Փաստ ինֆո

Հատուկ քննչական ծառայությունում քննվող առանձնապես խոշոր չափերով կաշառք ստանալու գործով կալանքի տակ գտնվող ՀՀ ՔԿ Երևան քաղաքի քննչական վարչության Էրեբունի և Նուբարաշեն վարչական շրջանների քննչական բաժնի ավագ քննիչ Մ.Զադոյանի և փաստաբան Գայանե Գալոյանի վերաբերյալ գործով նախաքննության ավարտ է հայտարարվել:

«Փաստինֆո»-ն ավագ քննիչ Մ. Զադոյանի պաշտպան Հրանտ Անանյանից տեղեկացավ, որ նախաքննական մարմինը գործի նյութերը տրամադրել է կողմերին՝ մինչև նոյեմբերի 30-ը դրանց հետ ծանոթանալու նպատակով:

Բացի այդ, օրեր առաջ դատարանը մասնակի բավարարել է նաև Զադոյանի նկատմամբ խափանման միջոց կալանավորումը երկարացվելու վերաբերյալ քննիչի միջնորդությունը՝ ևս մեկ ամիս Զադոյանը կգտնվի կալանքի տակ:

Ավագ քննիչ Մ. Զադոյանն իրեն առաջադրված մեղադրանքը չի ընդունում:

Պաշտպան Անանյանը կարծիք հայտնեց, որ սա վատ նախադեպ է քննիչների համար, մի ընտանիքի շահագրգիռ անդամների ցուցմունքի վրա մեղադրանք է կազմվել:

Հիշեցնենք, որ ՀՔԾ պաշտոնական հաղորդագրության համաձայն՝ քննիչ Մ. Զադոյանը նախնական համաձայնությամբ, փաստաբան Գայան Գալոյանի օժանդակությամբ և միջոցով Բ. Գասպարյանից ստացել է առանձնապես խոշոր չափերով կաշառք:

Մ. Զադոյանին մեղադրանք է առաջադրվել ՀՀ քրեական օրենսգրքի 311-րդ հոդվածի 4-րդ մասի 2-րդ կետով, Բաբկեն Գասպարյանին մեղադրանք է առաջադրվել ՀՀ քրեական օրենսգրքի 312-րդ հոդվածի 3-րդ մասի 1-ին կետով:

Գայանե Գալոյանին մեղադրանք է առաջադրվել ՀՀ քրեական օրենսգրքի 38-311-րդ հոդվածի 4-րդ մասի 2-րդ կետով:

Ավելի վաղ, տեղեկացրել էինք, որ Բաբկեն Գասպարյանն այն անձն է, ով ըստ նախաքննական մարմնի պաշտոնական հաղորդագրության համաձայն, որդու՝ Սոս Գասպարյանին չձերբակալելու և նրան առավել մեղմ քրեական պատասխանատվության ենթարկելու համար իբրև 3000 ԱՄՆ դոլար կաշառք է առաջարկել:

Նշենք նաև, որ Սոս Գասպարյանին որպես մեղադրյալ է քննիչը ներգրավվել ՀՀ քրեական օրենսգրքի 112-րդ հոդվածի հատկանիշներով, սակայն Գասպարյանը գտել է, որ քննիչն արդարացի չի եղել և որ որդուն պետք է մեղադրանք առաջադրեր 116-րդ հոդվածով:

Պաշտպան Անանյանը մեզ հետ զրույցում ավելի վաղ հայտնել էր, որ քննիչը տվյալ պահին արարքը վերաորակելու որևէ հիմք չի ունեցել ուստիև նման պայմաններում ինչպե՞ս կարող էր նա անձի հետ պայմանավորվածություն ձեռք բերել և կաշառք ստանալու առաջարկ ընդունել:

Ըստ Անանյանի, եթե անգամ մի պահ ընդունենք, որ քննիչն այդ գումարը վերցրել է, այդ դեպքում ինչու այդ ընթացքում պարբերաբար նրա մոտ գնալով Գասպարյանը գումարը հետ չի պահանջել` տեսնելով, որ որդու գործով արարքը չի վերաորակել, ինչպես ինքն է ակնկալել:

Աղբյուր` Փաստինֆո