Փաստ ինֆո

«Ընտանիքում բռնության կանխարգելման, ընտանիքում բռնության ենթարկված անձանց պաշտպանության և ընտանիքում համերաշխության վերականգնման մասին» օրինագծի վերտառությունն արտացոլում է բովանդակության մեջ առկա այն դրույթները, որոնք ուղղված են լինելու ընտանիքում համերաշխության վերականգնմանը։

«Արմենպրես»-ի հաղորդմամբ՝ այս մասին լրագրողների հետ զրույցում ասաց ՀՀ ԱԺ փոխխոսնակ, պետական-իրավական հարցերի մշտական հանձնաժողովի անդամ Արփինե Հովհաննիսյանը։
Նա համոզմունք ունի, որ ՀՀ-ում չի լինի որևէ մեկը, ով չդատապարտի բռնությունը՝ այդ թվում ընտանեկան։

«Օրենքի հետ կապված որոշ մտահոգություններ եղել են, որովհետև պիտի ելնել որոշակի օբյեկտիվ պատճառներից։ Բանն այն է, որ այդ օրենքում օգտագործվող հասկացությունները, դրանց բացվածքը գուցե տարատեսակ մեկնաբանությունների տեղիք էին տալիս և մտահոգություններ առաջացնում»,- ասաց Արփինե Հովհաննիսյանը։

«Ընտանիքում բռնության կանխարգելման, ընտանիքում բռնության ենթարկված անձանց պաշտպանության և ընտանիքում համերաշխության վերականգնման մասին» օրինագծի վերտառության փոփոխության վերաբերյալ Հովհաննիսյանը նշեց, որ այնտեղ խոսքը գնում է ընտանեկան բռնության կանխարգելման, ընտանիքում բռնության ենթարկված անձանց պաշտպանության, ինչպես նաև ընտանիքում համերաշխության վերականգնման մասին։

«Կարծում եմ, որ այդ հատվածի ավելացումը որևէ ձևով չի նսեմացնում պայքարի հանձնառությունը։ Գուցե վերնագրերում չհանդիպեք օրենքների վերտառության, բայց բովանդակային տեսանկյունից տարբեր օրենքներում կան վերականգնմանն ուղղված դրույթներ»,- նշեց ԱԺ փոխխոսնակը և հավելեց, որ դրանք այժմ առկա են նաև այն նախագծում, որը հինգշաբթի քննարկվելու է ԱԺ պետական-իրավական հարցերի մշտական հանձնաժողովում։

Նրա կարծիքով, վերնագրում այդ հատվածը արտացոլում է բովանդակության մեջ առկա այն դրույթները, որոնք ուղղված են լինելու այդ ընտանիքում համերաշխության վերականգնմանը։

Առողջապահության համաշխարհային կազմակերպության տվյալներով՝ կանանց սպանությունների մոտավորապես 40 տոկոսը կատարվում է արական սեռի զուգընկերոջ կողմից, ընդ որում ամբողջ աշխարհում 3 կանանցից մեկը (35 տոկոս) իր կյանքի ընթացքում ենթարկվել է ֆիզիկական բռնության։

Աղբյուր` Փաստինֆո