Փաստ ինֆո

ԼՂՀ ՊԲ նախկին հրամանատար Սամվել Բաբայանի և մյուսների գործով դատավճիռը կհրապարակվի վաղը՝ նոյեմբերի 28-ին:

Իսկ մինչ այդ, գործով պաշտպանական ճառով այսօր հանդես եկավ նաև ամբաստանյալ Սանասար Գաբրիելյանը՝ պնդելով, որ 2016թ. ապրիլյան պատերազմից հետո ցանկացել է զենք գնել և նվիրել Պաշտպանության բանակին և այդ հարցով դիմել է Արմեն Պողոսյանին:

Սանասար Գաբրիելյանը կարծիք հայտնեց, որ գործը շինծու է, ինքն ընդամենը ցանկացել է բանակին զենք նվիրել, ինչի՞ համար պետք է գլուխ խոնարհի, շնորհակալության փոխարեն «ԱԱԾ պադվալում է հայտնվել»… ազգի դավաճա՞ն ենք, ի՞նչ ենք»:

Ըստ Գաբրիելյանի՝ սա Վրաստանից բերված զենք չի, ապա դիմելով մեղադրողին՝ ասաց. «Բա մի հատ հարցում չարեցի՞ք. իմանայիք՝ ու՞մ է պատկանել այդ զենքը, մի 10-ը եվրոյի համար շվեցարական բանկ եք հարցում անում»:

«Հարգելի մեղադրողը վիզ դրած ուզում ա փակի, բայց թող ժողովուրդը իմանա, որ դա կապած գործ ա, ինքն էլ կաշվից դուրս է գալիս, որպեսզի իրագործի պատվերը, սարքել են, որ խողովակը կապ են վրաներս, գոնե իսկանդեր կապեիք վրաներս, ասեինք իսկանդեր ենք բերել… լա՛վ, էլի նստենք, գոնե մի մեղադրի մեզ, որ մեղավոր ճանաչեք, նորմալ նստենք էլի, խելոք, անմեղ նստենք»:

Վերջին խոսքից օգտվելով՝ ամբաստանյալ Անդրանիկ Քոչարյանը հայտարարեց, որ ի սկզբանե մեղադրանքը չի ընդունել ու չի ընդունի, ուղղակի ամաչում է իր ընտանիքից, որդիներից, բարեկամներից, բոլորից՝ դատարանից ու մեղադրողից:

Ամբաստանյալը, դատարանին դիմելով, ասաց. «Հավատում եմ, որ դուք կկայացնեք ճիշտ և արդար դատավճիռ»:

Նրա եղբայր Կարեն Քոչարյանն էլ ասաց. «Օրենքից բացի՝ առաջնորդվեք մարդկային խղճով»:

Ամբաստանյալ Սանասար Գաբրիելյանն էլ, դիմելով դատախազին, ասաց. «Շինծու գործով մի լավ սռոկ եք դնում, գոնե կարողանու՞մ եք տանը քնել,- ապա հավելեց,- ճիշտ, արդար դատական ակտ կայացրեք, որ դրսում իրար տեսնենք, ասենք՝ ես քո ցավը տանեմ, լավ դատավոր ես, մեր մեղադրողն ա, ոչ թե հակառակը»:

Արմեն Պողոսյանն էլ պնդեց, որ իրեն մեղավոր չի ճանաչում, գործով մյուս ամբաստանյալներ Սամվել Բաբայանը, ժորա Զաքարյանը և Դավիթ Հարությունը հրաժարվեցին վերջին խոսքով հանդես գալուց:

Դատարանը հեռացավ խորհրդակցական սենյակ: Դատական ակտը կհրապարակվի վաղը:

Լուսանկարը՝ ֆոտոլուրի

Աղբյուր` Փաստինֆո