվյալներով ընդհանուր եզրակացություն անել հնարավոր չէ: Այնուամենայնիվ, դրանք թույլ են տալիս գնահատել իրավիճակը, թե տարբեր սոցիալական խմբեր ինչպիսի վերաբերմունք ունեն երևույթի նկատմամբ:

«Ընդհանուր առմամբ, հանրությունը նույնական ընկալում ունի ընտանեկան բռնության վերաբերյալ: Երևույթի նկատմամբ վերաբերմունքը փոխվել է: Եթե մի քանի տարի առաջ այն դիտարկվում էր որպես ներընտանեկան խնդիր, այսօր այն շատերից կողմից դիտարկվում է որպես սոցիալական խնդիր»,-ասաց նա:

Փորձագետները և ոչ փորձագետները շեշտադրել են ընտանեկան բռնության եմ պայքարի գործում զբաղվածության, դաստիրակության, կրթության և իրազեկման դերը: Փորձագետներից շատերը նշել են, թե լրատվամիջոցների և կրթական համակարգի միջոցով կարելի է հսկայական աշխատանք կատարել բռնության կանխարգելման հարցում: Նշվել է նաև միասնական համապարփակ համակարգի անհրաժեշտության մասին, թեև փորձագետները ասել են, որ դա բավականին բարդ և ժամանակատար աշխատանք է:

«Ընտանեկան բռնության հարցը դեռ 1998 թվականից եղել է ՀՀ կառավարության օրակարգում: Այս քարոզարշավը նոր փուլ է որակական լուծումներ տալու առումով»,-նշեց ՀՀ աշխատանքի և սոցիալական հարցերի նախարարության կանանց հիմնահարցերի բաժնի պետ Արմենուհի Թանաշյանը:

Աղբյուր` Փաստինֆո